Kasikeshinany Chitongijok cha Mifund Piur pa Chidil​—⁠Chikunku cha 3

Chidil cha in Kristu? Chiswapel, Chikwet mimbu, ni Chilimishin

1. (a) Mulong wak antu akad ritiy asadiling yidil yijim ni yishimokishena? (b) Chom ik chisadilingau antu amwing chakwel antu avud eza ku chidil?

¹ Antu akad kwijik uyakin piur pa mwikadil wa afu itiyijining anch kusal yidil yijim ya kwimekesh uding mutapu wa kuyisangaresh antu afila chakwel alika kuyisal anamakwau adia aom nayimp. Kudi antu akad kwikal in kwitiyij, atongining anch kumekesh “kwibaz kwa yom” yadiay nich ni ndond ya nfalang yadiay nich muntu ufila ap dijuku diend yikweting kamu usey nakash. (1 Yoh. 2:16) Chawiy chikata kushikenang kumekesh mwikadil wa kubambil kusadil yom nayimp wakad kwikal wa win kristu, ukata kupandakeshau antu amwing kusal yidil chakwel ayisutamu akwau. Chakwel anch ashikena kuman antu avud, akat kupampol yipich ap kupamp yom yafundangau kal pa jindond kushalijan mulong wa kuyilej antu mutapu utenchikinau chidil. Antu amwing akat kusalang chidil mwi mbing jivud ap mwa angond avud chakwel apataku majikish mavud chakwel meza mayikwasha kusal ni kumwang chidil chipandakena kujimb. Akwatining kand nich usey nakash anch ap anch antu adia mu dijuku adi kwau atuzwendj akat kusal usu wa kusondam nfalang chakwel asala “chidil chijim” mulong wa kuyibaz kudi anamakwau ni antu a mu ul wau.

2. (a) Mutapu ik ushalijadina yidil ya in Kristu ni ya in mangand? (b) Kukwatijan nich Yohan 17:16 ni Jinswir 11:​2, ov, mulong wak chidi cha usey anch antu a Nzamb asala yidil yiswapela ni yikweta mimbu?

² Pakwez mu kushalijan, antu a Nzamb akweting kamu kutesh kuwamp piur pa mwikadil wa afu anch kijingap chom bwat ap anch akat kuyishiman ap kuyitumbish kudi akwau. In Kristu akin kakatap kusalang chidil chijim mulong wa kwimekesh kudi antu bwat. Anch twakimb anch twimburija yisalijok mudi yiney, ov, yitiyij yetu yikutwish kamu kushalijan ni ya in mangand? (Yoh. 17:16) Ov, mwamu antu akwau kakutwishap atuman anch komb niyetu tukwet wom wa afu? Mutapu twija anch kwovu wom wa afu yidi yaku yidinga mu michim ni mu mashakamin ma mwom wa antu avud chikutubachik kusadin nich kubabal ni manangu chakwel tutenchika chidil mu mutapu uswapela ni ukweta mimbu. (Jinsw. 11:⁠2) Mutapu ik tukutwisha kusal?

3. (a) Mitapu ik yimwing yisadidilingau antu amwing chakwel asanga nfalang ja yidil? (b) Mutapu ik uyimeningau antu a Yehova mitapu yiney?

³ Nfalang ja Chidil: Ku jindond jimwing, akumangening mulong wa kutenchik kuman nfalang ja chidil kurutu kwa kujikan. Akat kushikenang kutum mikand ku yikumangen yikwau mulong wakwit ukwash wa nfalang. Antu amwing atekining “mushet wa kutek nfalang ja kujikan nich” pakach pa akadivar chakwel atekamu nfalang ja chidil. Pachil pin, akat kukumangej kand ma tebur ni mishet chakwel antu adia pa chidil atekamu nfalang. Akat kwisambin nfalang jatanau kal ni kulejan antu ap uvud wa antu ajipana kal ni kulejan uvud wapatau kal. Akat kupan yakudia ni maar chisu chinicha mulong wa kuyikasikesh antu apanang nfalang nau akumangena. Ov, mutapu ik ufanyidinap kuman yisalijok mudi yiney? In Kristu akin kafanyidinap kwit ukwash wa nfalang ja chidil mu mutapu winou bwat.

4. (a) Nany ukweta chisend cha kubudish nfalang ja kusadil pa chidil? (Tal note) (b) Chad anch chakin kamu dijuku dikwetap, kwisu kukutanau ukwash? (Tal note) (c) Ubaj ik udiaku wa kutambul nfalang ja anamakwetu akad kwitiyij ni mutapu ik tukutwisha kusadil Jinswir 27:⁠12?

⁴ Dijuku dia win Kristu difanyidin kwijik anch dikwet chisend chau cha kufutin nfalang ja chidil.a Anch dijuku didi mu uzwendj ni anch ditwishinap kufutin chidil chikepishina, komb anamakwau a mudijuku awiy afanyidina kuyikwash.b (1 Tim. 5:3; Tal od p. 132, par. 1) Chad anch maswir machidandamedin, antu akwau ap chikumangen chikutwish chad kuyikwash. (1 Yoh. 3:​17, 18) Pachinech, chiswirikedin kand kubabal. Mulong anch ayit antu a mudijuku akad kwikal in kwitiyij kukwash nfalang ja chidil, akat kutongang anch akutwish kwikal chadi nich mbil ya kulond mutapu ufanyidina kusadik chidil ni kuchitakel. Kusal mwamu kukutwish kamu kulangwish milong yikash yakutenchik chidil pakad kusadin yisalijok yijondila. Chinech chovikeshinap anch mwin Kristu ufanyidin kulik yipan ya mwanamakwend bwat. Pakwez anch washinshikin anch kwitiyij chipan chinech chikumekan mudi kumwinkish muntu wakad kwikal mwin kwitiyij njil ya kutakel yom yimwing ya chidil, komb chipan chinach chifanyidin kuchilik nich manangu.​—⁠Jinsw. 27:⁠12.

5. (a) Tangany Efes 4:​17-19 ni Rome 12:⁠2. Yijidik yiney yitukwashin mutapu ik pa chisu cha kutenchik chidil? (b) Mu mutapu ik wamujikau Yesu ni chom chinech chikwet usu ik padi etu? (c) Tangany Luka 14:28 ni 2 Korint 8:12. Chakwel kwipuk kwit kusang nfalang, kukongal kudi antu akwau ni kwiyandjik mu mabaz, dijuku dia in Kristu difanyidin kusal chidil cha mutapu ik?

⁵ Kutesh kwetu kuwamp piur pa mwikadil wa afu kukutwish kwatwinkish usu wa kutakaman kutakel yidil yetu nawamp pakad kusadin kachom ata kamwing ka mangand kakatau kusadin antu awonsu akad kwikal nich ronganyin ra Bibil. (Efes 4:​17-19) Mutapu tusotila anch tulika kuyipwakesh akwetu mu kwiyandjikang mwi ntumb yipandakena, komb kangal tulika mangand matushindina kuyimburij antu adia mu mididim ya muspirit. (Rome 12:⁠2) Tufanyidin kuvurik anch Yesu wadinga muntu mujim wa yisu yawonsu; pakwez amujika kwend mu mutapu uwamp ni wa kwikepish. (Yoh. 19:​40-42) Mulong wa antu akweta “chitongijok cha Kristu,” akutwish niyau kusal chilik chimwing. (1 Kor. 2:​15, 16, MM) Pa chinech, komb anch tukimbin anch tulika kwit yipan, kusondamijan kudi akwetu, ni kwiyandjik mu mabaz, dijuku dia mwin Kristu difanyidin kutenchik nich manangu chidil chikepishina ni chikweta mimbu kukwatijan nich yom yikutwishau kupan.​—⁠Luka 14:28; Isikesh ni 2 Kor. 8:⁠12.

6. (a) Ov, mulong wak chiswirikenap kutum chijikish cha chidil mu yikumangen yikwau? (b) Ov, mulong wak kichifanyidinap kuswimp yisu ya yikumangan ya mudimu ni ya yikumangan ya chikumangen mulong wa chidil? Tangany ni rumburilany Mateu 6:​33, 34.

⁶ Kutakel Chidil: Jinsangu ja chidil jikat kwend mau mau, chisu chivud chikwetingap kand kwau ukwash wa kulejan chidil ni kutenchik mutapu ufanyidina kujikan ku chimet mu chikumangen chikwau mwakadiau antu afishang kal bwat. Chidingap kand kwau cha ukwash kutum mikand ku yikumangen yikwau mulong wa chom chinech bwat. Chimeken kamu anch, chifanyidinap kulik kusal ap kuswimp yikumangan ya chikumangen mulong wa milong ya chidil bwat. Mukupanang usey ku yom ya muspiritu, chikutwish kutukwash kulam chilik chiwamp cha kuman pa milong ya afu ni tukudandamen kutek kamu yisakin ya Want pa ndond yakusambish mu mwom yetu.​—⁠Mat. 6:​33, 34.

7. (a) Chom ik chifanyidina kusal anch kukwikal kusal diskur diengamidina pa Bibil pa chidil? (b) Mwin kulond kafanyidinap kusal chom ik pa chisu chisadilay diskur?

⁷ Anch amakurump a chikumangen itiy, chifanyidin kusal diskur dishindamedina pa Bibil mu Chot cha Want ap anch in dijuku akimbin diskur akutwish kudisadin ku chikumbu cha muntu wafang kal ap kwindond yikwau kand. Mwin kusal diskur ukutondau kudi dijuku diafishang kal ufanyidin chisu chawonsu kusadin diskur dia chidil diarijekau kal kudi dirijek dia Yehova. Diskur dia chidil difanyidin kwikal dia kwongojan, dia kukasikeshan, ni ditungena muspiritu. Mwin kulond ufanyididin kusadin yom yifundilau ni kafanyidinap kuwejamu kand yom ya yitiyij ya makasu. Chilakej, kulond anch rufu riner radiokalang ku musul kanang ap anch amujipang kudi akwau, kulond mwamu kushindamedinap pa uyakin wa Bibil ni kukutwish kwaletish kutun ukaliweny wa Yehova wa kuyiking atushalapol end. (Jinsw. 18:10) Mwin kulond ufanyidin kand kubabal nakash piur pa yom yikulonday mudiskur ap mu malembil makusalay chawel yom yiney kangal yimekesha mudi anch umulejin muntu wafang kal mudi udi mwom. (Mul. 9:​5, 10) Anch kashalapol ushinshamena wa Yehova wafa, mwin kusal diskur ufanyidin kulond mu wiswimp rusangu ra mwom wa muntu mutapu walaminay kutentam kwend. (Heb. 6:12) Kichidiap chiwamp, kuyilik antu atumbuka kwiur chisu chisadikina diskur chakwel apana uyaj ni ntumb kurutu kwa muntu wafang kal bwat, kurutu ap kupwa kwa program wa chidil.

8. (a) Akadivar amwing ikadil kal ni chaku ik, ni mulong wak chifanyidin kwiyepach? (b) Pa cha kutenchik mulong wa diskur dia chidil, mutapu ik ufanyidina kulimish chisu ni malembil? (c) Anch wasadilany ntakel, kafanyidinap kusal chom ik?

⁸ Chikadil kal mudi chaku kudi akadivar kukumanganang mu Chot cha Want dichuku din disadikina chidil dia chakwel awangang miminy ya Want mwa asaa avud kushik kamu ni pakusambisha ni pakupwila program wa dichuku. Anch miminy ya Want ayisadin mulong wa kusambish nich ni kupwish nich diskur dia chidil, yikutwish yamekan mudi kudi kuyimburij in Christendom mudi anch yisak ya akadivar yikat kuwang miminy chisu chilemp kurutu kwa diskur kusambish. Program wa kujikan usadikining kwend mwa aminit 30 ni ufanyidining kumusambish kurutu kwa saa. Kusambish program nich malembil kudi kurijek kwen ayinen. Chidiap kwau cha usey kutond mwin kutakel chakwel amulejana muntu ukusala diskur ni kusutirikamu kand mu wiswimp yalondau kal. Pakwez, anch atond mwin kutakel, chimeken anch ufanyidin arumburila mu wiswimp pa dinans dijim. Chidiap kwau chiwamp anch alonda yom yivud yalondau kal kudi mwin kusal diskur ap anch ayileja antu ateshakal “kubul nkash” bwat. Anch mujimbu aujik kal, akutwish kurumburilaku mu wiswimp ni kusal malembil kwi nzay mulong wa kupwish nich yom yiney, anch in dijuku achikatishin. Tuvurishin anch, antu akad kwikal in kwitiyij kafanyidinap kutakel ap kulondaku ap pakemp piur pa yom yisadikina mu Chot cha Want ap kwinzay.​—⁠2 Kor. 6:​14-18.

9. Chom ik chitukasikeshidinau kusal anch twaya kutesh diskur dia pa chidil?

⁹ Kwikal Nich Mwikadil Uwamp: Mwikadil ik utufanyidina kwikal nich chisu tudia ku chidil? Chisu chizwila michim yetu nich ushon, tukweting kamu kuswir kwa dikasikesh dia Mifund. Chawiy lel, komb antu awonsu akweza ku chidil afanyidin kuvurik kusend ma Bibil mau. Mulong kulondul kwetu pamwing ni muntu utangina ni mutapu urumburilay mutapu wa kusadin ma verse ukukasikesh ritiy retu mulong wa kushilamu kwa disanguk kudia kurutu oku chisu chikeza kapwa “rufu.” (Kubur. 21:⁠4) Niyetu komb tukwet mutapu uwamp ufanyidina kupan mazu ma kongoj ku diijuku diafishang kal ni kudi antu akwau adiap ezang kal kuyital. Anch twasadil mutapu winou, chikumekesh anch tuyongojinap ching kusu akwetu, pakwez chidi kand mulong wa ayinetu patukumangedina pa ruchingej ruwamp ra musangar ra machuku ma kurutu chisu chikuminyau rufu chikupu.​—⁠Isay 25:⁠8.

10. (a) Antu adia mu mididim ya muspiritu amekeshining kwinan kwau mutapu ik? (b) Mutapu ik usadilingau antu ovila kurumburik kwa yom ya muspiritu, ni mulong wak? Tangany ni rumburilany 1 Tesalonik 4:⁠13.

¹⁰ Antu avud atongining anch kumekesh ushon nakash kumekeshining ntumb, kalimish, ni rukat mulong wa muntu wafang kal. Yikat kumekan, chisu chikatau kusal diskur dia chidil, ap kwinzay, antu amwing akat kubarok kudil mu mutapu uyimp, kusambish kwilangumwon pansh, ap kusambish kuchilej chital cha muntu wafang kal mudi udi mwom. Amwing akat kukimbang kulam mujimbu, kumatok mushet ap kukimb kwandam mwinzay ya muntu wafang kal. Mulong rufu chiding kamu chisu chifanyidina kumekesh ushon kudi etu awonsu, komb antu a Nzamb kafanyidinap amekesha lel chad ushon wakad kufanyin bwat. Mulong wak? Mulong ‘kitusotilap kukangany kwijik kudi awiy alela kal tul.’ Tukwetap kanrumbangesh piur pa mwikadil wa afu bwat. Tukwet ruchingej rakin mu disanguk. (Yoh. 5:​28, 29) Tutanin dikasikesh ku kushilamu oku kulondila anch kangal “wikalany ni ushon, mudi mudia amwing kakwetap ruchingej.”​—⁠1 Tes. 4:⁠13.

Yishankur ya Kupwa kwa Kujikan

11. (a) Kupwa kwa kujikan, mutapu ik tukumekesha anch tukatin dijuku diafishang? (b) Kitufanyidinap kuchingejin kutambul chom ik pituyila kwendil dijuku difishina, ni mutapu ik tufanyidina kusadil Midimu 20:35 pa mulong winou?

¹¹ Ap anch mujimbu awujik, chidil chikat kamu kudandamen. Kwikiling kand chom chikwau chikutwishau kusal padiay muntu wafang kal. Kupwa kwa kujikan antu akat kuswirikenang kuya kutal dijuku dia antu afishang kal mulong wa kuyilangwish ni kuyijingish ni kuyikasikesh. Mu yisu mudi yiney, tukweting kamu mutapu ufanyidina kumekesh mwikadil wa kwikuchik neeng ni kutongin mutapu udia mwom wetu wiswimp ni kwijik anch ‘ komb dichuku dia kufa dipandakenamu dichuku dia kuvadik.’ (Mul. 7:⁠1) Chikutwishap chamekesh mwikadil wa ranaken anch twakimb kand kulej dijuku dia antu afishang kal anch atwinkisha yakudia, ni yakuna ni ap kand pandond ya kulal. Pakwez antu a Yehova ijing anch “chiyukish chijim kudi mwin kupan chamupandakan mwin kutambul.” (Mid. 20:35) Pachinech, komb chidi chiwamp, kutong mutapu tufanyidina kupan dikasikesh dia Mifund mu mutapu uwamp kudi antu afishang kal ni ukwash wa kumujimbu, pandond pa kutongin anch ing niyetu atwinka yakudia, maar, ni yom ya kwipuwangejaku nich. Anch twasadil mu mutapu winou nawamp komb tukutwishap twawej chisend pa dijuku dia antu afishang kal bwat, ni tukumekesh kamu rukat retu ra win Kristu ni kudimuk.​—⁠Gal. 6:⁠2.

12. (a) Chom ik chisadilingau antu akad kutesh yilondilay Bibil kupwa kwa kujikan? (b) Ov, mulong wak usadilingau antu misambu yiney, ni yitiyij ik yakad kwikal ya win Kristu yikwetau?

¹² Iyepany Kusalang Misambu Kupwa kwa Kujikan: Antu akad kwikal nich kutesh kuwamp kwa uyakin wa Bibil akat kusal yom swa mu mitapu kushalijan kupwa kwa kujikan. Akat kutenchikang chikumangan chijim pamwing nau anamakwau, amutej nau, ni antu akwau kand chakwel adia yakudia, ana maar, ni kuja maj ma mizik nich dizu piur. Antu avud akat kulondang kamu anch chawiy “lel chad chidil chin.” Yikumangan mudi yiney ayisadining pamwing nich kuna maar nakash, kudia kwa kwifund, kufufuk maj, ni yisal kand yikwau ya masandj. Mizik anch yayandam nakash, antu avud akat kushikenang kamu kwandam mu runtu chakwel afufuka maj ma musambu pakad kand kwijik antu afishang kal ap dijuku dikweta chidil. Amwing akat kutongin anch kumekesh misangar yiney kukat kukwashang kudiosh ushon wa rufu. Pakwez, in Kristu akin, afanyidin kubabal mulong wa misambu mudi yiney yisadikininga pa chidil yitiyijiningau antu avud mulong wa kuyitumbish afu ni ya kudutish spirit wa muntu wafang kal chakwel anch ayitana angakend.

13. (a) Mujikit winou usadilingau kupwa kwa kujikan udi nchik anch twawisikesh nich yom yashikena yilondilau mu Kubudik 32:​1-6? (b) Tangany Mulej 3:​1, 4. Ov, mulong wak antu a Nzamb kafanyidinap kusal mujikit mudi winou? (c) Kukwatijan ni Yohan 17:16 ni 1 Korint 10:​7, ov, mulong wak in Kristu akin iyepining kusal mwamu?

¹³ Antu avud akweting yitongijok anch, misambu yiney yiding mu yom ya yishankur yau. Komb, etu kitufanyidinap kukimb kusadin yaku ya yishankur mulong wa kwiyandjik mu yisal yakad ya win Kristu bwat. Chilakej, kuwang miminy ni kuja maj chadinga kamu nich ndond mu yaku ya an a Isarel. Pakwez chisu chabombakeshangau nich yisal yakad kumulimish Nzamb, yashikenanga kamu kuyipish urund wau nend Yehova. (Kub. 32:​1-6) Kufufuk maj ni misambu ya kwifund kudia yiding mutapu umwing pa yidil. Rufu ra mukatish netu kichawiyap chisu cha kumekesh masengan ap musangar bwat. (Mul. 3:​1, 4) Mifund yipanin chiyul cha manangu anch: “Ushon uwapil kupandakan masip, ap anch chifu chikwet ushon, ushon winou ukutwish kulet ronganyin mu muchim.” (Mul. 7:⁠3) Mulong misambu yikatau kusal kupwa kwa kujikan yibombakening pamwing nich yisal yijondila ni yitiyin aspiritu, komb in Kristu akin afanyidin kwiyep ku yitenchik yiney ap kulik kukumanganang ku yikumangan ya misambu yisadiningau mulong wa antu afiling. Anch twiyep kamu ku yishankur mudi yiney, tukumekesh kamu anch tukwetap chikunku mu “mangand” ni anch tumulimishin kamu Nzamb wa uyakin ni tulimishin kand kom ka akwetu.​—⁠Yoh. 17:16; 1 Kor. 10:⁠7.

14. (a) Misambu ik yisadilingau antu kupwa kwa kujikan, ni mulong wak uyisadilingau chisu ni chisu? (b) Yom yiney yirumburikin ik mu manangu ma antu akad kwitiyij?

¹⁴ Kujikan Kapamp ka Kaad ni Misambu ya Chidil: Kupwa kwa kujikan, antu amwing mu majuku akat kurijek mulong wa kusal kand “kumwang chidil.” Akwau niyau akat kurijek misambu ya chidil mulong wa kuyitumbish ni kuyivurik afu. Mu yisu yiney, akat kupan yakudia, ni kupan maar, ni kubul mizik, ni kupan kand majikish. Chisu chinech cha nsudiel chisadiningau yishankur yiney ya chidil chishalijadining nich yikata kusadik mu machuku 40, ap 80, ap mu machuku mavud, kupwa kwa kujikan. Antu avud amening kujikan kapamp ka kaad ni misambu ya chidil anch yikweting usey nakash mulong wa chidil, mulong akweting yitongijok anch spirit wa muntu wafang kal kakutwishap wadut ching kamu anch asal yishankur yiney ya chidil.

15. (a) Ov, mulong wak usadilingau antu amwing misambu kupwa kwa kujikan? (b) Yipul ik tufanyidina kwiyipul katat?

¹⁵ Kukumangan ap kutenchik chidil cha kukumangan mwi mbing ap mwa angond kupwa kwa kujikan kukutwish kwamekesh mudi mutapu wa kutambul ap kupan dikasikesh kudi antu afishina. Akat kuman anch kusal mwamu kuding kuyikwash antu aburedinaku chisu chajikenau chakwel chiyikwasha niyau kupan mashikish ni kumuladik muntu wafila. Akwau kand akat kusadin yikumangan yiney mulong wa kuyijikitish antu ashikina ku chidil ni atakedina chidil. Ov, tufanyidin kulond anch ap anch kwikil kwau yisalijok ya upagan ya yishankur, kurijek chikumangan mudi chinech kupwa kwa kujikan kudi chikumangen ap yidi ya dijuku, ov, chidi chiwamp?

16. (a) Ap anch chiyipinap kwendil dijuku difishina pa ayinetu, ov, in Kristu akin kafanyidinap kusal chom ik? (b) Kukwatijan nich 1 Korint 10:32; 2 Korint 6:​17, ni Kuseng 97:​10, ov, mulong wak tufanyidin twiyepa kutenchik ap kuya ku misambu ya kupwa kwa kujikan?

¹⁶ Kupwa kwa kujikan, antu akweta dijuku dia muntu wafang akat kukumangan swa swa ku ujindj mulong wakupampish nfalang jasadinau kal ni kulond kand milong yikwau piur pa rufu. Chikwau kand, amwing atongidining kupan yom kanang, yovil yau ya ushon, ni ukwash wa muspiritu kudi antu afishang kal kupwa kwa kujikan. Yom mudi yiney, akat kuyisalang ku ujindj chidingap kwau cha ukwash anch chikumangen chawonsu ing chijikang bwat. Chom ik chikutwisha kumekan anch dijuku diarijek kand musambu kupwa kwa kujikan mulong wa chikumangan, pamwing nau antu a mu dijuku diau, ni arund nau? Kusal kutenchik mudi kwinoku kukutwish kwayitongish antu akwau anch Atuman a Yehova akwet komb mutapu wau wa kujikan kapamp ka kaad ap anch akat kusal musambu wau wa chidil. Kusal mwamu kukutwish kamu kuswakal kuyipwakesh antu akwau ijinga nawamp yom yifundishiningau Atuman a Yehova piur pa afu. (1 Kor. 10:32) Ap anch kujikan kapamp ka kaad ni misambu ya chidil yiding yom yibombakening nich yitiyij ya aspirit a angak, in kumwifukwil Nzamb akin afanyididin kamu kulik yom yiney yifanikena nich yakusal chikumangan kupwa kwa kujikan. (2 Kor. 6:17) Anch twasal mwamu, tukumekesh kamu anch tukisin “yom yawonsu yiyimp” ni tukatin ni tukasikeshin yidia yiwamp, yishitwila, ni yitentamina. (Kus. 97:10; Rome 12:⁠9) Komb el muntu ni muntu wa pakach petu alama ku muchim wend mbil jiwamp jakasikeshau kal kwiur oku jitulejina anch in Kristu tufanyidin kutakel yidil yetu mu mutapu uswapela, ukweta mimbu, ni wakad kumekesh yisalijok ya kwijond.

[Mazu madia kwishin kwa paj]