“ Viens, suis-moi ”
1. Chom ik chikeza kutwinkish Dilejan dia Bibil dia Chikumangen mu angond adia kurutu?
1 Ma evanjil manying malondining piur pa mwom wa Yesu pamwing ni kumekesh anch udi mwan wa Nzamb. Chawiy, in Kristu ni yawiy akat ‘kulondul mu ruzau rend,’ tuswiridin kwirijek nawamp ni kwikal tayad ku kuta matu mudi tushinshikidina buku “ Viens, suis-Moi ” mu Dilejan dia Bibil dia Chikumangen pa rubing rikusambisha pa Rish 1 mu jindim jikwau. (1 Pita. 2:21; Mar. 10:21) Kushinshikin kuwanyidina kwa pakampwil kukwet yom yitadina mwom wa Yesu ni kukutwish kwatukasikesh mu mudimu wa kulejan.
2. Mutapu ik chilakej cha kujijaman kwa Yesu chidia chiwamp kudi etu?
2 Chilakej Chashay Yesu: Ov, akwakulap kal mu mutapu wakad kuwanyin pa chisu udia mu mudimu wa kulejan ku chikumbu ni chikumbu? Pa chisu urishina nich chikokujol mudi chinech mazu ma Yesu malondil patok anch: “Anch anzengol am akez kukuzengolany kand ni yen.” (Yoh. 15:20) Chakin, mwikadil wawonsu uyimp kiudiokidilingap ku rupompat. Ap mwamu, chadinga musangar wadinga kurutu kwend chakwel Yesu ajijamena mitapu yawonsu ya yoziu. Ni yetu kand tukutwish twikal atumbila kudi Yehova pamwing ni kutambul difut dia kushinshaman kwetu. Chinech chikutukwash chakwel ‘kangal twaziyany ni kukangany ku mipim yetu.’ (Heb. 12:2, 3; Jinsw. 27:11) Anch twajijamen mu mudimu wa kulejan, tukutwish kwikal nich ruchingej ra ukwash mudiay Kristu Yesu.—Mat. 28:20.
3. Mutapu ik tukutwisha kwimburij mutapu wamanangay Yesu mudimu wa kulejan?
3 “Chawiy Chantuminau”: Mudimu wa kulejan Want wadinga pa ndond ya kusambish mu mwom wa Yesu. (Luka 4:43) Wipana amwinend ni musangar mu mudimu wa kulejan. Wausala swa, machuku mawonsu akimbanga chisu cha kulond piur pa Want. Chawiy, chitudia in kwilej a Yesu, kulondul chilakej cha Yesu kukututwal kusal chom ik? Ov, mu mijikit yetu ya machuku mawonsu, tukat kutanijan ni antu tukutwisha kulej rusangu ruwamp? El rukat ra Kristu ritubachik kulejan nakash rusangu ruwamp!—2 Kor. 5:14.
4. Mu jinjil ik tukutwisha kuwapish mutapu wetu wa kusal mudimu wa kulejan?
4 “Kwikil Muntu Walondap Kal Mudi Muntu Mwinou”: Mutapu wa kulejan wa Yesu wadinga ushimokishin in kumutesh end. (Yoh. 7:46; Mat. 7:28, 29) Chom ik chasala chakwel ashalijana ni alej akwau? Wadinga ukatin uyakin walejanangay, wadinga ukatin antu afundishangay, ni wadinga ni kusal mudimu wa kulejan mitapu yishalijadina. Anch twamwimburij mulej mujim tukutwish kurijek mutapu wa mudimu wetu wa kulejan.—Luka 6:40.
5. Chom ik chikutwisha kwikal rutong retu pa chisu twilejina buku “ Viens, suis-moi ”?
5 Yiney yidi yom yikemp ya pakampwil ya mu mashakamin ma Yesu. Yom ik yikwau ya pakampwil tukutwisha kutan? Anch washinshikin mwom wa Yesu pa chisu cha Dilejan dia Bibil dia Chikumangen, ikal nich rutong ra “kwijik rukat ra Kristu” mu kwimburijang mazu mend ni yisal yend.—Efes 3:19.