Babalany nich kusadil kwa Internet!

¹ Antu a Yehova akweting urund uwamp umwing ni mukwau. Akweting musangar wa kushimun yamenau mu mudimu wa chingand ni asotining kutesh jinsangu ja Atuman’a Yehova akwau ni mudimu wa Want pa mangand pawonsu. Akatining kwijik milong yakamishina yikutwisha kuyishiken akadivar netu, mud yisu yimwing yikash ap mar madiokila ku yirung, ni asotining kwijik ang kudi chom kanang chikutwishau kusal mulong wa kupan ukwash. Yitongijok mud yiney yimekeshin uumwing wa chisak cha akadivar, ni kumekesh chakin anch tukatijadin umwing ni mukwau.​—⁠Yohan 13:​34, 35.

² Nlel, tukakutesh milong yisutina mu mangand swa. Jinsangu ja ku radio ni televishen jikat kulejan mu mutapu ujim jinsangu kamwing ni kamwing kud antu awonsu adia pa mangand. Telefon ni ndiy utwishishin kwisamb kapamp kamwing kamu nau antu adia ndond yawonsu. Njil ya kusutishin jinsangu yitumbina nlel mu mangand mawonsu udi Internet.​—⁠Tal Réveillez-vous!, Kafunfut 22, 1997.

³ Kusal kwa telefon kwafungula njil ya kwisamb kapamp kamwing kamu ni antu adia pa mangand mawonsu. Ap anch telefon ukwet ukwash nakash, chifanyidin kubabal nich mutapu umusadidinau, ukutwish kushikij ku urund uyimp ap mijikit yakad kufanyin, ni kusadil kwa telefon kupandakena chipim kwitining nfalang jivud. Televishen ni radio yikwet ni yawiy usu mu milong yitadila kufundish. Pakwez, cha ushon, chidi anch maprogram mavud makatau kusutish mading mayimp, ni kuyilondul chisu chivud kushadishining chisu. Chidi komb cha manangu anch twikala in kutond nawamp mu kusadil televishen ni radio.

⁴ Internet umutwishishin muntu kwisamb ni tunan twa antu akwau mu mangand pakad kushadish nfalang jivud, ni ufungwil chis cha kutambwil jinsangu jivud nakash. (Réveillez-vous!, Chiwong 8, 1998) Pakwez, kusadil Internet pakad kubabal kukutwish kumutek muntu mu chak chijim cha muspiritu ni manangu. Mu mutapu ik?

⁵ Chiyakamishin avud kuman jinsangu jirijekinau kal jilejena mutapu wa kuchil mat, ni mabomb. Amakurump a yapu inanin mulong wa kuvul kwa chisu chishadishinau antwau a mudimu mulong wa kusadil Internet. Mikand yetu yalondina kal yom yivud piur pa yak ya muspiritu ya kashinsh yikutwisha kubudikin ku Internet. Tupend tuvud twa Web tukwet milong ya chisum ni yipich ya antu adia winzikis asadina usund, yom yakad kufanyin kud in Kristu. (Kus. 119:37) Chikwau kand, ku yak yiney, kudi kand chak chijingamina chifanyidinau kamu Atuman’a Yehova kubabel. Ov chidi chak ik?

⁶ Ov ukutwish kumutazuk mweny wakad ey kwijik ni kumwandjik mu chikumbu chey pakad bil kwijik anch udi nany? Ov mutapu ik ukusala anch umwijap? Ov ukulik mweny mud winou amwinend pamwing ni aaney? Chinech chitwishikin pa Internet.

⁷ Akutwish kutumin mikand ku kompyut kud antu iwakad ey kwijik ni kutambul mikand yau. Chilik chimwing kand piwisambidina mu chot cha misamb ap ndond yikatau kusanken antu avud mulong wa kwambamb ku kompyut. Antu wisambinany nau akutwish kulond anch adi Atuman’a Yehova, pakwez chisu chivud antu inay kadingap kwau Atuman. Muntu ukutwish kulond anch nidi nsand oku ndiy kadap kwend nsand. Ap muntu ukutwish kutwamb ya makasu anch udi ikundj ap mband.

⁸ Jinsangu jikutumidinau jikutwish ja kushiken mu mutapu wa milong kanang yasuta ap mud yirumburil piur pa yitiyij yetu. Jinsangu jinej akutwish ajitumin antu akwau, ni yawiy, ku mutambu wau, ajitumin kand akwau. Chisu chivud jinsangu jinej kakujitalangap nawamp chakwel kwijik anch jakin ap bwat ni jikutwish kwikal ja makasu. Yirumburil yikutwish kwikal njil ya kupalangeshin yitongijok ya kupumbwok.​—⁠2 Tes. 2:​1-3.

⁹ Nich chak chinech mu manangu, piusadidina Internet, ukutwish kwiyipul: ‘Ov mulong wak nimusadidina? Ov ukutwish kwinsal nayimp muspiritu nich mutapu nimusadidina? Ov niwejidin ku kuyisal akwau nayimp muspiritu?’

¹⁰ Tupend twa web twa “Atuman’a Yehova”: Tushinshikinap bil, mud chilikej, tupend tumwing twa Internet twatekinau kud antu afila mu kan anch adi Atuman’a Yehova. Akwitin kwez ni kutal tupend twau mulong wa kutang jinsangu jatuminau antu itangishidina kwikal Atuman. Akukasikeshin niyey kulejan yitongijok yey ni mutapu umena mikand ya Sosait. Amwing akat kupanang yiyul piur pa mutapu wa kupan uman wa kusadil mu mudimu wa chingand. Tupend twinetu tupanining ndond ya kusanken mulong wa kwambamb kapamp kamwing kamu ni akwau, mud mutapu ukatau kulond ku telefon. Chisu chivud akat kulejanang tupend tukwau muukutwisha kwisamb nau Atuman’a Yehova a mu mangand mawonsu. Ov ukutwish kulejan nich kashinsh anch misamb yiney kayitekinap kud in kupumbwok?

¹¹ Urund wa ku Internet wambatenap kwau nich chitongijok chidia mu Efes 5:15-17. Mupostol Paul wafunda anch: “Chawiy babalany ku yaku yen. Kangal wikalany nich yaku ya antu ayisup, pakwez ikalany antu ababela. Chisu chiukwetanya katat salany yom yiwamp, mulong chirung chitudia chidi chirung chiyimp. Kangal wikalany ayisup, pakwez ikasikeshany kushinshik rusot ra [Yehova, NW].”

¹² Chikumangen cha Ukristu yidi njil ya uteokras kukatau kutudishil muspiritu kud “kashalapol wakin ukweta manangu.” (Mat. 24:​45-47) Mu dirijek dia Nzamb tukwet umutakel ni diking yitulamina kwikal aurikina ni mangand ni yitubachikina kwikal akwatikena mu mudimu wa Nsalejetu. (1 Kor. 15:58) Mwin kuseng walejana anch wadinga ni musangar ni diking pakach pa antu a Nzamb akumangena. (Kus. 27:​4, 5; 55:14; 122:⁠1) Chikumangen chipanining kand usu ni ukwash wa muspiritu kud antu adiamu. Mu chikumangen, tukutwish kutan chisak cha arund akweta rukat, atongidina akwau, ni kukwashijan​—⁠ antu itwija nawamp adia tayad ni asotina kutwinkish ukwash ni rongoj mu yisu ya mar. (2 Kor. 7:​5-7) Yid ya chikumangen ayikingin nich ditenchik dia Baibel dia kuyopat antu asadina yitil pakad kukarumuk ap antu apalangeshina yitongijok ya kupumbwok. (1 Kor. 5:​9-13; Titus 3:​10, 11) Ov tukutwish kuchingej kuman yitenchik ya rukat ya chilik chimwing pitukatijadina urund nau antu akwau mwi njil ya Internet?

¹³ Chimeken anch yom mud yiney yikutwishap kwikal pa Internet bwat. Tupend twa Web tumwing tukat kupalangesh mafundish ma in kupumbwok. Tupend twa mutapu winou tukutwish kulejan yisu yimwing milong yidia chinyim, ni antu ayisadina akutwish kulejan milong yivud mulong wa kumekesh anch adi chakin kamu Atuman’a Yehova. Akutwish ap kukwit jinsangu mulong wa kutal anch udi Kaman wa Yehova.

¹⁴ Yehova usotin anch tusadina manangu. Mulong wak? Mulong wij anch manangu makutulam ku yak kushalijan. Jinswir 2:​10-19 jisambishin nich kulond anch: “Chad lel manangu makez kwandam mu muchim wey, ni ronganyin rikez kasangarish mupim wey. Kashinsh kakez kakulam ni ronganyin rey rikez kakufung.” Ov rikez katufung ku yom ik? Ku yom mud “njil yiyimp,” kud antu alikina njil yitentamina, ni antu akata kusal masandj ni kusangar mu kusal nayimp.

¹⁵ Pituyila ku Chot cha Want, pakad ap ntad tuding nau akadivar ni anambaz etu. Tuyij. Kwikil muntu ap umwing uswiridina kulejan ukinakin wa kwel udi chakin chid cha chikumangen mulong rukat ra ukadivar richimekeshin patok. Kwikil muntu ap umwing utwitina kulejan chakin anch tudi Atuman’a Yehova. Kwinoku kwawiy tukata kuman kukasikesijan kwa kashinsh kwisambinay Paul mu Hebereu 10:​24, 25. Tupend twa Web tukasikeshina urund wa kwi nshing tukutwishap kutwinkish yom yiney. Tuvurikany mazu ma Kuseng 26:​4, 5 makutubabesh ku yak yitukutwisha kutan pitusadidina Internet.

¹⁶ Kwikil mutapu wa kutek mipak ap kushinshikin mutapu wa jinsangu jiletinau ni ap jitadilau in kusadil Internet. Chisu chivud, aan ni ansand akweta mivu dikum ni kusut ading asidinau nakash nich chisum ni in kuyiyipish. Aan ading antu amwing akatau kutekin ruchingej, asotining kwijik, ni asotin kujingunin mangand masu ma kompyut. Chawiy lel anvaj afanyidin kuyilam aanau ni kuyinkish umutakel ufanyidina wa Baibel piur pa mutapu wa kusadil Internet, mud kamu mutapu ufanyidinau kuyitakel aanau mu kutond mizik ap mafilim matadinau.​—⁠1 Kor. 15:⁠33.

¹⁷ Cha ushon, amwing adinga pasak akadivar ni anambaz etu ayopatin mulong wa urund wasambishau kwiyendil ni antu a mangand asankanau mwi ndond mukatau kusanken antu mulong wa mambamb pa Internet ni ashikedin kusal yisalijok ya masandj. Pa kuman mwamu, amakurump afundin anch amwing ashil kal chakin in kwol kwau mulong wa kulondul urund wasambishau pa Internet. (2 Tim. 3:⁠6) Akwau atunin uyakin mulong wa kwitiy jinsangu jipaninau kud in kupumbwok. (1 Tim. 4:​1, 2) Anch twatal yak yijim yiney yawonsu, ov chidap cha manangu anch tubabala anch tusotin kwisamb nau antu mu chot cha misamb pa Internet? Chakin kamu, kusadil manangu, ronganyin, ukaliweny wetu wa kutong ni kujingunin yisambidinau mu Jinswir 2:​10-19 kukutwish kutulam mu yom yiney.

¹⁸ Kudi antu asadina tupend twa Web mulong kusu wa kulejan rusangu ruwamp. Ndond jivud jinej ajisadin kud akadivar akad kubabal. Tupend tukutwish kwikal twafungwilau kud in kupumbwok asotina kuyishadish antu akad kubabal. (2 Yohan 9-11) Piur pa ukwash wa kusal tupend twa Web twa mutapu winou, Mudimu Wetu wa Want wa Kachirikin 1997, paj 5, walonda anch: “Chidap cha usey anch twirijekina ayinetu mapaj pa Internet piur pa Atuman’a Yehova, mijikit yetu ni yitiyij yetu. Ndond yetu yijikena [www.watchtower.org] yilejen jinsangu ja kashinsh ku muntu mwawonsu ukweta nich kuswir.”

¹⁹ Ukwash wa kwilej kusutin ku Internet? Amwing atongin anch akat kuyikwash akadivar nich kuyitumin jinsangu ja yom yakimbodinau kulondulijan ni mijikit kushalijan ya uteokras. Chilikej, muntu ukutwish kukimbol milong ya diskur dia pibur ni kuyitum, ni kutong anch jinsangu mud jinej jikutwish kuyikwash antu akweta nich kuswir mulong wa kurijek diskur dia chilik chimwing. Akwau akutum mifund yawonsu ya dilejan dia Tour de Garde ukubudikina ap kupan mikand yikusadinau ku Shikol ya Mudimu ya Uteokras ap Dilejan dia Buku dia Chikumangen. Amwing akutwish ap kupan yiyul piur pa mudimu wa chingand. Ov yom mud yiney yikwet chakin ukwash?

²⁰ Mikand yipanina dirijek dia Yehova yikat kukwash manangu metu nich yitongijok yitungina ni yikat kutufundish “kwauril kuwap ni kuyip.” (Heb. 5:14) Ov tukutwish kulond anch mwin Kristu ushikedin rutong riner anch antu akwau awiy amukimbidina yikwetay nich kuswir?

²¹ In Berey ayisambina mud “akweta michim ya kutesh nakash kupandakanamu in Tesalonik.” Mulong wak? Mulong ‘ateshanga [dizu, NW] nich mushiku nakash, chad ading ni kwilej pichuku pichuku mukand wa Nzamb chakwel ijika anch, yom yilondilau yidi yakin.’ (Midimu 17:11) Ap anch Paul nend Silas ayishimwina rusangu ruwamp, kelap kwijik uyakin pakad kusal usu ayinau.

²² Kusadil yom yakimbangay muntu mukwau mulong wa kurijek diskur ap chikumangan kudi kushadish chakin rutong ra dilejan dia muntu ipend! Ov tusotinap kutung ritiy retu ayinetu mu Dizu dia Nzamb? Anch wimanyin pa kwitiyij kwey, ukutwish kulejan patok ritiy rey mu madiskur mey, mu kwakul kwey ku yikumangan, ap mu mudimu wa chingand. (Rom 10:10) Anch tukakusadil yakimbangay muntu mukwau, chinech chambatenap nich kurumburil kupaninau mu Jinswir 2:​4, 5 kumwitina muntu ni muntu ‘kujijaman kusot ni kukimb ronganyin ra Nzamb mud chipau chijingamina.’

²³ Chilikej, piukimbina maverse mu Baibel wey, ukutwish kuchirikin mu wiswimp mulong ujim wa verse ni verse. Ukutwish ‘kulondul chom ni chom mudi muchadinga,’ mud mwasalay Luka pafunday Rusangu Ruwamp. (Luka 1:⁠3) Chikwau kand, usu ujim utusadila ukutukwash kwikal ni ukaliweny wa kukimb maverse pitubudikidina mu kulejan ni pitupanina madiskur. Avud alondining anch ayishimokining nakash Atuman’a Yehova mulong ij kusadil Baibel wau nawamp. Mutapu wa kuman winou ukutwish kututal anch tukweting chaku cha kukimb maverse mu Baibel wetu.

²⁴ Tusadilany chisu chetu nich manangu: Mulong ukwau utuwapidina kutal udi wa kuvul kwa asaa asutishinau mu kusal jinsapu mwa kutul milong, kutang, ni kwakul ku jinsangu jituminau ku Internet. Kuseng 90:12 utukasikeshin kulembil anch: “Chawiy tuleja mwakuchindil machuku metu chakwel tukutambul muchim wa chiyul.” Paul walonda anch: “Chisu chakep kal.” (1 Kor. 7:29) Kupwa walonda anch: “Yisu yawonsu yitumena nawamp chifanyidin etu kusal nawamp kudi antu awonsu, pakwez kupandakan kudi anamakwetu in ritiy.” ​—⁠Gal. 6:⁠10.

²⁵ Yiyul yiney yimekeshin kuswir kwa kwikal ni manangu mu kusadil kwa chisu chetu. Chidi cha ukwash mud ik kusutish chisu mulong wa kutang Dizu dia Nzamb! (Kus. 1:​1, 2) Winou udi urund upandakena kuwap tukutwisha kwikal nich! (2 Tim. 3:​16, 17) Anvaj, ov uyifundishinany aanen usey wa kusadil chisu chau nich manangu mu mijikit yitadila Want? (Mul. 12:​1, NW) Chisu chisutishinau mulong wa kwilej Baibel muntu ipend ap mu dijuku, kuya ni kukumangan, ni kubudikin mu mudimu wa chingand chipandaken kulemp yawonsu yikutwishau kuchingej amwing kutambul patanginau ku Internet.

²⁶ Pa chinech, chidi cha manangu kutek yitongijok yetu pa yom ya muspiritu ni pa yom yikweta dirumburik ni yifanyidina mu mwom wetu wa Ukristu. Chinech chirumburikin kutond nawamp nakash jinsangu jifanyidina ku chisu chetu ni yitongijok yetu. Chitudia in Kristu, Kristu walejana yom yikweta dirumburik mu mwom wetu palonday anch: “Kimbany bil Want wa Nzamb ni yom yisotilay [kutentam kwa Nzamb, NW], chad ndiy ukukuwejinanyaku yom yiney yawonsu.” (Mat. 6:33) Ov ukwetap musangar mwom wey pizwila sens nich mijikit ya Want pa ndond ya kwikal ni mijikit yikwau?

²⁷ Mikand ya ku Internet: Ap anch chiwapin kwisambin jinsangu ap yitongijok yitukweta ni anamakwetu ap arund ashicha kulemp, ov kudi kumekesh rukat kujilejan kud antu akwau akad kwijik ap dijuku diey ap arund ney? Ov chifanyidin kujifund pa paj wa Web chakwel muntu mwawonsu ajitanga? Ov jinsangu jinej chifanyidin kujifund ni kujitum kusu mwamu kud antu iwija ni iwakad ey kwijik? Chilik chimwing, anch watambul jinsangu ja antu idjing, ov kudi kumekesh rukat anch ujitumina antu akwau?

²⁸ Ing chikwikal nchik anch rusangu utumina ridap ra kashinsh? Ov uwejidinap ku kupalangesh makasu? (Jnsw. 12:19; 21:28; 30:8; Kol. 3:⁠9) Chakin kamu, anch ‘twababal ku yaku yetu. Kangal twikal nich yaku ya antu ayisup, pakwez mud antu ababela’ tukutongin nakash yom yiney. (Efe. 5:15) Ov tukwetap musangar anch Annuaire, Tour de Garde, ni Réveillez-vous! yizwil nich jinsangu ja kashinsh jitukasikeshina ni kutubachik kujijaman kwendil mwi “njil”!​—⁠Isa. 30:​20, 21, NW.

²⁹ Kudi kand chak chikwau. Mupostol Paul walonda ya antu amwing anch: “Kupandakan, akat kwikal nich yaku ya kushesh yisu yau, mulong wa kukakat ku chikumbu ni chikumbu. Pakwez chom chiyimp nakash, akat kwikal in mboj, ni kwichik pa milong yayen, ni kulondol yom yakad kufanyin awiy kulond.” (1 Tim. 5:13) Minam mawiy mazu makangeshina kusutish chisu ni usu mulong wa kuyitumin akadivar jinsangu jakad usey..

³⁰ Tonginap bil kuvul kwa chisu chifanyidina kusutish mulong wa kufund mikand yimwing yivud! Pa chinech buku Le smog de données (Ingl.) walonda anch: “Anch muntu ukakusutish chisu chivud ku kompyut mulong wa kufundol mikand, mikand ya ku kompyut yikat kukarumuk swa kwikal chisend chilimina ni chisutishina chisu chilik cha kwikal chom chimwing chisangarishina, mulong dichuku ni dichuku chifanyidin kutang mikand yivud ni kuyakwil, mikand yidiokila kud ambay, arund, dijuku, . . . ni asotina kulandosh yom akad kuchingejin.” Ulondin kand anch: “Antu avud akat kutambwil mikand mwi njil ya kompyut ikadil kal ni chaku chimwing chiyimp cha kutum jinsangu jawonsu jitambwilau​—⁠maswimbu, yishimu ya chizung (jinsangu ja kulemp), miruzu ya mikand, ni yom yikwau yivud​—⁠ku muntu mwawonsu udia mu karne wau wa maadres.”

³¹ Chinech chidi chakin mu mikand yikatau kwitumin akadivar avud​—⁠ yom mud ya maswimbu ap jinsangu jishimokishina ap misil ya mudimu wa kulejan; mapowem mafilau nich mu kan anch pawiy pashindamedina yitiyij yetu; yilikej ya madiskur kushalijan mateshinau ku yikunguril, ap ku Chot cha Want; jinsangu ja mudimu wa kulejan; ni yikwau yikwau​—⁠ yom yimekena mud yamwamu. Avud akakulondulang pakad ap kutong mikand mud yiney pakad kwiyipul kuyidiokila, chakwel chikasiken kwijik nany wayifundanga pa kusambish, kapamp kamwing, chifanyidin kwiyipul anch jinsangu jinej jidi ja kashinsh.​—⁠Jnsw. 22:​20, 21.

³² Jinsangu jiyimp mud jinej chisu chivud jambateningap nich mulad wa mazu makin misambinay Paul pamufundinay Timote anch: “Londul chilik cha mazu makin miwatesha kudi am mu ritiy ni mu rukat ridia mu Yesu Kristu.” (2 Tim. 1:13) “Rudim ru tok” ra uyakin wa Baibel rikwet “chilik cha mazu makin” mimanyidina pa mutu wa mulong wa Baibel wa kuchidij winimangand wa Yehova kusutin Want. (Sof. 3:​9, NW) Tufanyidin kusal usu wetu wawonsu chakwel kusutish chisu chetu chawonsu chitukweta ni usu wetu mulong wa kukwatikesh dichidij dia winimangand wa Yehova.

³³ Chitwashikedina kal kulemp mu chisu cha kwisudiel kwa ditenchik dia yom dined, chinech chidap chisu cha kulal tul. Baibel utubabeshin anch: “Ilamany ayinen, babalany! Mukankuny nen, [Djabul, NW], ukat kuzomb mudi ntamb wonyina ukata kukimb nany ukudiay.” (1 Pit. 5:⁠8) Kupwa ulondil kand anch: “Djalany yom yawonsu ya njit yikat kupanay Nzamb, chakwel ukwimanany dang pakurish ni yom yawonsu yitenchikinay [Satan, NW].”​—⁠Efe. 6:⁠11.

³⁴ Kusadil mutapu uyimp Internet yikutwish kwikal njil yikutwishay kusadil Satan chakwel kuyiyikel antu apwichikina nich usu wa chom chinech. Ap anch ukwet ukwash kanang, anch tubabelap, Internet ukutwish kwikal chak. Anvaj afanyidin kutal nawamp mutapu usadidinau aanau Internet.

³⁵ Kwikal ni yitongijok yisikena piur pa Internet didi diking. Tumen usey wa chivurish chifanyidina cha Paul: “Chifanyidin . . . antu akata kusadil yom ya mangand minam [ikala] mudi kasadidilap kwau yom yiney. Mulong mangand minam [makat kukarumuk, NW.]” (1 Kor. 7:​29-31) Nich yitongijok yawonsu yiney mu manangu yikutukwash kwilam etu ni dijuku dietu kwikal azuwodilau nich yawonsu yipanina mangand, kuwejinamu ni yidia pa Internet.

³⁶ Chidi cha usey anch tushala piswimp nakash nau akadivar ni anambaz etu mu chikumangen ni kusadil nich manangu chisu chishadilaku, ni tukwikal ayinetu tayad mulong wa kuyish kurutu mijikit ya Want. Ditenchik dined chidishejidina piswimp ni nsudel yad, ‘kangal twasalany mudi mukatau kusal antu akad ritiy, akweta yitongijok yamwamu,’ pakwez ‘twikasikeshany kushinshik rusot ra [Yehova, NW].’​—⁠Efe. 4:17; 5:⁠17.