Ov, Wirijekin Mulong wa kupand?
“Andam mu waat ni dijuku diey diawonsu. Mulong nakuman kal, yey kusu uyingila kurutu kwam pakach pa antu a chirung chinech.”—DISAMBISHIL 7:1.
1. Ditenchik ik dia dipandish diasalay Yehova pa muten wa Nowa?
YEHOVA ‘washesha mangand ma in kumubwambwil nich mabeb ma mem’ pa muten wa Nowa, pakwez ndiy watenchika mutapu wa kupand. (2 Pita 2:5) Nzamb wakin wamwinkisha Nowa yijil yiswapela pa mutapu ukutungay waat mulong wa kupandish mwom wend ku mabeb ma mem ma pa mangand mawonsu. (Disambishil 6:14-16) Mud mutukutwisha kumuchingejin kashalapol ushinshamena wa Yehova, “Nowa wasala mudi mwamulejinau yom yawonsu kudi Nzamb, ndiy wayisala.” Chakin kamu, “ndiy wayisala.” Chidi mulong wa kuziyil kwa Nowa, chawiy tudiaku ilel unou.—Disambishil 6:22.
2, 3. (a) Mutapu ik wakulau antu a pa muten wa Nowa pasalay mujikit wend? (b) Nowa wandama mu waat nich ruchingej ra mutapu ik?
2 Kutung waat wadingap mudimu ukemp bwat. Chimeken kamu patok anch, antu avud ashimoka pa kuman yom yadinga yisadilay Nowa ni dijuku diend. Ap mwamu, mudimu winou wadinga uman ufanyidina mulong wa kuyitiyijish anch kupand kwau kwadinga kwengamidin pa kwandam mu waat. Kupwa, Nzamb wasula ku muchim mulong wa mangand minima mayimp.—Disambishil 6:3; 1 Pita 3:20.
3 Kwinyim kwa makum ma mivu ya mudimu ukash wasalay Nowa ni dijuku diend, Yehova wamuleja Nowa anch: “Andam mu waat ni dijuku diey diawonsu. Mulong nakuman kal, yey kusu uyingila kurutu kwam pakach pa antu a chirung chinech.” Mulong wa ritiy ni ruchingej rend mu dizu dia Yehova “Nowa ni anend amakundj, ni mukajend, pamwing ni amband au anend, wandama nau mu waat, mulong wa kurezik ku mabeb ma mem.” Yehova wapata chis mulong wa kuyilam in kumwifukwil end. Pameza mabeb ma mem pa mangand, waat wikala ditenchik dia Nzamb dia dipandish.—Disambishil 7:1, 7, 10, 16.
Mikadil ya Katat Yidi mud ya pa Muten wa Nowa
4, 5. (a) Yesu wafanikesha chirung cha kwikalaku kwend ni chom ik? (b) Kufanikan ik kudia pakach pa machuku ma Nowa ni machuku metu?
4 “Mudi muchadinga pa machuku ma Noa, mwamu muchikeza kikal kwez kwa Mwan a muntu.” (Mateu 24:37) Nich mazu minam, Yesu wamekesha anch chisu cha kwikalaku kwend kwakad kumekan ku mes chikez kwikal mud muchadinga pa machuku ma Nowa, ni chakin kamu mwamu muchidia. Pakampwil, kudiosh mu muvu wa 1919, uruu wa dibabesh mud walejanay Nowa akat kuulejan kud antu a michid yawonsu. Chisu chivud, antu akat kusal mud mwasalau antu a pa machuku ma Nowa.
5 Yehova wasala chisal pantaliken nich ngand ‘yizula nich chisum’ kusutil ku Mabeb ma mem. (Disambishil 6:13) Nowa ni dijuku diend kadingap ni kusal yisal yiney ya chisum pakwez, asala nich chisambu mudimu wa kutung waat wadinga umekena patok kud antu awonsu. Pinap, padi chom chifanikena nich machuku metu. Katat antu akashinsh akutwish “[kuman] kwauril kwa yom yikeza kamekan, kudi antu atentamina ni kudi antu ayimp, mwaning, kudi antu akata [kumusadil Nzamb] ni kudi antu akad [kumusadil].” (Malakiy 3:18) Win yakin, rukat, chisambu, ni mushiku umekeshinau Atuman a Yehova akat kuyisanger kud in kutal akad yitongijok yiyimp, ni ngikadil yiney yikat kuyauril antu a Nzamb ni mangand. Atuman alikining chisum mu mitapu yin yawonsu ni asotil anch mwiku utumbila wa Yehova uyitakela. Chawiy chiyukinau nich chisambu ni chawiy chilondwidilau njil yitentamina.—Isay 60:17.
6, 7. (a) Ov, yom ik yakanganyau kusanger antu a pa machuku ma Nowa, ni mutapu ik chifanikena ni antu a machuku metu? (b) Yilakej ik yilejena anch Atuman a Yehova ayijing anch ashalijadin nakash ni antu akwau?
6 Antu adingaku pa machuku ma Nowa akanganya kujingunin anch Nowa wadinga nich chiyukish cha Nzamb ni wadinga ulondwil umutakel wa Nzamb. Chawiy adiburila kwau kulejan kwend ni alika kutesh uruu wayilejay. Ov, chidi nchik ilel unou? Ap anch antu avud akat kusanger mudimu ni yaku ya Atuman a Yehova, avud pakach pau kakukwatangap rusangu ruwamp ni dibabesh dia Bibil nich usey. Amutej, ambay a mudimu, ap anamaku akutwish kubaz ngikadil yiwamp ya in Kristu akin pakwez akutwish kand kwinan anch, “ing anch kadingap Atuman a Yehova!” Chiburedinau kwijik in kutal inay chidi anch, anch Atuman amekeshin ngikadil mud rukat, chisambu, kudimuk, kuwap, kwitudish, ni usu wa kwilam chidi mulong mwiku utumbila wa Nzamb wawiy uyiyikedila. (Galatia 5:22-25) Mulong amekeshin ngikadil yiney yiwamp chawiy chifanyidina kuyibachik antu avud kwitiyij uman ulejenau.
7 Chilakej, mu Russie, Atuman a Yehova adinga akat kutung Chot cha Want. Ikundj umwing wimana mulong wa kwisamb ni mwin kusal mudimu umwing wamwel anch: “Rutung rishimokishina mud ik—kwikil anina ruwand, kulond kwa kuswej, ni muntu ni muntu udi zwang! Ov, udi Kaman wa Yehova?” Mwin kusal mudimu wamwipula anch: “Ang nakwakul anch bwat, ov, ukwingitiyij?” Ikundj wakula kapamp kamwing anch: “Bwat, nikwitiyijap.” Mu musumb ukwau mu Russie, mukurump wa musumb wasangara nakash pamanay Atuman a Yehova atungin Chot chau cha Want chisu. Ndiy walonda anch, ap anch wadinga ni kuman yisak yawonsu ya marelijon mud yidi chilik chimwing, kupwa kwa kuyishinshikin Atuman a Yehova in win yakin ni akad kwikanyek pasadilau, ndiy katongap kand mwamu. Yiney yidi kwau yilakej yaad yimekeshina anch antu a Yehova ashalijadin nakash ni antu akad kulondul yijil ya Bibil.
8. Pisu pimanyidina kupand kwetu kwisudiel ya mangand minam mayimp?
8 Pa chirung cha nsudiel cha “antu a pa muten wa pasak” asheshau mu Mabeb ma mem, Nowa wadinga “mulej wa kutentam” ushinshamena. (2 Pita 2:5) Mu machuku manam ma kwisudiel kwa ditenchik dined dia yom, antu a Yehova akat kulejan yijil yitentamina ya Nzamb ni akat kulejan rusangu ruwamp piur pa mutapu wa kupand kwandam mu mangand masu. (2 Pita 3:9-13) Mud kamu mwamupandishau Nowa mwin kumwov Nzamb wom ni dijuku diend, kupand kwa antu ilel unou kwimanyidin pa ritiy rau ni pa urund wau ushinshamena nich chikunku cha pa divu cha dirijek diawonsu dia Yehova.
Ritiy Riswiriken Mulong wa Kupand
9, 10. Ov, mulong wak ritiy ridi ra usey ujim anch tusotil kupand kwisudiel ya ditenchik dia yom dia Satan?
9 Chom ik chifanyidinay muntu kusal chakwel apanda ku disheshik diezina dia mangand minam madia mu chikas cha Satan? (1 Yohan 5:19) Chimufanyidin bil kujingunin usey wa diking. Kupwa, chimufanyidin kwisakin diking dined. Antu a pa machuku ma Nowa akwatikana kwau ching nich mijikit ya mwom wau mud muchidinga dichuku ni dichuku ni kamanap kwau usey wa diking mulong wa chak chadinga piswimp. Aburena kand chom chikwau—ritiy mudiay Nzamb.
10 Ku mutambu ukwau, Nowa ni dijuku diend ajingunina usey wa diking ni kukolik. Amwitiyija kand Mukaleng Mwin Mangand, Yehova Nzamb. Paul wafunda anch: “Wakad ritiy muntu kakutwishap kumusangarish Nzamb, mulong muntu mwawonsu ukuseja piswimp kudi Nzamb ufanyidin kwitiy anch, Nzamb udiaku, ndiy ukat kufutan kuwap kudi antu awonsu akata kumusurab.” Paul wawejinaku kand anch: “Ku ritiy Nowa witiya kubabesh kwamulejau kudi Nzamb, mulong wa yom yikweza kurutu yakad kal kumekan ku mes. Ndiy wamuziyila Nzamb, chad wasala waat, mwawiy mwapandilay amwinend ni a mu dijuku diend. Ku yisalijok yend yiwamp ndiy wayifisha nich in mangand, chad ndiy wikala nswan wa kutentam kudiokila ku ritiy rend.”—Hebereu 11:6, 7, MM.
11. Chom ik twilejinaku ku mutapu watenchikay Yehova diking mu yisu ya pakur?
11 Chakwel kupand kwisudiel ya ditenchik dia katat diyimp, tufanyidin kusal yivud kupandakanamu kwau kwitiyij anch dikez kusheshik. Tufanyidin kwitiyij, kwisakin yitenchik ya Nzamb mulong wa kupand. Chakin kamu, tuswiridin kwitiyij usey wa yakupesh ya difut dia Mwan a Nzamb, Yesu Kristu. (Yohan 3:16, 36) Pakwez, tukusal nawamp anch twavurik anch ching kusu antu andama mu waat wa Nowa awiy apanda ku Mabeb ma mem. Chawiy chimwing, misumb ya kwikangil yadinga mu Isarel yadinga mulong wa diking dia mwin kujipan kwa akisidan ching anch wachinin ku musumb winou ni washakamamu djat ni pakufilay mwin kupesh mujim. (Kuchind Michid 35:11-32) Pa chipupu cha dikum mu Idjibit pa machuku ma Moses, ayijipa atubuzivum a in Idjibit, pakwez atubuzivum a in Isarel apanda. Ov, mulong wak? Yehova wamuleja Moses anch: “Awiy [in Isarel] akez kunonap mash [ma mwan a mukoku wa Kusut kwa Yehova] mamwing ni kumakus ku yibamb yaad ya ku chis, ni kumwal wa piur ku yikumbu kuukudilanya. . . . Kangal muntu umwing wenen ez abudika ku chis kwa chikumbu chend ching kamu kushik pamanch.” (Kubudik 12:7, 22) Ov, kabuzivum ik wa in Isarel wela kusot kudiburil yijil yiney yaletay Nzamb ni kubudik pol pa chikumbu chipaninau mash ku yibamb yaad ni pa mwal wa pa chis?
12. Chipul ik chifanyidinay muntu ni muntu kwiyipul, ni mulong wak?
12 Chawiy lel, tukwet mayingish ma kutongijokin nawamp pa mwikadil wetu. Ov, chakin kamu tudi mukach mwa ditenchik dia diking dia Yehova? Pimakeza kwez mar majim, mansoj ma musangar ni kujikitish makez kudja mu mes ma antu akimbina diking dined. Pakwez, kud antu akwau, mansoj minam makez kikal ma ushon ni runeng.
Kurijek kwa Pakemp-pakemp
Kukat Kuturijek Mulong wa Dipandish
13. (a) Yitenchik ya direjek yakwashin ku yom ik? (b) Rumburil yitenchik yimwing ya kuya kurutu?
13 Yehova ukat kulet yitenchik pakemp-pakemp mu chikunku cha pa divu cha dirijek diend. Yitenchik yiney yidi mulong wa kuwapish, kujikish, ni kukasikesh ditenchik diend mulong wa diking dietu dia muspiritu. Kusambish mu mivu ya 1870 djat ku muvu wa 1932, amakurump ni ankwash adinga kuyitond kud yid ya chikumangen. Mu muvu wa 1932 amakurump atondau ayiswinkana kud komite watondau kud chikumangen mulong wa kumukwash ntakel wa mudimu. Mu muvu wa 1938, kwasadika yitenchik mulong wa kuyitond atushalapol awonsu a mu chikumangen kulondwish uteokras. Mwishin mwa umutakel wa Chisak Chitakedila Atuman a Yehova, kudiosh mu muvu wa 1972, asambisha kupan majin ni anch amitiyij, yikumangen yikat kutambulang mikand yiyitondila amakurump ni ankwash a mudimu mu mutapu wa uteokras. Mu kusut kwa mivu, mudimu wasalau kud Chisak Chitakedila wajimbin kal ni kwasadikin kal yitenchik mulong wa kuswapesh mudimu.
14. Program ik wa malejan wasambisha mu muvu wa 1959?
14 Kwinyim mu muvu wa 1950, kushinshikin nawamp kwa Kuseng 45:16 kwashikija ku program udandamedina wa diyiy. Verse winou ulondil anch: “Aney amakundj akez kayiswinkan atatukwey, ey ukez kayiswanish mu uswan wa ngand ya kabuj.” Amakurump atakedila katat chikumangen akat kuyifumb mulong wa mijikit ya kusal katat ni ya kusal kupwa kwa Armagedon. (Kujingunik 16:14, 16) Shikol ya Mudimu wa Want yasambisha mu muvu wa 1959. Pa chisu chinicha, atenchika program wa kwilej pakad kujing pa ngond mulong wa ankwash a chikumangen, ni amakurump atakedila. Shikol yiney ayijimbishin kal mulong wa kupan yany kud amakurump awonsu ni ankwash a mudimu. Akadivar inay, niyawiy, akat kutakel mu kuyifumb Atuman a Yehova akwau mu yikumangen yau. Chawiy lel, akat kuyikwash awonsu muspiritu ni kuyikwash kuwapish mutapu wau wa kusal mu mujikit mud atutwambil a rusangu ruwamp ra Want.—Marko 13:10.
15. Jisu jinjil jaad mukatau kulamin kwishitul kwa chikumangen cha Ukristu?
15 Antu asotila kwikal yid ya chikumangen cha Ukristu afanyidin kuwanyish yom kanang yiyitinau. Choviken, in dises a katat kafanyidinap kwikal mu chikumangen, mud mwalikau kand kuyandjik antu inay mu waat wa Nowa. (2 Pita 3:3-7) Pakampwil kudiosh mu muvu wa 1952, Atuman a Yehova ateshin kal nawamp ditenchik dikwashina kulam chikumangen—charumburik anch, kuyopat in kusal yitil akad kukarumuk. Chakin, in kusal yitil akarumukina akat kuyikwash nich rukat chakwel ‘atentamisha jinjil ja mend yau.’—Hebereu 12:12, 13; Jinswir 28:13; Galatia 6:1.
16. Antu a Yehova adi mu mwikadil ik wa muspiritu?
16 Mwikadil wa kuya kurutu muspiritu wa Atuman a Yehova udiap wa kukashimuk ap wa kwiyezin kwau. Kusutil muprofet Isay, Yehova walonda anch: “Chawiy nikulejinany anch, awonsu akata kwingifukwil am ni kwinziyil akez kikal nich yakudia ni ya kuna yiwanyidina, pakwez en ukez kafany nzal ni impu. Awiy akez kasangar, pakwez en ukez kovany usany. Awiy akez kawang nich musangar, pakwez en ukez kadilany ni kuswan ku michim.” (Isay 65:13, 14) Yehova udandamedin kutwinkish yakudia yivud ya pa chisu chifanyidina ni ukwash wa muspiritu yikata kutukasikesh nakash muspiritu.—Mateu 24:45.
Irijeka Mulong wa Dipandish
17. Chom ik chikeza kutukwash kwirijek mulong wa kupand?
17 Kusut muchadinga pakur, katat chawiy lel chisu cha ‘kutalijan muntu ni mukwau chakwel tukwashijanany kumekesh rukat ni kusal yisalijok yiwamp. Kangal twalikany chaku cha kukumangan pamwing, mudi mukat kulikau antu amwing.’ (Hebereu 10:23-25) Kulamat ni kushal mwin kusal mujikit pamwing ni chimwing cha yikumangen 98000 ni kusut ya Atuman a Yehova kukez kutukwash kwirijek mulong wa dipandish dietu. Tukez kwikal nich ukwash wa ambay netu akaritiy pitwikasikeshina kumudjal “muntu musu” ni kusal usu wawonsu mulong wa kuyikwash antu akwau ijika ditenchik dia Yehova dia dipandish.—Efes 4:22-24; Kolosay 3:9, 10; 1 Timote 4:16.
18. Ov, mulong wak ukwatina mupak wa kulamat bang ku chikumangen cha Ukristu?
18 Satan ni mangand mend mayimp akat kutwoz ni kusot kutupumbul kutudiosh mu chikumangen cha Ukristu. Pakwez, tukutwish kushal mu chikumangen ni kupand ku kusheshik kwa ditenchik dia katat dia yom. Rukat retu mulong wa Yehova ni kujikitish mulong wa yitenchik yend ya rukat yitubachikin nakash kukwat mupak wa kukangesh usu wa Satan. Kutongijokin pa yiyukish yetu ya katat kukez kukasikesh mupak wetu. Yimwing ya yiyukish yiney akez kuyisambin mu mutu wa mulong wambakedinap ou.
Ukwakul Nchik?
• Machuku metu mafaniken nchik ni machuku ma Nowa?
• Ngikadil ik yiswirikena chakwel kupand?
• Yitenchik ik ya kuya kurutu yikasikeshina ditenchik dia Yehova mulong wa dipandish dietu?
• Mutapu ik tukutwisha kwirijek mulong wa kupand kwetu ayinetu?
[Chipich chidia pa paj wa 8]
Antu a pa machuku ma Nowa kamuteshap kwau
[Chipich chidia pa paj wa 9]
Chidi cha usey kuta muchim nakash ku uruu wa dibabesh dia Nzamb
[Chipich chidia pa paj wa 10]
Shikol ya Mudimu wa Want yikwet diloz ik?
[Chipich chidia pa paj wa 11]
Katat chawiy chisu cha kulamat bang ku chikumangen cha Ukristu