Ang Antu Kadiap ku Yikumbu
1. Ov, mulong ik ukash udingaku pitukata kusal mudimu wa ku chikumbu ni chikumbu?
1 Mu jindond jivud chikadil kal chikasikena nakash kutan antu ku yikumbu. Mu ‘machuku minam ma mar nakash,’ antu adi abachikinau kusal mudimu chisu chilemp mulong wa kuwanyish maswir mau. (2 Tim. 3:1) Antu amwing akutwish kuya kulemp ni yikumbu mulong wa kukimb nfalang ap kwipan mu mijikit ya kwipuwangesh. Ov, mutapu ik tukutwisha kuyitan antu mudi inay mulong wa kuyilej rusangu ruwamp?
2. Mutapu ik tukutwisha kusal chakwel kwendil ku yikumbu kwakad kwikal antu?
2 Fund Nawamp: Chom chakusambish chifanyidin kufund antu awonsu akad kwikal ku yikumbu. Chinech chidi kamu cha usey wa pakampwil anch usadin mu teritwar wey pakad kujing. Ov, ufundining dijin dia mukombil, nimero wa teritwar, dijin diey, ni dichuku dia ngond? Ukutwish kudiokal ku chikumbu ni kufund yom yikwau chisu ey ap mwin kulejan mukwau akeza kuchirikin ku yikumbu kwakad antu. Kwinsudiel kwa chisu cha kulejan, vurik kuchirish rapor ap mapaper wafundau kudi muntu ukweta kart wa teritwar ching kusu anch witiyij anch ukuya kand kuyital antu akad kwikal ku yikumbu. Sadil dipaper dikwau mulong wa kufund majin ma antu awonsu asangaredina ukeza kwendil.
3. Yiyul ik yimwing tukutwisha kulondul chakwel kwambamb nau antu akad kwikal ku yikumbu?
3 Pakish Yisu Kushalijan: Pamwing ap antu akwau kadingap ku yikumbu mu machuku ma mudimu ap akutwish kwikalaku urel ap diampos. Ov, ukutwish kutenchik program wa kuyichirikin kand chisu chiwanyidina? (1 Kor. 10:24) Anch bwat ukutwish kupan majin ma antu akad kwikal ku yikumbu kudi mwin kulejan ukutwisha kuyichirikin pa yisu kushalijan. Chikwau kand, ukutwish kufund majin ma antu awonsu akad kwikal ku yikumbu ap kupakish kwambamb nau ku telefon. In kulejan akweta yikokujol yikash ya mujimbu yiyikangeshina kusal mudimu wa ku chikumbu ni chikumbu akutwish kusanger kukukwash mu mudimu winou.
4. Chilakej ik chimekeshina usey wa kuyichirikin antu akad kwikal ku yikumbu?
4 Chilakej chimwing chilejen usey wa kupakish kwambamb ni antu akad kwikal ku yikumbu. Kupwa kwa kwendil chisu ni chisu ku chikumbu chimwing mu mivu yisatu, ashikena mu kumutan mwin chikumbu. Chamekana anch ndiy wadinga ni kuchingel chisu chinech chawonsu anch Kaman umwing eza chakwel asambisha kand dilejan dia Bibil diasambishay kwilej kurutu kwendendiy kushakam ndond yiniya
5. Ov, chisu ik chilondiningau anch teritwar wapwa kal?
5 Pwish Teritwar: Ov, chisu ik chilondiningau anch teritwar wapwa kal? Chisu chivud, chiding anch twasadin usu wawonsu ufanyidina chakwel kwambamb ni muntu ku chikumbu ni chikumbu. Chifanyidin kusha trakt ap gazet umwing mukur ku yikumbu yakad antu pakad antu akwau kuman, chifanyidin kusal mwamu nakash kamu mu teritwar ulejeningau pachipatu. Chifanyidin kupwish teritwar mu angond anying. Chifanyidin kushinshikin nawamp chakwel mwin kutal teritwar asala rapor wend kurutu kwa chisu.
6. Mulong wak tufanyidin kusal usu wa kuyilej antu awonsu adia mu teritwar wetu rusangu ruwamp?
6 Tusotin anch antu avud mudi chitwishikina ikala nich chisu cha kwilej kutazuk pa dijin dia Yehova ni ayipandisha. (Rome 10:13, 14) Kuwejaku ni antu adia kulemp ni yikumbu yau pakatau kulejan ku chikumbu ni chikumbu. Mudi kambuy Paul, sal anch rusot rey rikala ra “kulejan rusangu ruwamp ra ranaken ra Nzamb.”—Mudimu 20:24.