Tuwanyishany Mujikit Wetu

¹ Kambuy Paul wayiyula in Kristu chakwel endila mwi njil ya Nzamb chakwel ‘akula kakwau ni kakwau.’ (1 Tes. 4:1) Chom chinech chirumburikin ik kudi etu? Cha kusambish chirumburikin anch tufanyidin kukimb mitapu ya kuwanyish mijikit yivud ya mu spiritu, kusal chisu chawonsu chakwel ‘tuwanyish mudimu wetu.’—2 Tim. 4:5.

² Chibachikin: Kuwanyish mujikit wetu kudiokiling ku impu yetu ya kusot kumusadil nakash-nakash Sakatang wetu. Tusotin tukula mu spiritu ni kukimb mitapu ya kuwapish mujikit wetu. Kwikal nich chaku chiwamp ni manangu mawamp kukez kutukwash tuwanyish ntong jetu ja uteokras.—Kus. 1:1, 2; Filp. 4:6; Heb. 10:24, 25.

³ Kusal usu wa kutanduril mujikit wetu kwitin anch tukudishany spiritu wa kupan, ni wa kwipan. Tukutwish kukudish spiritu winou kusutil ku malembil ni kutongijokin nakash pa chilakej chiwamp cha Yesu. (Mat. 20:28) Yesu wading ni musangar ujim wa kuyisadin antu akwau mu mujikit wend. (Midimu 20:35) Tukutwish kumwimburij Yesu kusutil ku kuyisanger antu pakampwil ni kukimb mitapu ya kuwanyish mujikit wetu.—Isa. 6:8.

⁴ Chisend cha Anvaj: Chitwishikin kwandjik mudiau an impu ya kusot kuyisadil antu akwau ni ya kutanduril mujikit pachidiau anikanch. Ansand akuman mushiku wa yid ya dijuku ni kwipan kwau kukash mu kutanduril mujikit wau. Padingay nsangarum, mukadivar umwing wakudisha rusot ra kuwanyish mujikit mu kusal mijikit ya chikumangen pamwing ni ngakend ikundj. Mushiku ni musangar wa ngakend ikundj yamubachika akimba mitapu ya kuyisadil akadivar nend. Katat udi nkwash a mudimu.

⁵ Kuswir kwa Akadivar: “Anch muntu wasot . . . , ndiy wasot kal mudimu uwamp.” (1 Tim. 3:1) Mazu minam mayikasikeshin akadivar kusot kuwanyish ngikadil yitinau mulong wa yisend yikwau ya mudimu mu dirijek dia Yehova. Kusal mwamu kwitinap kwikal nich ukaliweny wa pakampwil. Mukadivar uwanyishina yitinau ukusot kusurab bil Want ni kwipan nich mushiku mu mujikit. (Mat. 6:33; 2 Tim. 4:5) Ukusal usu wa kwikal chilakej chiwamp kudi antu akwau.

⁶ Mu Mangand Mawonsu: Yehova uswapejin kuyikumangej antu. (Is. 60:22) Kudi kuswir kukash kwa antu awonsu alondwila chilakej cha Yesu asala mujikit wau muchifanyidina. Rapor wa mangand wa muvu wa mudimu wa 2006 umekeshin anch ayibabatisha antu 248 327. Chinech chimekeshin anch kudi mwayen wa antu asu 680 dichuku ni dichuku! Tudandamenany amboku etu awonsu kukimb mitapu ya kuwanyishin mujikit wetu muchifanyidina.