Dandamenany Mwi Njil Ya Mwom Upadakena Kuwap!

“Anch tudi aom ap twafa, tudi ayen a [Yehova] Mwant”—ROME 14:8.

1. Yom ik yalejanay Yesu piur pa mulad wa mwom upandakena kuwap?

YEHOVA usotin tudandamen mwi njil ya mwom upadakena kuwap. Antu akutwish kwikal nich jinjil kushalijan ja mwom, pakwez nching kusu njil Jimwing Jawiy Jipandakenamu kuwap. Tukwikal nich mwom upandakena kuwap anch twashakan kulodulijan nich Dizu dia Nzamb ni kwilejin kud Mwanend Yesu Kristu. Yesu wayileja in kwilej end anch amwifukwila Nzamb mu spiritu ni mu uyakin, ni wayinkisha mudimu wa kuyikadish in kwilej. (Mat. 28:19, 20; Yoh. 4:24) Anch twashakam kulondulijan ni yany ya Yesu, tumusangeshin Yehova ni tukutambul chiyukish Chend.

2. Mutapu ik witiyija witiyiau antu avud ku rusangu ra Want mu chitot cha kusambish, ni chirumburikin ik kwikal mwi “Njil”?

² Pikalau “antu atondau mulong wa kutambul mwom wa chikupu” itiyija ni atambula dibatish, tuyingin kuyilej anch,“Dandamenany mwi njil ya mwom upandakena kuwap!” (Mid. 13:48) Mu mivu chitot cha kusambish cha pa chirung chetu, tunan twa antu a michid kushalijan itiyija uyakin ni aleta uman wa patok wa kwipan kwau kudi Nzamb kusutil ku kutambul dibatish. (Mid. 2:41) In kwilej inay adinga a mwi “Njil.” (Mid. 9:2; 19:23) Dizu dinend diading difanyidina mulong awiy ikala in kwilej a Kristu alondula mulad kanang wa mwom wanding wimedina pa ritiy mudiay Yesu Kristu ni pa kwimburij chilikej chend.—1 Pita 2:21.

3. Mulong wak antu a Nzamb atambula dibatish, ni chibudikin ik chidiaku mu mivu yasutina?

³ Mudimu wa kwikadish in kwilej uyil kurutu nakash mu machuku minam ma kwisudiel ni ausadil katat mu jingand 230 ni kusut. Mu mivu dikum yisutina ey, antu 2 700 000 ni kusut akwata mupak wa kumusadil Yehova ni atambula dibatish mudi chijingidij cha kwipan kwau kudi ndiy. Winou udi mwayen wa antu 5 000 pa rubing ni rubing! Chiyukish cha kutambul dibatish chimedin pa rukat ra Nzamb, pa ronganyin ra Mifund, ni pa ritiy mu yom yilejenau. Ubatish chidi chinship cha usey nakash mu mwon wetu, mulong udi nsambishil ya urund wa pinswimp nakash ni Yehova. Udi kumekesh kwa kashinsh kakwel anch ukez katukwash tumusadila mu kushinshaman, mud kamu mwayikwashay atushalapol end a pasak kwendil mwi njil yend.—Isay 30:21.

Mulong wak Ufanyidina Kutambul Dibatish?

4, 5. Jimbul yimwing ya yiyukish ni matapish ma kutambul dibatish.

⁴ Pamwing ap watambwil kal ronganyin ra Nzamb, wakarumukin kal mu mwom wey, ni katat udi mwin kulejan wakad kubatishau. Kuya kurutu kwa mutapu winou kwawiy kufanyidina. Pakwez, ov, wipanin kal kudi Nzamb mu malembil, ni uchingejin katat kutambul dibatish? Kusambishil ku kwilej kwey kwa Bibil, wij katat kamu nawamp anch mwom wey ufanyidin kwimen pa kumushiman Yehova, kangal pa kwisangaresh ching kusu amwiney ap kwikungin mapit ma kumujimbu. (Read Kuseng 148:11-13; Luka 12:15) Chawiy lel, yisu yimwing ya yiyukish ni matapish ma kutambul dibatish?

⁵ Mwom wey ukwial nich rutong rupandikena kujimb, piudia Mwin Kristu wipanina. Mulong usadil rusot ra Nzamb ukwikal nich musangar. (Rome 12:1, 2) Mwiku utumbila wa Yehova ukez kabudish mu udia ngikadil ya Nzamb mudi chisambu ni ritiy. (Gal. 5:22, 23) Nzamb ukez kwakul ku malembil mey ni kuyukish usu usadila chakwel kukwatikesh mwom wey nich Dizu diend. Mudimu wey wa kulejan ukwikal usangareshina, ni kushakam mu mulad witiyijinay Nzamb kukukasikesh richingej rey ra mwom wa chikupu. Chikwau kand, kwipan ni kutambul dibatish kukez kumekesh anch usotin chakin kamu kwikal umwing wa Atuman a Yehova.—Isay 43:10-12.

6. Ubatish wetu wijikishin chom ik?

⁶ Ku kwipan ayinetu kudi Nzamb ni kutambul dibatish, tumekeshin patok anch tudi antu a Yehova. Kambuy Paul wafunda anch “Kwikil umwing pakach petu udia mwant wa mwom wend amwinend, kwikil kand umwing pakach petu udia mwant wa rufu rend amwinend. Anch tudi aom, tudi aom mulong wa [Yehova]. Chawiy anch twapandap nchik, ap anch twafap nchik, tudi ayen a [Yehova].” (Rome 14:7, 8) Nzamb utukwatin nich usey kusutil ku kutwinkish mbil ya kwitondil. Anch twadond nich usu wawonsu kulondul mulad winou wa mwom mulong tumukatin Nzamb, tusangeshin muchim wend. (Jinsw. 27:11) Ubatish wetu udi chijingidij cha kwipan kwetu kudi Nzamb ni kulejan kwa patok anch Yehova ndiy nyikel wetu. Umekeshin anch tudi ku mutambu wa win mangand wend. (Mid. 5:29, 32) Chawiy lel, Yehova udi ku mutambu wetu. (Tang Kuseng 118:6.) Chikwau kand ubatish ukat kutwazuril njil chakwel kutambul yiyukish yikwau yivud ya muspiritu katat ni mu machuku ma kurutu.

In Kwilej Abatishinau Ayukil Nich Rukat ra Ukadivar

7-9. (a) Kashinsh ik kayinkishinay Yesu atu awonsu ashila yom yawonsu ni kumulondul? (b) Kwisu kukan kwa Yesu kudia mu Marko 10:29, 30 kwashikena kal?

⁷ Kambuy Pita wamuleja Yesu anch: “Tal kwa, etu twashil kal yom yawonsu, twakulondula ey, ov, yom ik yitukeza kikal nich?” (Mat. 19:27) Pita wasota kwijik chikutwisha kumushiken ni kuyishiken in kwilej akwau a Yesu mu machuku ma kurutu. Chakwel kwipan ayinau ni muchim wawonsu mulong wa kulejan rusangu ra Want, asala usu wa kwipan nakash. (Mat. 4:18-22) Ov, kashinsh ik kayinkishay Yesu?

⁸ Kulondulijan nich rusangu ra chilik chimwing ra Marko, Yesu walejana anch in kwilej end akez kikal mu dijuk dia akadivar a muspiritu walonda anch: “Muntu ukutwish kusha chikumbu chend, ap anamakwend amakundj ni amband, ap makwend, ap tatukwend, ap anend, ap yir yend mulong wa kwingambat am, ap mulong wa kwambat Rusangu Ruwamp, anch muntu wasal mwamu ukez katambul yikumbu, ni anamakwend amakundj ni amband, ni amakwend, ni anend, ni yir yend tupamp chitot nich kuzengol. Chad kurutu ukez katambul mwom wa chikupu.” (Mar. 10:29, 30) In Kristu a pa chitot cha kusambish, mud Lidi, Akila, Prisil, ni Gaus, adinga pakach pa antu adinga ni kupan “yikumbu” ni ikala ‘akadivar nau, anambaz au ni amakwau’ ambay akaritiy, mud mwakanay Yesu.—Mid. 16:14, 15; 18:2-4; 3 Yoh. 1, 5-8.

⁹ Yalonday Yesu yikat kushiken mu mutapu ujim nlel. Mu “Jingand” in kwilej end avud, pamwing ni amishoner, yid ya dijuku dia Betel, in kusal mudimu a mu mangand, ni akwau, alikin cha kwikatil midimu yau chakwel kutwal kurutu maswir ma Want mu mangand kushalijan. Akadivar avud ni anambaz ashil yikumbu yau chakwel kupipej mwom wau, ni chitwovishin musangar pa kutesh yilondilau ayinau yimekeshina mutapu uyilaminau kudi Yehova ni mutapu mudimu wau wa Yehova uyinkishin musangar. (Mid. 20:35) chikwau, atushalapol a Yehova awonsu abatishinau kal akutwish kutambul chiyukish cha ‘kukimb bil Want wa Nzamb ni yom yisotilay’ mudi chikunku cha ukadivar wa pa mangand mawonsu.—Mat. 6:33.

Kushakam “Mwin Ndond ya Kujingamin”

10, 11. Ov, mwisu “mwi ndond ya kujingamin yend Ndiy Udia Piur,” ni mutapu ik tukutwisha kwandamamu?

¹⁰ Kwipan ni dibatish yiletin chiyukish chikwau chijim—dilau dia kushakam “mwi ndond ya kujingamin yend Ndiy Udia Piur.” (Tang Kuseng 91:1.) Yiney yidi ndond ya chijingidij ya dipat ni ya diking, mwikadil wa kwikoj ku yom yikutwisha kuyipish mwom wa muspiritu. Yidi “ndond ya kujingamin” mulong yijikenap kud antu aburedina kuman kwa muspiritu ni akad kumuchingejin Nzamb. Anch twashakan kulondulijan nich kwipan kwetu ni anch twikal ni kashinsh kawonsu mudiay Yehova, chawiy lel tukez kamulej anch: “Dipat diam ni kwikang kwam, Nzamb wam, mwawiy munikungamedina.” (Kus. 91:2) Yehova wikadil kal ndond yetu ya kushakam ya diking. (Kus. 91:9) Ov, ndond ik yikwau ya kushakam ya diking yipandakanamu Yehova?

¹¹ Kwandam mwi “mwi ndond ya kujingamin” ya Yehova kurumburikin kand atuyukisha kal nich kwitapil dilau dia kwikal wa muntu ipend ni ndiy. Chinech chisambishing nich kwipan ni ubatish. Kupwa, tukat kutung urund wetu ni Yehova kusutil ku kumushejin piswimp mu kwilej Bibil, Malembil makin, and kuziyil rawonsu. (Yak. 4:8) Kwikil muntu wikalap kal piswimp ni Yehova mudi Yesu, kadingap ni kwidjidjek piur pa kuchingejin kwend mudiay Sakatang. (Yoh. 8:29) Chawiy lel, kangal kwidjidjek piur pa Yehova ap piur pa rusot rend ni ukaliweny wend wa kutukwash kuwanish kushilamu kwa kwipan kwetu. (Mul. 5:4) Yakudia ya mu spiritu yiyinkishinay Nzamb antu end udi uman wa kashinsh umekeshina anch chakin kamu utukatin ni usotil tutwisha ku musadil.

Kwatany Nich Usey Paradis Wetu wa Muspiritu

12, 13. (a) Paradis wa muspiritu chom ik? (b) Mutapu ik tukutwisha kuyikwash antu asu?

¹² Kwipan ni dibatish kwanzuril kand njil yetwetu kushakam mu paradis wa mu spiritu uyukishinau. Yidi ndond ya pakamwil ya muspiritu yakwikal pamwing ni ambay netu aka ritiy, akweta chisambu ni Nzamb ni muntu ni mukwau. (Kus. 29:11; Isay 54:13) Kwikil chom ap chimwing mu mangand chikutwisha chakin kamu kwisikan nich paradis wetu wa muspiritu. Chinech chimekening kamu pakampwil ku chitentam cha mangand mawonsu, kukatau akadivar netu ni anambaz adiokila mu jingand jivu, jindim jivud, ni michid kwikal pamwing mu mwikadil wa chisambu, uumwing, ni wa rukat ra ukadivar.

¹³ Paradish wa muspiritu utusangaredina ushalijandin nakash nich mikadil yiyimp ya mu mangand nlel. (Tang Isay 65:13, 14.) Mu kulejan rusangu ra Want, tukwet chisend cha kuyinkish antu akwau diladikij dia kwandam mu paradis wa muspiritu. Chidi kand chiyukish kuyikwash antu ibombina katat ku chikumangen ni akutwisha kutambul ukwash wa kwilej mudimu. Nich umutakel wa amakurump, tukutwish kwikal ayikishinau nich chisend cha kuyikwash antu asu, mudi mutapu Akila ni Prisil “amurumburil[a] kand nawamp [Apolo] yom yikwau ya rusot ra Nzamb.”—Mid. 18:24-26.

Dandamen Kwilejin Kudiay Yesu

14, 15. Mayingishil ik tukweta chakwel tudandamena kwilej piur pa Yesu?

¹⁴ Tukwet mayingish makin ma kudandamen kwilejin kudiay Yesu. Mu mwom wend kurutu ikala muntu, Yesu wasala mudimu mivu tunan ni tunan kuvul pamwing ni Tatukwend. (Jinsw. 8:22, 30) Wading wij anch njil ya mwom upadakena kuwap jimedin pa kumusadil Nzamb ni kupalangesh uman wa uyakin. (Yoh. 18:37) Kudi Yesu chading chimeken patok anch njil yikwau yin yawonsu yikwikal kwau ya kwisotil ni ni makasu. Wading wij anch akumupak nakash ni kumujip. (Mat. 20:18, 19; Heb. 4:15) Chidia chilikej chetu, utufundishin mutapu tukutwisha kushinshaman.

¹⁵ Machuku makemp kupwa kwa kuvumbuk kwa Yesu, Satan wamupaka chakwel adiokala mwinjil ya mwom upandakena kuwap—pakwez wakanganya. (Mat. 4:1-11) Chinech chitulejin anch chikalap nchik chikusalay Satan, tukutwish kushal ashinshamena. Utadishin nakash mes mend padiau awiy adia piswimp ni kutambul dibatish nich kand antu asu atambwila dibatish. (1 Pita 5:8) Yidi ya dijuku dietu yikutwish kutupompat mulong wa kuburen kwijik. Chawiy lel, kupakiu mudi kwinoku kutwinkishin mitapu ya kumekesh ngikadil yiwamp ya Ukristu mudi kalimish ni nkeu, chisu twakwila kuyipul ni chisu tupanina uman. (1 Pita 3:15) Ngikadil yiney yikutwish kand kwikal nich chibudikin chiwamp pa antu atuteshina.—1 Tim. 4:16.

Lamat Kwinjil ya Mwom Upandakena Kuwap!

16, 17. (a) Yom ik yisatu ya usey yitinau mulong wa mwom yidia mu Kuvurik Yijil 30:19, 20? (b) Mupapu ik wakasikeshinau Yesu, Yohan, ni Paul pa yom wafunday Moses?

¹⁶ Mivu 1,500 kurutu Yesu eza pa divu, Moses wayikasikesha in Isarel kutond njil ya mwom upadankena kuwap pichitwishikina. Walonda anch: “Natazuk kal diur ni divu kwikal atuman kudi en ilel unou, nakutekinany kal diur ni divu kwikal atuman kudi en ilel unou, nakutekinany kal mwom ap rufu, chiyukish ap riyind. Tondany mwom chakwel en ni a majuku men makeza kez, wez upandany, mu kumukat [Yehova] Nzamb wen, mu kuziyil dizu diend, kulamatil kudi ndiy.” (Kuv. 30:19, 20) Isarel wamekana kwikal wakad kushinshaman kudi Nzamb, pakwez yom yitinau ya usey mulong wa mwom yijimbwilau kudi Moses yikarumukinap bwat. Ayichirikina kud Yesu ni in kwilej end.

¹⁷ Chakusambish, ‘tufanyidin kumukat Yehova Nzamb wetu.’ Tumekeshin anch tumukatin Nzamb kusutil ku kusal kulondulijan ni jinjil jend jitentamina. (Mat. 22:37) Chakad, ‘tufanyidin kumutesh Yehova’ kusutil ku kwilej Dizu dia Nzamb ni kuziyil ku yijil yend. (1 Yoh. 5:3) Chinech chitwitin kukumangan pakad kujing ku yikumangen ya Ukristu, kwambambidinau piur pa Bibil. (Heb. 10:23-25) Chakasatu, ‘tufanyidin kumulamat Yehova.’ Yikalap nchik milong tufanyidina kurish nich, twiyijidishany chisu chawonsu ritiy mudia Nzamb ni tumulondulany Mwanend.—2 Kor. 4:16-18.

18. (a) Mutapu ik urumburilau piur pa uyakin mu Chinong cha Kalam cha mu muvu wa 1914? (b) Mutapu ik tufanyidina kwiyov piur pa chitokish cha uyakin nlel?

¹⁸ Chidi chiyukish mud ik cha kushakam kulondulijan nich uyakin wa Bibil! Mu muvu wa 1914, afunda mu Chinong cha Kalam mazu minam ma usey anch: “Ov, kitudiap ayikishinau, antu a Musangar? Ov, Nzamb wetu kadiap ushinshamena? Anch muntu ap wisu wij chom ap chisu chiwapina, mulika achisenda. Anch umwing pakach pen waman chom ap chisu chiwamp, tuchigejin anch ukutulejamu. Kandikal tumanap yom yiwamp mudi yitutanina mu Dizu dia Nzamb. . . . Chitwishikinap kurumburil piur pa chisambu, musangar ni chiyukish yituletidina ronganyin ra patok ra Nzamb wakin mu muchim ni mu mwom wetu. Rusang piur pa Manang ma Nzamb, Kutentam, Dikang ni Rukat yisangareshin yawonsu maswir metu yitongijok yetu ni yovil yetu ya muchim. Tukwetap kuswir kwa kusot yom yikwau. Tukwetap kuswir kwa chom chikwau kupandakanamu kupam mu ronganyin ra Nzamb wetu.” (Chinong cha Kalam cha, Kachirikin 15, 1914 mu Inglish, paj wa 377-378) Kujikitish kwetu mulong wa chitokish cha muspiritu ni uyakin kudi kwa rawonsu. Chakin kamu, tukwet katat diyingishil dijim dia kusangar anch “twendil . . . mu kutok kwa [Yehova].”—Isay 2:5; Kus. 43:3; Jinsw. 4:18.

19. Mulong wak awanishina yitinau mulong wa dibatish afanyidin kukwat rizau winer pakad kulab?

¹⁹ Anch usotil “kwendil mu chitok cha Yehova” chad kandikal wikal mwin Kristu wipanina, ubatishinau, kangal walab. Sala yawonsu yifanyidina chakwel kuwanish yitinay Bibil mulong wa ubatish—yawiy njil yimwing kusu ya kupan kujikitish mulong wa yom yatusadilay Nzamb ni Yesu. Kumwinkish Yehova chom cha usey ujim ku mujimbu wey—mwom wey. Lejan anch ukwatin mupak wa kusal rusot ra Nzamb kusutil ku kumulondul Mwanend. (2 Kor. 5:14, 15) Pakad kwidjidjek, yawiy njil ya mwom upadakena kuwap!

Ukwakul Nchik?

• Mulong wak chidi cha usey kwilejin kudiay Yesu?

• Ubatish wetu urumburikin ik?

• Yiyukish ik yidiokila ku kwipan kudi Nzamb ni Ubatish?

• Chom ik chikutukwasha kulamat mwijil ya mwom upandakena kuwap?

[Chipich chidia pa paj wa 29]

Dibatish dietu dilejen anch utondin njil ya mwom upandakena kuwap

[Yipich yidia pa paj wa 31]

Ov, ushakamin “mwi ndond ya kujingamin”?