Yakul Ku Yipul Yen

◼ Yisu yak ya kusadil Eternet mulong wa kuta urund ni muntu utwakad etu kwijik?

Tupend tuvud twa Eternet atusadil chakwel anch antu atanijana ni kufundijadin mikand kusutil ku Eternet. Tupend twinetu tuvud tukat kuyitwishish antu kutenchik ni kutum mazu mayirumburila chidiau, pamwing ni yipich yau ni jinsangu jau jikwau. Antu akumana jinsangu jinej akutwish lel kuyifundin. Tupend twa mutapu winou twijiken nakash pakach pa ansand, ni ansand amwing mu chikumangen akat kutusadil mulong wa kuta urund ni antu akwau alondina anch adi Atuman a Yehova.

Chiswapel kutudimb kudi muntu tusankena pa Eternet kujindjik untu wend, mwom wend wa mu spiritu, ap yitongijok yend. (Kus. 26:4) Muntu ulondina anch udi Kaman wa Yehova ukutwish kwikal mupangan, muntu wopatau kal mu chikumangen, ap kand mwin kupumbuk mu ritiy. (Gal. 2:4) Chimeken kand anch, in kusal masandj avud ni anikanch akat kusadin tupend twinetu mulong wa kuyitan anikanch.

Ap anch twij nich kashinsh anch antu tufundidina akwet mwikadil uwamp mu chikumangen, minsamb mudi yiney yikutwish swa kwikal yom yakad kufanyin. Mulong chiyikasikedining antu kwimekesh mudingau kudi antu kumanijan nau mpal ni mpal. Akutwish kand kutongin anch kwisambin Eternet mudi ujindj ni yawonsu yikulondau yikutwishap kwijikan kudi antu akwau, mudi anvajau ap amakurump. Cha ushon, ansand avud a mu majuku ma in Kristu awila mu mupit winou ni asambisha kwisamb minsamb yijondila. (Ef. 5:3, 4; Kol. 3:8) Akwau asambisha kutum yipich yau yilangwishina maku ma masandj, ipila majin makad kufanyin, ap inunga ni ordinater wau ku mavideo ma mizik yisambidina masandj patok.

Pa kuman yibudikin, anvaj afanyidin kushinshikin yisadilau an au pa ordinater. (Jinsw. 29:15) Chidi cha ubaj kumwandjik ngez mu chikumbu chetu ap kumusha amwinend pamwing ni an. Chilik chimwing, chidi ubaj kudi etu ap kudi an etu kuta urund nau angendj pa Eternet, ap anch alondin anch adi Atuman a Yehova.—Jinsw. 22:3.