Kwendil Mu Kushinshaman Kuletin Musangar
“Chiyukish cha [Yehova] chawiy chikata kulet dipit, ni Ndiy kakuwejangikup ushon.”—JINSWIR 10:22.
1, 2. Ov, mulong wak tufanyidina kwipuk kwiyakamish nakash mulong wa machuku ma kurutu?
IKUNDJ umwing filozof mwin Amerik walonda anch: “Kwiyakamish nakash piur pa machuku ma kurutu . . . kukat kutukangesh kusanger yom tukweta katat.” Mwamu mukatau kutong an akata kwiyakamish mulong wa yom yikezau kusal pakezau kukul kwikal amakurump djat ni pakuburenau kusanger yiyukish ya pa mivu ya winsand wau.
2 Ap in kumwifukwil Yehova, mwamu mutonginingau yisu yimwing. Tushinshikinany yilondwila ey. Atuman a Yehova achingedin mu chirung chilemp nakash kuman mutapu ukuwanyishay Nzamb kushilamu kwend kwa kulet paradis pa divu. Tuchingedin nich impu yikash mwom wakad mayej, upal ni mar. Ap anch chiwapin kuchingej yom yiney, ov, chikwikal nchik anch twiyakamish nakash mulong wa yiyukish ya ku mujimbu yitukaninau kurutu oku mu chilik cha kuvuramen yiyukish yetu ya katat ya muspiritu? Chikez kwikal cha ushon mud ik! Tukutwish twaziy swa ni ‘kuyel muchim mulong wa kulab labee kwa ruchingej retu’ mud mutwadia nikuchingej. (Jinswir 13:12) Tukutwish twaziy ap kwiyakamish mulong wa milong ni yikokujol ya mwom. Pa ndond pa kurish nich mikadil yiyimp, tukutwish kukudish ngikadil ya runyinyit. Tukutwish kwiyep yom yiney yawonsu kusutil ku kutongijokin pa yiyukish yetu ya katat.
3. Pisu tukupwitina manangu metu mu mutu wa mulong winou?
3 Jinswir 10:22 ulondil anch: “Chiyukish cha [Yehova] chawiy chikata kulet dipit, ni Ndiy kakuwejangikup ushon.” Ov, mapit ma muspiritu ma atushalapol a Yehova ilel unou, chidiap chiyukish chiyisangareshina nakash? El twisambinany mitambu kanang ya mapit metu ma muspiritu ni tumanany chimarumburikina kud muntu ni muntu udia pakach petu. Kwitekin chisu cha kutongijokin pa yiyukish yimuruzukidinay Yehova ‘mwin kutentam wendidila mu kushinshaman’ chakin kamu kukez kukasikesh mupak wetu wa kudandamen kumusadil Tatukwetu wa mwiur nich musangar.—Jinswir 20:7.
‘Yiyukish Yituletidina Dipit Katat’
4, 5. Malejan ik ma Bibil usangaredina nakash, ni mulong wak?
4 Ronganyin rakin ra malejan ma Bibil. Marelijon ma Kristendom mafil mukan anch mitiyijin Bibil. Pakwez, makangeny kwitiyij malejan madiamu. Ap yid ya relijon umwing, yisu yivud yikat kutadikijan mu kuman kwau kwa yom yifundishinay chakin kamu Bibil. Mwikadil wau ushalijadin ni wa atushalapol a Yehova! Chikalap nchik ngand yetu, chinshakur chetu, ap kabil ketu, tumwifukidil Nzamb wakin twija dijin. Kadiap nfunk ya anzamb asatu mu umwing bwat. (Kuvurik Yijil 6:4; Kuseng 83:18; Marko 12:29) Twij kand anch mulong ujim wa win mangand wa Nzamb akuupwish katat kamu ak ni kusutil ku kudandamen kushinshaman kwetu kud ndiy, muntu ni muntu pakach petu ukwachikin ku mulong winou. Twij uyakin piur pa afu ni tukatap kumwov Nzamb wom wa chamwamu, Nzamb ukatau kutongin antu avud anch ukez kuyitek mu karung ka misiny ap kuyandjik mu pirgatwar.—Mulej 9:5, 10.
5 Chikwau kand, chidi cha musangar kwijik anch kitwadiokalap ku dikarumuk! Pakwez, tudi yitang ya Nzamb, yasalay mu chifu chend amwinend. (Disambishil 1:26; Malakiy 2:10) Nfund-a-kuseng wamuwangina Nzamb anch: “Nikat kupan kujikitish kudi Ey mulong wantanga nawamp mwamu, chidi cha kushimok, midimu yey yikwamushen, ni mupim wam wij kal, ukuvurik.”—Kuseng 139:14.
6, 7. Kukarumuk ik kwa mwom wey ap kwa mwom wa antu akwau wija kwikala kal chiyukish?
6 Kukolik ku yisal ni yaku yiyimp. Yibabesh piur pa uyimp wa kuna ruwand, kuna maar kwakad kupep pa chopu, ni piur pa masandj yizwil too ku yisaj ni mu majurnal ya kupalangeshin jinsangu. Chisu chivud, yibabesh yiney kakatap kuyitesh ku antu. Chad, chom ik chikata kushiken, anch muntu wakashinsh wilej anch Nzamb wakin ufishin nich yom yiney ni anch akat kumunenganesh kud antu asadilinga yom yiney? Chawiy, muntu winou usadining usu wa kulik kamu yisal mud yiney mu mwom wend! (Isay 63:10; 1 Korint 6:9, 10; 2 Korint 7:1; Efes 4:30) Ap anch usadil mwamu mulong wa kumusangaresh Yehova Nzamb, muntu winou ukutan yiyukish yikwau—ukash uwamp wa mujimbu ni chisambu mu manangu.
7 Chiyikasikedin antu avud kulik yaku yiyimp. Pakwez, mwamu musadilingau makum ma tunan twa antu muvu ni muvu. Ipanin ayinau kud Yehova ni kutambul dibabatish dia mu mem, mulong wa kwijikish patok anch alikin kal kusal yisal yikisinay Nzamb mu mwom wau. Chitukasikeshin etu awonsu mud ik! Mupak wetu wa kukolik mu uswik wa chitil ni ngikadil yiyimp ukasikeshin.
8. Chiyul ik cha Bibil chiwejidina ku musangar wa dijuku?
8 Tukutwish kwikal nich mwom wa musangar mu dijuku. Mu jingand jivud mwom wa dijuku udi uyimp. Mauruw mavud mafil, chisu ni chisu makat kuyisha an mu kufeng mar makash. Mu jingand jimwing ja Mwimputu, majuku ma nvaj umwing mikal kal piswimp 20 pa chitot. Ov, mutapu ik lel utukwashinay Yehova kwendil mu kushinshaman pa mulong winou? Tang amboku Efes 5:22–6:4, ni shinshikin anch Dizu dia Nzamb dipanin yiyul yiwamp kud angatan, angachik, ni an. Chakin kamu kusadil yilondilau mwinomu ni mu Mifund yikwau kukat kukasikesh moj wa uruw, kuyikwashining anvaj kuyilil an nawamp, ni kulet mwom wa musangar mu dijuku. Ov, chinech chidiap chiyukish cha kusanger nakash?
9, 10. Ov, mutapu tumena machuku ma kurutu ushalijadin nchik ni kuman kwa mangand?
9 Tukwet kashinsh anch milong ya mangand akuyipwish piswimp kamu ap. Wikalap nchik usu wakin usadilau ansil a siyans, a winchij ni amakurump akwau, katwishinap kwau kupwish milong yikash yidiaku katat. Klaus Schwab, mwin kusal Ditenchik dia Milong ya Mapit, walondil katat kamu anch “uvud wa milong mu mangand udandamedin kwiwejinaku pakwez chisu cha kuyipwish chiyil mu kukep nakash.” Ndiy wisambina “ubaj ukwatina jingand jivud mud kuyovish antu wom ni kujipan (terorism), kuyip kwa murungul ni kanvundangesh ka usey wa nfalang.” Schwab wapwisha anch: “Katat, kupandakan muchadinga, antu aswiridin kwovijan chakwel kukwat swa mipak yijim mulong wa kupwish milong yidia mu mangand.” Pichiyila kurutu chirung chinech cha chitot cha mivu cha 21, kushinshikin kwa machuku ma kurutu ma muntu kuyil ni kuyip nakash.
10 Chidi cha musangar nakash kwijik anch Yehova watenchikin kal mutapu uwamp wa kupwish milong yawonsu yirishinau nich antu kusutil ku Want wa Umesia wa Nzamb! Kusutil ku Want winou, Nzamb wakin ukez “kukatwish njit” ni ukez kulet “chisambu mwi ngand.” (Kuseng 46:9; 72:7) Mwant wazizilau many, Yesu Kristu, ‘ukez kumukamunin chimana mar, ni kazwazu ku kupengam ni ku kubwambul.’ (Kuseng 72:12-14) Mu winyikel wa Want, mukezap kwikal kamungun. (Kuseng 72:16) Yehova “ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan, mulong yom yikur kiyamekanap kand.” (Kuburik 21:4) Want awimika kal mwiur ni piswimp ap kamu ukusal chiswiridikina mulong wa kupwish milong yidia pa divu.—Daniel 2:44; Kuburik 11:15.
11, 12. (a) Ov, kulondul mazang kuletining musangar wa chikupu? Rumburil. (b) Chom ik chikata kulet musangar wakin?
11 Twij yom yiletininga musangar wakin. Yom ik yiletininga musangar wakin? Ikundj umwing mwin kwilej mutapu wa kutong ni ngikadil walonda anch musangar ukwet yikunku yisatu: mazang, kwipan (kwipan mu mijikit mud mudimu ni dijuku) ni diloz (kusal mulong wa diloz dijim ap kusal mulong wa ukwash wa antu akwau). Pa yom yiney yisatu, ndiy wajimbula mazang mud chikunku cha usey ujim ni walonda anch: “Chinech chawiy cha usey nakash mulong antu avud asidin mwom wau pa kulondul nakash mazang.” Ov, Bibil ulondil nchik pa mulong winou?
12 Mwant Salomon wa Isarel wa pakur walonda anch: “Natonga mu muchim wam anch: ‘Chifanyidin nizangamap bil chakwel nimana musangar,’ pakwez nimen kand anch, chidi kwau chom chamwamu. Namen kal anch, kusip udi kwau usup, ap musangar kiukusalap chom.” (Mulej 2:1, 2) Kulondul yilondilay Bibil, mazang mawonsu madiokila ku musangar madi ma kachisu kakemp. Ov, chidi nchik kwipan mu mudimu? Tukwet mudimu umwing wa usey ujim tufanyidina kusal—mudimu wa kulejan want ni wa kuyikadish antu in kwilej. (Mateu 24:14; 28:19, 20) Kusutil ku kuyilej antu akwau uruu wa dipandish udia mu Bibil, tukat kusal mudimu ukutwisha kutupandish etu ayinetu ni kuyipandish antu akata kututesh. (1 Timote 4:16) Mud “in mudimu nend Nzamb” tumen anch “chiyukish cha mwin kupan chipandakenamu cha mwin kutambul.” (1 Korint 3:9; Midimu 20:35, MM) Mudimu winou uwejidin usey ku mwom wetu ni umwinkishin Sakatang chakul cha kumwakul Satan Djabul, ukata kumusaal. (Jinswir 27:11) Chakin kamu, Yehova watulejin kal anch kumwifukwil kuletin musangar wakin ni wa chikupu.—1 Timote 4:8.
13. (a) Ov, mwi njil ik Shikol ya Mudimu wa Uteokras yidi chiyukish chetwetu kusanger nakash? (b) Mutapu ik wisakidina ku Shikol ya Mudimu wa Uteokras?
13 Tukwet program mujim wa diyiy. Gerhard udi mukurump mu chikumangen cha Atuman a Yehova. Pavurikay winsand wend, Gerhard ulondil anch: “Pinadinga nsand, nadingap ni kutwish kulond. Anch nov kuyip, natwishangap kulond nawamp ni nadinga ni kukukum. Nadinga ni kwiyov kwikal wa nsudiel ni kwiyakamish. Anvajam atenchika chakwel nileja mutapu uwamp wa kulond, pakwez usu wau wadinga wa mwamu. Mulong wam wadinga mu manangu, kiwadingap ku mujimbu. Pakwez, kwadinga ditenchik diwamp dia Yehova—Shikol ya Mudimu wa Uteokras. Kwifundish dijin diam ku shikol yiney kwanginkisha dikasikesh disu. Nasala usu nakash mulong wa kusadil yom yinileja. Natwisha! Nasambisha kulond nawamp, kiniyakamishap kand, ni nikala chifuvu mu mujikit. Katat nikat kusal madiskur ma patok. Chakin kamu nimujikitishin Yehova, watenchika mwom wam kusutil ku shikol yiney.” Ov, mutapu utwinkishinay Yehova diyiy mulong wa kusal mudimu wend didi chakin diyingish dia musangar?
14, 15. Ukwash ik udingaku tayad, pa chisu cha mar? Let chilakej.
14 Tukwet urund wa pakampwil ni Yehova ni ukwash wa akadivar a mu mangand mawonsu. Katrin, ushichinga mu Allemagne, wanenganana pateshay rusangu ra kuzal kwa divu kukash kwaleta tsunami ku mutambu wa kurul ni kwingangel kwa Aziy. Mwanend mband waya mu Thaïlande chisu chashikena chak chinech. Mu masaa 32, maku winou kijikap anch mwanend wadinga mwom ap anch wadinga umwing wa antu afila adinga ni kwiwejinaku saa ni saa. Katrin wova musangar nakash pamutazukau ku mond (telefon) ni kumulej anch mwanend wadinga mukash!
15 Chom ik chamukwasha Katrin mu masaa minam ma yakamish? Ndiy wafunda anch: “Namulembila Yehova chisu chinech chawonsu. Namana chisu ni chisu mutapu kumulembil Yehova kwanginkisha usu nakash ni chisambu mu manangu. Chikwau kand, akadivar in Kristu akatish eza ni kwintal ni ankasikesha.” (Filip 4:6, 7) Mwikadil wend wela kwikal uyimp nakash mud ik anch ndiy wasutisha masaa minam ma mar pakad kusot ukwash wa kumulembil Yehova ni rongoj ra akadivar in Kristu! Urund wetu wa piswimp ni Yehova ni Mwanend pamwing ni urund wa piswimp ni akadivar in Kristu chidi chiyukish cha pakampwil, cha usey nakash ni tufanyidinap kuchiman mud chamwamu.
16. Let uman ulejena usey wa ruchingej ra divumbuk.
16 Tukwet ruchingej ra kuyiman akatish netu afa kal. (Yohan 5:28, 29) Nsand umwing Matthias amulila mud umwing wa Atuman a Yehova. Pakwez, kasangerap kwend yiyukish yend, wapumbuka ku chikumangen cha Ukristu pawanyishay mivu pakach pa dikum ni yisatu ni dikum ni chidivu. Katat ufundin anch: “Kand kal nisambangap nakash ni tatukwam. Mivu yivud twadinga ni kutadikijan kamu. Chikalap nchik mwamu, chisu chawonsu tatuku wasotang ching uwamp wam. Wankata nakash, chawiy chom naburena kwijik pa chisu chinicha. Mu muvu wa 1996, nashakama ku tubet twend, nakwata ku chikas chend oku nikat kudil nakash, namuleja anch nilemb kal mulong wa yawonsu yinasala ni anch nadinga nimukatin nakash. Pakwez kanteshap. Mayej mamukwata mu kachisu kakemp, ni wafa. Anch nikal mwom chakwel nimumana tatuku pakuvumbukay, tukez kurijek yom yasuta. Ni chakin kamu ukez kusangar pa kutesh anch katat nisadidil mud mukurump, am ni mukajam twitapidil dilau dia kusadil mud ayibol.” Divumbuk didi chiyukish chijim nakash kud etu!
“Ndiy Kakuwejangikup Ushon”
17. Kutongijokin pa yiyukish ya Yehova kutukasikeshining mutapu ik?
17 Yesu Kristu walonda piur pa Tatukwend wa mwiur anch: “Ndiy ukat kubudishilang muten wend kumunyikin padi ayimp ni awamp, ni kunakish ruvul padi in kutentam ni akad kutentam.” (Mateu 5:45) Anch Yehova ukat kuyiyukish ap antu akad kutentam ni ayimp, ukuyiyukish lel chipandikena mud ik antu akata kwendil mu kushinshaman! Kuseng 84:11 ulondil anch: “Mwant Nzamb . . . kakumukishap muntu ukata kwendil mu kutentam chom chiwamp.” Anch twatongin pa kubangin kwa pakampwil ni mutapu wiyakamishinay mulong wa antu amukatila, michim yetu yikat kwizulijan nich kujikitish ni musangar mud ik!
18. (a) Ov, chitwishikin nchik kulond anch Yehova kakuwejinangap ushon ku yiyukish yend? (b) Ov, antu avud ashinshamena kud Nzamb amening lel mar mulong wak?
18 “Chiyukish cha [ Yehova]”—chawiy chiyinkishina antwend mapit ma muspiritu. Ni atushinshikidin kand anch “Ndiy kakuwejangikup ushon.” (Jinswir 10:22) Ov, mulong wak lel kupakiu ni yoziu yivud yikat kuyishiken antu ashinshamena kud Nzamb, ni kuyimesh mar nakash? Kudi mayingish masatu malejena mulong wak yikokujol ni mikadil ya mar yikat kutushiken. (1) Chibachikin chetu cha chitil. (Disambishil 6:5; 8:21; Yakob 1:14, 15) (2) Satan ni ayilembil end. (Efes 6:11, 12) (3) Mangand mayimp. (Yohan 15:19) Ap anch Yehova ulikin yom yiyimp yitushikena, kadiap Nzamb ukata kuyilet. Chakin kamu, “Yiyukish yawonsu yiwamp ya kusal nich, ni yom yawonsu ya matangal yiwanyidina, yidiokil mwiur kudi Tatuku wa yimunyik yawonsu ya mwiur.” (Yakob 1:17) Yehova kakuwejinangap ushon ku yiyukish yend.
19. Chom ik chiyichingedina antu adandamedina kwendil mu kushinshaman?
19 Chakwel kuman mapit ma muspiritu yitin kusej piswimp ni Nzamb. Anch twata urund wa piswimp ni Nzamb, tukat ‘kwirijekin yipau yiwamp kwikal dishin diwamp ku chirung chikeza kwez’—mwom wa chikupu. (1 Timote 6:12, 17-19) Mu mangand masu maletinay Nzamb, tukez kwikal ni mapit ma muspiritu pamwing ni mapit ma ku mujimbu. Mwom wakin, ukez kwikal uswan wa antu awonsu ‘adandamedina kuziyil ku dizu dia Yehova Nzamb.’ (Kuvurik Yijil 28:2) Tukwatany mupak ukash wa kudandamen kwendil mu kushinshaman nich musangar.
Yom ik Wilejina?
• Ov, mulong wak chidiap cha manangu kwiyakamish mulong wa machuku ma kurutu?
• Yiyukish ik tukweta ilel unou?
• Ov, mulong wak atushalapol ashinshamena a Nzamb amening mar?