Kasikeshinany Chitongijok cha Mifund Piur pa Chidil—Chikunku cha 1
1. Rufu ritukwatin etu awonsu mutapu ik, ni yikokujol ik yikata kuyitan Atuman a Yehova anch afish mukatish nau?
1 Mu rusangu rawonsu ra muntu, antu amananga mar makash ma rufu. Antu a Nzamb kamiyepinap. Mudi Yesu, in Kristu akin oviling runeng ni ushon ukash anch murund wa piswimp ap mwanamaku wafa. (Yoh. 11:33, 35) Chiding chikash kujijamen rufu ra mukatish netu, chawiy tufanyidin tuyongoja ni kuyikwash afishina nich rukat. Pakampwil mu mal mulaminingau yishankur ni kwov wom wa afu nakash mu mwom wa pichuku pichuku. Mu jindond mud jinej, mwin Kristu ufishina akutwish amushindin kudi anamakwend akad kwikal in kwitiyij ni amutej nend chakwel asala yishankur ya chidil yakad kukwatijan nich mifund. Ov, mutapu ik tukurisha nich ushon wa rufu pakad kwandam mu yisal ni yishankur ya chidil yikisinay Nzamb?
2. Afu adi mu mwikadil ik, ni chom ik chisotinay Bibil palondilay anch: “Afu kijap chom”?
2 Kujingunin Uyakin Piur pa Rufu: Bibil ulondin anch: “Antu aom ij anch, kwisudiel tukez kafa, pakwez antu afu kijap chom . . . Rukat rau, ni kukis kwau, ni maku mau, yawonsu yafil kal nau pamwing . . . mulong ku rufu kuukuya kwikiling midimu, ap yitongijok, ap ronganyin, ap manangu.” (Mul. 9:5, 6, 10; Kus. 146:4) Anch muntu wafa, kijap kand kwend chom. Kakwovap kand chom, kakwambambap kand, ni kakuteshap kand yilondilau ap yisadilau antu akwau. Kudi in Kristu akin, winou udi uyakin ujim wa mu Bibil ukweta usu pa manangu metu ni mwikadil wetu anch twafish.
3. a) Kwisu kwadiokala malejan malondila anch aspiritu a afu akwet usu mu mwom wa antu aom? b) Rome 12:9 uyikwashin nchik antu a Yehova kwikal nich chitongijok chiwamp piur pa malejan minam ma apagan?
3 Babelany Malejan ma Makasu Piur pa Nzamb: Yehova wayileja Adam ni Eve patok, mu chir cha Eden anch, “chakin ukez kufa” anch alik kuziyil ku chijil Chiend. (Dis. 2:17) Pakwez, Satan, wayileja anch chakin “kiukufanyap” anch wamubwambwilany Nzamb. (Dis. 3:4) Kupwa, Satan walonda makasu makwau anch: Afu kafilap pakwez ij ni adi aom mwingand ya muspiritu. Makasu minam mamutwambidinau Yehova mawiy makata kusadish dijin diend. Kudi in kumwifukwil Yehova, malejan malondila anch afu ij yom ni anch akwet usu padi aom madi malejan ma makasu ma chamwamu. Madi chom chijim chikatay kusadil Satan mulong wa kuyidimb nich antu ni mulong wa kujimbangesh uyakin wa Bibil. Antu awonsu amukatila Nzamb afanyidin kumakis malejan minam! (Rome 12:9) Ov, umakisining?
4. a) Mutapu ik utukwashinay Kuvurik Yijil 18:9-13 kutesh yitongijok ya Yehova piur ya yishankur yijondila? b) Kukwatijan ni 2 Korint 6:15-17, mutapu ik ufanyidinau kusal in Kristu awonsu pantaliken nich yaku ni yishankur yikwatina ku malejan malondila anch afu adikwaku ni akwet usu wa kuyisal chom antu aom?
4 Yehova wayinkisha in Isarel mbil ya kwipuk yaku yin yawonsu yadinga yikwatina ku malejan minam ma makasu. (Kuv. 18:9-13) In Kristu adingaku mu mivu chitot ya kusambish niyawiy ipuka yaku yawonsu yadinga yikwatina ku malejan minam. (2 Kor. 6:15-17; Kubur. 21:8) Ilel, Atuman a Yehova niyawiy, chikalap nchik ulombu wa chikit chau, kabil kau, ap mutapu wayililau, ipukining yaku yawonsu yikwatina mwi njil yimwing ap yikwau ku malejan malondila anch afu ij yom ni akwet usu padiau antu aom.
5. a) Mifund yitulejin ik pa mulong wa yishankur yitadina rufu? (Isikej Yohan 19:40; In Levi 21:5 ni Kuvurik Yijil 14:1, 2.) b) Mudi mulondila Hebereu 5:14, chom ik tufanyidina kusal chakwel tudjibwila kwa yishankur yijondila yitadina rufu?
5 Kutongijokin pa Yishankur: Mifund yilejen anch yishankur yawonsu ya chidil kiyikwatinap ku malejan minam ma makasu. Chilakej, mujimbu wa Yesu, ‘auvungina mu maswin ma linen, mudi mudia chaku chikata kujikau nich Ayuda.’ (Yoh. 19:40) Pakwez, antu a Nzamb alika yaku yikwau yadinga yikwatina ku malejan malondila anch afu ij yom. (Lev. 21:5; 19:27, 28; Kuv. 14:1, 2) Antu awonsu adia mu mangand ilel, yishankur ni yisal yivud yikwatina kapamp kamwing ap mwi njil yikwau ku malejan minam. Chaku cha munomu mu Congo ni chawiy chidi chilik chimwing. Chidi cha usey mudi ik kudi etu chakwel tufumba ‘manangu metu mulong wa kujingunin kuwap ni kuyip.’ (Heb. 5:14) Chawiy chikututwishisha kujingunin yaku ik yikwatijadina nich uyakin udia mu Bibil ni yakad kukwatijan nich. Yijidik ik yidia mu Bibil yikutwisha kututakel pa mulong winou?
6. a) Kukwatijan ni 2 Korint 6:14-17, mupak ik ukash utufanyidina kukwat, ni yipul ik tufanyidina twiyipul? b) Kukwatijan ni Ankalansambu 2:12, chom ik tukusala anch twiyandjik mu chishankur chakad kukwatijan nich Mifund?
6 Sadilany Yijidik: Antu asotila anch Nzamb ayitiyija kakatap kubombakan mu mutapu uyimp ni antu akad kwitiyij. Atulejin mu Bibil anch: “Diokalany mukach mwau, aurikany kudi awiy, mwamu mulondilay [Yehova, NW], kangal wapukunany ku chom chijondila.” (2 Kor. 6:14, 17) Nich chijidik chinech mu manangu, tufanyidin twiyipula ayinetu anch, ‘Ov, ku chaku chinech piur pa chitil chikwatin ap pakemp ku malejan malondila anch aspiritu a afu akwet usu padi antu aom?’ Kukwatijan kwinoku kukutwish kwachikadish chaku chinech chom chindjing kupandakanamu pa kwikal chidil kusu. Chikutwish chikal chisal cha difukwil dia makasu. Chisal chinech chikutwish chamwovish Yehova ku muchim fuu, Nzamb wa uyakin ukutwish wachikis.—Isikej Ankalansambu 2:12, NW.
7. a) Chijidik ik chijim chidia mu 1 Korint 10:32 chikutwisha kutukwash? b) Luka 11:52 ni Mateu 18:6 atulejin ik piur pa yovilingay Yehova anch twamupwakesh muntu kanang?
7 Chijidik cha kaad chidi mu 1 Korint 10:32: “Kangal wasalany yom ya kupwakesh nich akwen, ap kudi Muyuda, ap Mugrek, ap kudi wa chikumbu cha Nzamb.” Mutapu ik ufanyidina kusadil chijidik chinech? Atuman a Yehova ijiken nawamp mulong wa kulejan kwau uyakin udia mu Bibil anch afu kijap chom ap chimwing ni kakutwishap ayikwash ap kuyisal nayimp antu aom. chom ik chikutwisha kusadik, anch chid cha chikumangen chasal chaku cha chidil chimekeshina wom wa afu? Kwiyandjik kwend mu chaku chinech kukutwish kwayipwakesh antu ija yitiyij ya Atuman a Yehova ni yilejeningau piur pa afu. Yehova woviling ushon anch wayiman antu ipwakal ni kukutwish kwayikangesh antu kutesh uruu wa Want.—Mat. 18:6; Luka 11:52.
8. a) Tushalijadin pak ni antu a mangand? (Tang ni kurumburul Filipoi 2:15.) b) Kumukat kwetu Yehova kukwet usu ik pa mipak yetu?
8 Kisany Yom Yiyimp: Pasadilingau antu akad ritiy yaku yiney, kijingap anch iyandjikin mu difukwil dia makasu. Ni chisu ni chisu kateshiningap kwau kurumburik mulong wak tulikininga kwiyandjik mu yishankur yiney yijondila. Chawiy lel, chiswapelingap kukwat mupak pa mulong winou, ni kukutwish kwatek mu choziu rukat retu ni kushinshaman kwetu kudi Yehova. Pakwez, tusotil twikal “akad milong, atokila, . . . akad ulim.” (Filip. 2:15) Kumukat kwetu Yehova kutubachikining ‘tulika yiyimp; tulamata ku yiwamp.’ (Rome 12:9) Twij nawamp anch chidi chiyimp, ap chidi cha rubabek, kudi etu kusal chisal ap chisu chikwatina ku malejan malondila anch afu ij yom ni akwet usu padi antu adia aom. Kulondulijan nich yijidik yiney, el tushinshikinany yaku yimwing ya chidil yisadikininga mwi ngand yetu.
Yaku yisadilingau Kurutu kwa Kujikan
9. a) Yishankuru ik yisadidiningau powishinau mujimbu ni kuurijek kurutu kwa kuujik? b) Mulong wak antu amwing asadiling mwamu?
9 Kuurijek Mujimbu: Chitwishikining kwowish chital kurutu kwa kuchijik mulong wa kwinang. (Mid. 9:37) Pakwez, kufanyidinap kwasadik chishankur chakad kukwatijan nich mifund piur pa kumurijek mufu mulong wa mwom ‘wa mu mangand ma kaad.’ Pakatau antu ovilinga wom wa afu kurijek chital, akutwish amunishaku maar, kumutit nzal ni kumukil nswich mulong wa kwez kumujik kapamp ka kaad. Kuding kusadil mem ni mayij ma pakampwil mulong wa kwowish nich mujimbu. Chitwishikin anch ajindjikina mu masun ap mu mushet wa mufu. Antu itiyijining anch yom yiney yawonsu yidi ya usey anch usotilany ang mufu aya nawamp djat ni kudi angak.
10. a) Anch muntu ufila wadinga Kaman, mulong wak kichidiap cha manangu kuyilik anamakwend akad kumusadil Yehova arijeka mujimbu wend? b) Tukusal ik anch anamakwend akad kwikal Atuman ausend mujimbu chakwel akasala yishankuru kurutu kwa kuujik?
10 Ku michid yimwing chiding chaku anch yid yimwing ya mu dijuku dijim akwatikana mulong wa kuujik mujimbu. Anch muntu ufila wadinga mwin kwitiyij, chifanyidin kudimuk nakash chakwel kushinshikin anch anamakwend akad kwitiyij kangal asenda chisend cha kuurijek mujimbu ni kangal asala yishankur yau ya upagan ap mu ujindj. Chakin kamu anch mukadivar ap nambaz netu ufila ang wadi mwom ing amwinend kakukatishap ap pakemp yom mudi yiney. Yid ya chikumangen yifanyidin kusal chakwel kuyovikesh nawamp anamakwend chakwel alika kusal chom ap chimwing chelangay kukis mufu padingay uchidi mwom. Chad anch, anamakwend akad kwitiyij alik kutesh ni asot kusend chital ku usu chikalap nchik usu wawonsu utwasala kal, tufanyidin twilama ayinetu chakwel kangal twiyandjika mu yisal yakad kwikal ya Ukristu. Ni tukutwish twikal nich usu wa kwijik anch antu akad kwitiyij kakwetap usu pa ruchingej ra mwom ra mukatish netu. Mukadivar ap nambaz wafil ushinshamena ku mes kwa Yehova.
11. a) Mulong wak kitufanyidinap kumunyinyit mwin Kristu anch walik kutek chital pol? b) Anch atek chital pol, mutapu ik ufanyidinau kusal?
11 Kutek Chital Pol Achimanaa: Kuchitek chital pol ap bwat chakwel antu achimana, winou udi mupak wa muntu ni muntu. Anch dijuku dia in Kristu diakwat mupak wa kusadil chaku chinech kangal muntu ap umwing ukuyinyinyita, mulong udi mupak wau ayinau. Anch mupak wau udi wa kubudish chital pol chakwel achimana, chifanyidin kubabal chakwel kushinshikin mutapu ufanyidina kuchisal mu mutapu wa kwikepish ni kulimish yitiyij ya Ukristu.
12. a) Yishankur ik yisadiningau antu akad kwijik uyakin kurutu kwa kujikan? b) Mulong wak kichidiap chiwamp in Kristu akin kulondul yisalijok yiney?
12 Mu jindond jimwing, kudi chaku cha kudiosh chital mu mushet ni kuchiladik pa ulal umwing utenchikinau nawamp. Anch mband ufila akutwish amudjik nkandj mutok udjadilingau ayangadim anch ayat ni akumudjik usang uvud ni yileng yikwau. Chikadil kal chaku cha kufatul chifatul cha muntu ufila pa masumish, pa yikunku ya maswin ya kwikusul nich masuril, pa yom ya kulamin anfungul, yom ya kusengan nich, makopu, ni yom yikwau. Yom yiney akat kuyisal ni kuyangenay in kudil ayidjala ap ayilama ku makas kwi ndond kudia chidil. Akutwish alamik ku yidjal ya antu adiap tuyipich tukemp-tukemp. Ov, chidi cha manangu kusal yisal yiney ya mangand? Bwat. Chikwau, kusal mwamu kudi kumwifukwil mufu.
13. a) Chijidik ik chikwau cha Bibil chitukasikeshina kushal kulemp ni yishankur ya mangand? (Tang ni rumburil 1 Yohan 2:15, 16.) b) Kusal yishankur yiney kukwikal ni chibudikin ik pa dijin dia Yehova ni padia antu end? (Tang ni rumburil Efes 5:10, 11, 15, 16.)
13 Ap anch Bibil kalondilap kachom kamwing ni kamwing katadila milong ya chidil, antu adia mu chitokish cha muspiritu ij anch kwibaz kwa yom kwa mutapu winou ‘kudiokilap kudi Nzamb, pakwez kudi kwa mangand.’ (1 Yoh. 2:15, 16) Kusal yisal yiney kukutwish kwayishikij swa antu akad ritiy ku kusal yisal yiyimp, mudi kutoy kudil kwakad kulik, kumusamun mufu nfalang ap yom yikwau, kubwikat chital ni kwisamb nich mudi anch muntu udi mwom. Anch yom yiney yasadik ku chidil cha mwin Kristu, chikulet ntumb yiyimp pa dijin dia Yehova ni padi antwend. Chakin kamu, kwikal palemp nich yaku yisadilingau chisu ni chisu antu adia mu mididim ya muspiritu yidi njil yimwing yiwamp ya kulam mwikadil wa zoong wa kalimish, wa kwikepish, ni uyifanyidina in Kristu akin.—Efes 5:15-17.
14. a) Ntand chom ik? b) Chisu ik chifanyidina kulet chital ku chikumbu? c) Yom ik yisadiningau antu pa ntand ni mulong wak utonginingau anch chifanydin kusal mwamu? d) Mulong wak ufanyidinau in Kristu akin kwikal kulemp ni ntand?
14 Kulal pa Ntand: Ntand yidi kukumangan kwa antu ku chikumbu cha mufu ap kwi ndond yindjing uchuku wawonsu pakad kulal mulong wa kulam chital chakad kujik. Chisu chivud ntand yisambishin urel ni kuya kamu mu uchuku wawonsu. Chaku chinech kangal wachifanikeshany nich kuya kuyendil antu afishang pa chisu kanang mulong wa kuyongoj ni kuyifishaku. Kulal pa ntand kudi chom chindjing. Chisu chivud, dichuku dia kurutu kwa kumujik, akuchilet chital ku chikumbu. Antu akukumangan ni akuwang uchuku wawonsu wangee, kulembil, ni kumutumbish mufu. Yom yiney ayisadiling anch mulong wa kulam chital ni kuchidij dijuku ku aspiritu ayimp. Mudi chimekena patok anch chaku chinech chikwatin ku malejan masotila anch spiritu wa muntu wafang udi mwom, in Kristu akin adimukining pantaliken nich yishankur yiney yakad kukwatijan nich mifund ya kwal ntand. Kwal ntand, ap mu kachisu kakemp kusu, ku kukukwatijanap nich mupak wetu wa ‘kulik yiyimp.’—Rom. 12:9.
15. a) Yom ik yisadilingau Atuman amwing anch mbay nau wafa? b) Chikutwish chalet chitongijok ik? c) Mutapu ik tukutwisha kusadin yijidik yidia mu 2 Korint 6:17 ni mu Malakiy 3:18?
15 Anch chid cha chikumangen chafa, tufanyidin twadimuk chakwel kangal antu akwau amana anch tusadil ntand ya mutapu windjing etu ayinetu. Chilakej, chom ik chifanyidina kumekan, anch Atuman akumangen awonsu kudia chital pa uchuku wa kurutu kwa kumujik ni kusutish chisu chilemp mulong wa kuwang ni kulembil? Ap anch akwet yitongijok yiwamp, afanyidin nich kudimuk kutongin pa kom ka antu akwau. (1 Kor. 10:23) Ov, kushakam mudi kwinoku chisu chilemp uchuku kukutwish kwayipwakesh ambay netu akaritiy, ija musul ni rutong ra yishankur ya kwal ntand? Ov, chakin kamu, antu akad ritiy akutwish ashiken ku kulond anch, Atuman a Yehova, adi mudi marelijon makwau makata kwal ntand ya mutapu wau ayinau? Chakin kamu, kudi yisu yikwau yivud ya kulejen uman ni kuyongoj antu afishina. Kutongijokin pa yijidik yiney kukutwish kwatushikij ku kwiyep kusal chom ap chimwing chikutwisha kwikal mudi chinshakur cha kwal ntand. Kusalang mwamu kukumekesh anch tushalijadin nich mangand ni twakwatin kal mupak chakwel twiyaurila ayinetu ku “chom chijondila.”—2 Kor. 6:17; Mal. 3:18.
16. a) Mufund ik tufanyidina kuvurik pachisu cha kusot kujikan? b) Milong ik yidingaku chisu ni chisu anch wasambelany kulet chital ku chikumbu dichuku dimwing kurutu kwa kuchijik? c) chom ik chitwishikina kusal anch kwikal kurijek ni kwovijan kuwamp?
16 Dibabesh dined didi dia manangu nakash: “Muntu wa manangu anch waman yom yikash, ukat kwijindjik, pakwez antu amwamu akat kuya kurutu ni kwimesh mar.” (Jinsw. 22:3) Chijidik chinech chidia mu Bibil chidi chakin kamu pantaliken nich kwal ntand. Uman ulejen anch kulet chital ku chikumbu kurutu kwa dichuku dia kuchijik kuletining milong. Milong yikat kwiwejinaku nakash anch chital achitwal ku chikumbu cha mwanamakwend wakad kwitiyij wa mu dijuku diau. Mulong mujimbu udiap, anamakwend ni amutej nend akwiyov anch ayingin kwez kukumangan chakwel awanga ni alembil uchuku wawonsu mulong wa kuulam mujimbu. Ntand ya mutapu winou yikutwish yadandamen chisu chawonsu mujimbu ukwikalaku. Chakwel kwipuk yom mudi yiney ku chidil cha mwin Kristu, dijuku dia in kwitiyij difanyidin kubangin nakash pa chisu chikezau kuulet mujimbu ku chikumbu chau ap kwindond yindjing. Anch chidi cha usey anch mujimbu auleta ku chikumbu chau, chikez kwikal cha “manangu” kusal mwamu ching pa dichuku din kamu dia kuujik pa ndond pa kuulet uchuku kurutu kwa kuujik. Chakin, kusal mwamu kukutwish kwikal kukash ni kwakad kufanyin pa yisu yimwing, pakwez anch kudi kutenchik kuwamp ni kwovijan, chitwishikin kusal mwamu. Tukutwish twiyep kuyipwakesh antu akwau anch twasal mwamu.—Jinsw. 22:3.
17. Chom ik tukeza kwilej mu Mudimu Wetu wa Want mu angond ezinaku?
17 Jinsangu jikwau ja usey jitadila pa mulong wa chidil akez kujisambin mu Mudimu Wetu wa Want mu angond ezinaku. Rusangu riner rikuyikwash antu in awonsu ijika anch chitudia in Kristu tufanyidin tulama kom kawamp ni twipuka kuyipwakesh antu akwau mudi mutudia nich chitongijok cha mifund piur pa yidil.—1 Kor. 10:32.
[Dizu didia Kwishin kwa paj]
a Dijin “ulal wa ufun” adisadidining chisu chivud mulong wa afu akweta ntumb: ant, ap antu akwau a ntumb. Yishankur yikatau kuyisadil pa chisu cha kuyijik yiding yivud ni chiding mulog wa kuyitumbish. Pakwez, kuyijik in Kristu kufanyidin kwikala kuswapela ni kwa kwikepish. Chom chinech chidi chakin, ap anch muntu wasadil mivu yivud, wijikana nakash ni ap anch wasala yom yijim. Pa chinech, kitukatap kusadil dijin “ulal wa ufun” pa chisu cha kuyijik in Kristu.
[Mutu wa mulong udia pa paj wa 4]
(Yilondwilaku pa p. 9)
[Mutu wa mulong udia pa paj wa 9]
Kasikeshinany Chitongijok cha Mifund Piur pa Chidil—Chikunku cha 1 (Yilondwilaku)