Ukwakul Nchik?
1. Mulong wak tufanyidin kulondul chilakej cha Yesu pa chisu chitwipwilau chipul?
1 Djat ni nlel unou, antu ashimokining pa kutesh mutapu wadingay Yesu ni kwakul ku yipul yamwipulangau. Patwipwilingau yipul kushalijan mu mudimu wetu wa kulejan, tusadiling nawamp kumwimburij Yesu pa mulong winou.—1 Pita 2:21.
2. Chom ik chikutwisha kutukwash twakula nawamp ku chipul?
2 Teshany Bil: Yesu wadinga bil ni kusot kwijik mulong wak muntu wipwil chipul chinech. Pa yisu yimwing kusal mwamu kwadinga ni kumwit niyend amwipula muntu winou chakwel abudisha patok yitongijok yend. Ang muntu wipul anch: “Umwitiyijin Yesu?” Pamwingap urishin nich muchim wend mulong usotin kwijik mulong wak ey kiukatap kusal musambu wa Nowel. Anch wajingunin chom chimubachikina muntu chakwel akwipula chipul chinech, ukutwish wisamb nend mu mutapu uwamp.—Luka 10:25-37.
3. Yom ik yitukweta yikutwisha kutukwash kutan yakul yiwamp yidia mu Mifund?
3 Akul ni Dizu dia Nzamb: Chiding chiwamp nakash kulejan mutapu wakwilay Bibil chipul chinech. (2 Tim. 3:16, 17; Heb. 4:12) Buku Comment raisonner ni “Mitu ya Minsamb” yidia mu Les Saintes Écritures — Traduction du monde nouveau yiding ya ukwash nakash mulong wa kwakul kapamp kamwing. Ap anch muntu wipwila kitiyijinap yilondilay Bibil, ukutwish kushiken ku kwikal nich nkeu ja kulejan yom yilejena Mifund. Mukasikesha muntu chakwel ashinshikina manangu madia mu Bibil mapandakena kal choziu cha kusut kwa chisu. Kusutil ku kumwimburij kwey Yesu, yakul yey yikez kwikal “mabuj ma or madia mwinung ya utad wa usey ukash”—yifanyidina kamu, yiwamp ni ya usey.—Jinsw. 25:11.
4. Pa chisu ik kichifanyidinap kusot kwakul ku chipul ni chipul?
4 Ov, Tufanyidin Kwakul ku Chipul ni Chipul? Anch wijap chakul cha chipul, kangal wov usany wa kulond anch: “Nijap, pakwez nikutwish nakimbijol chakul cha chipul chey kupwa nikwez nikuleja yinikutana.” Kwikepish ni kusanger kwey kwinoku kukutwish kwamushikij mwin chikumbu akukana chakwel weza kand. Pakwez anch wajingunin anch chipul chinech chidiokil kudi in rupompat asotila kwau jintand kusu, mwimburija Yesu ni swipish chakul chey. (Luka 20:1-8) Chawiy chimwing kand, anch muntu kanang kasangaredinap kwend uyakin chad usotil kukwandjik mu kutadikijan, katul minsamb nich kalimish chakwel usadila chisu chey mulong wa kuyikimb antu akweta michim yiwamp.—Mat. 7:6.
5. Chilakej ik chashay Yesu pa mulong wa kwakul ku yipul?
5 Yesu wadinga wij anch kukungamen padiay Yehova kwadinga kwa usey chakwel awanyisha mudimu wend wa kulejan “uman wa uyakin,” ni wadinga ni kwakul ku yipul ya antu adinga ipwila ni michim yiwamp. (Yoh. 18:37) Twitapidil dilau mudi ik dia kumwimburij Yesu pa mulong wa kuyakul antu adia mu “mwikadil ufanyidina kutambul mwom wa chikupu”!—Mid. 13:48, NW.