Yakul Ku Yipul yen

◼ Ov, “kashalapol ushishamena ni kubabal” uyikasikeshin Atuman atanijanang mu yirund mulong akimbijola ap muntu ni muntu aleta yitongijok yend pa yilondila Bibil?—Mat. 24:45, 47.

Bwat, kayikasikeshinap. Pakwez, mu mangand, mu jingand kushalijan, antu amwing adia mu dirijek dietu asala yirund mulong akimbijol ayinau pa jinsangu jisambidinau mu Bibil. Antu amwing adandamena nich chirund cha panrau chakwel ileja Hebereu ni Grek wafundau nich Bibil mulong ashinshikina uyakin wa kachom ni kachom kadia mu Traduction du monde nouveau. Akwau niyawiy akat kukimbijol piur pa milong ya siyans yisambidinau mu Bibil. Asala tupend twa Web twa kwambambin ni arund nau pa ma ordinater mulong wa kwisambin pa yitongijok yau. Asala kand yikumangan ya kulejan yitongijok yau ni afunda mikand yilejena yom yatanau mu kukimbijol kwau chakwel awejinaku ku yilejenau ku yikumangan ni mikand ya Ukristu.

Pa divu diawonsu, antu a Yehova atambwil malejan mavud ma mu spiritu ni dikasikesh ku yikumangan ya chikumangen ni ku yitentam ya munyimuku, ya pakampwil ya dichuku dimwing, ni ya distrik, ni kusutil ku mikand ya dirijek dia Yehova. Mwishin mwa umutakel wa spiritu utumbila ni wa Dizu diend dia uyakin, Yehova uletin yom yiswiridinau chakwel antu a Nzamb awonsu ikala “pamwing mu manangu mamwing ni mu dizu dimwing” ni ‘akash mu ritiy.’ (1 Kor. 1:10; Kol. 2:6, 7) Tujikitishin chakin kamu mulong wa yakudia ya mu spiritu yiletinya Yehova mu machuku minam ma nsudiel. Chawiy lel, “kashalapol ushishamena ni kubabal” kakutwishap kukasikeshin mukand ap umwing, yikumangan ap yisu, ni ap tupend twa Web ap twisu, twakad kusadil ap kutenchikin mu umutakel wend.—Mat. 24:45-47.

Tuyijikitishin antu asotina kusadil ukaliweny wau wa kutong mulong wa kukwash rusangu ruwamp. Pakwez, chifanyidinap kudjibwil kulemp yisadinay Yesu Kristu kusutil ku chikumangen chend pa divu mulong wa kukimb yisakin yetu. Mu mivu chitot ya kusambish, kambuy Paul wababeshana piur pa kwiyandjik mu milong yiziyishina ni yisendina chisu chilemp, mudi “majin ma majuku ma anshankur makad kutwish kuchind. Yom yiney yikat kuletish ntad, kiyikat kukwashap kutenchik kwa Nzamb kwa dipandish kukata kwijikinau ku ritiy.” (1 Tim. 1:3-7) In Kristu awonsu afanyidin kusal usu wa kulik “kwipol kwa usup, ni kushimun yom ya washankuru, ni kuchirilijan, ni jintad ja yijil; yom yiney yidi yamwamu, kiyikutwiship kumwisakish muntu.”—Titus 3:9.

Kudi antu asotina kwilej ni kukimbijol nakash mu Bibil, tuyitin akimbijol mu Étude perspicace des écritures, “Toute écriture est inspirée de Dieu et utile,” ni mu mikand yikwau, mudi yin yisambina uprofet udi mu mikand ya Bibil mudi Daniel, Isay, ni Kuburik. Mikand yiney yilejen yom yivud mulong wa kwilej ni kutongijokin pa Bibil, Chakwel twizulany “ni ronganyin ra rusot rend mu chiyul cha [win-spiritu], chakwel wendany ku kufanyin kwawonsu ku kumusangarish Mwant, songany mabuj mu midimu yawonsu yiwamp ni kukudil mu ronganyin ra Nzamb.”—Kol. 1:9, 10.