Ov, Dijuku Diey Dirijekin Mulong wa Dipandish?
1 Uprofet wa Bibil wawanyina kal uletin uman ulejena anch disudiel dia mangand manam didi piswimp nakash. Katat tudi mu machuku makash mudi madinga kurutu kwa Mabeb. (Mat. 24:37-39) Nowa wapanda ku disheshik dia mangand minam ma pasak mulong “ndiy wenda pamwing ni Nzamb.” (Dis. 6:9) Chimeken anch Nowa wayileja antu a mu dijuku diend jinjil ja Yehova mulong niyawiy apanda. Mwi njil ik tukutwisha kumwimburij Nowa ni kwirijek mudi dijuku chakwel tweza tupanda ku disudiel dia ditenchik dia katat dia yom?
2 Mwin Kurumburil Yom Yitentamina: Nowa wajijamana mivu 40 djat ku mivu 50 mudi “mwin kurumburil yom yitentamina.” (2 Pita 2:5, Manswik Masu) Amutej nend, ap anch adinga ap bwat mwishin mwa chipwichik cha wintombuj cha angel akarumuka ikal antu, amuswingisha nakash mulong wa kulejan kwend. Chisu chivud antu kakatap kuusanger ap akat kuuswingish mudimu wetu, chawiy chikat kumekesh anch ditenchik dined dia yom didi piswimp ni kupwa. (2 Pita 3:3, 4) Pakwez, pakad kwikal mudi antu adingaku pa chirung cha Nowa, avud au itiyijin usu wetu ni ‘ezin avud’ kumwifukwil Yehova. (Isay 2:2) Tukez kwipandish ‘ayinetu pamwing nau antu atuteshininga’ ching anch twajijaman. (1 Tim. 4:16) Chidi cha usey mudi ik kudi anvaj kuyilej an au piur pa kuswakal kwa mudimu wa kulejan kusutil ku mazu ni ku chilakej!—2 Tim. 4:2.
3 “Ndiy Wayisala”: Kupand kwa Nowa pamwing ni dijuku diend kwengamina pa kulondul kwau kumwing ku malejan ma Yehova. (Dis. 6:22) Chidi cha usey kudi etu nlel twikala tayad ‘kuziyil’ umutakel wa Bibil ni wa chisak cha kashalapol. (Yak. 3:17) An apamina kal a mu dijuku dimwing amuvurikin tatukwau wadinga ni kusadil yiyul yatambulay ku dirijek dia Yehova. Chilakej, wadinga ni kutakel dilejan dia dijuku rubing ni rubing ni wadinga ni kuya ni yid ya dijuku mu mudimu wa kulejan kwinsudiel kwa rubing ni rubing mudi muchitinau. Ndiy wasala usu chakwel aya ni mwan umwing mu mudimu wa kulejan rubing ni rubing. Kujijaman kwend ‘mu kusal mwamu’ kwikala nich usu ukash padi anend, ni awonsu musamban apama ni ikala atushalapol ashinshamena a Yehova.
4 Nsudiel ya ditenchik dined yikez kwez kwa kukashimuk. (Luka 12:40) Kusutil ku kumwimburij Nowa ni kwitiyij dipandish, etu ni majuku metu tukez chakin kamu kwikal tayad!—Heb. 11:7.