“Ov, Ukutwish Kwikal Chibol Muwamp!”

1. Ov, mutapu ik wiyovay nambaz umwing piur pa mudimu wend wa uchibol?

¹ Kathe B. Palm walonda anch: “ni kutwishap kutan mudimu ukwau kanang ukutwisha kwinletin musangar uvud ap ukutwisha kwingikish musangar wa muspiritu.” Ndiy wasutisha dikum dia mivu mu kwipan amwinend mudi chibol wadinga ni kulejan kudi akwau mu umwing wa ku misul ya Chili, ku Amerik wa Kwindum. Tongin bil difut dia mwom dia antu adia mu mudimu wa ku chisu ni chisu, pamwingap muntu mukwau walond anch: “Ukutwish wikal chibol muwamp!”

2. Rumburil mulong wak musangar ujim uding mu midimu ya muspiritu.

² Njil ya Musangar mu Mwom: Yesu, chilakej chetu watana musangar wakin mu kusalang rusot ra Tatukwend. (Yoh. 4:34) Chawiy lel, chadinga cha kashinsh pa chisu chayilejay in kwilej end anch musangar wakin ukat kudiokal mu kwipan mu midimu yikwatijadina ni difukwil dia Yehova. Tuding ni musangar pa chisu chizwilinga mwom yetu too ni kusal midimu yitiyijinau kudiay Yehova. Chikwau, anch twapan chisu chetu, usu wetu, ni mapit metu chakwel tuyikwasha antu akwau, tukutan musangar wetu.—Mid. 20:31, 35.

3. Ov, chom ik cha musangar tukutwisha kuman mu kusutishang chisu mu mudimu wa kulejan?

³ Tusutishining chisu mu mudimu wa kulejan, tukwet chisu chivud cha kwanganijan uman wa musangar wa kusambish ni kutakel malejan ma Bibil. Ap anch in yikumbu avud ameken mudi kasangerap, tukutwish twakimb teritwar wetu usongina mabuj kupandakan watwasambisha kulejan chakwel tutaninamu uman ni mushiku mu mudimu wa kulejan. Ayibol akutwish kusadil ronganyin ratambulau ku shilkol ya mudimu wa uchibol kupwa kwa kusal mudimu winou muvu wa kabuj. (2 Tim. 2:15) Anch twajijaman, tukutwish kukun nawamp win kamu mbut ja uyakin jikeza kusong mabuj pa chisu chikwau.—Mul. 11:6.

4. Ov, chom ik chifanyidina kushinshikin ansand adia piswimp ni kupwish shikol ya piur?

⁴ Ansand: Anch wapwish malejan mey ma pakampwil, ov, ukwikal uwanyidina chakwel umalejan mu machuku mey ma kurutu? Ni katat, midimu yey ya ku shikol yijimbishil mutapu wa kutenchik program wey. Ov, mutapu ik ukutwisha kusal mwamu mu konje kupwa kwa shikol ya piur? Anch ukat kusal mudimu wa ku makas, ov, mulong wak ukutwishap walembil chakwel ushinshikin rutong ra kusal mudimu wa uchibol wa rawonsu? Ukez kwilej ukaliweny—kulejan uman kudi antu a mikadil yishalijadina, kurish nich yikokujol ya pakampwil, kukudish dipup diey amwiney, ni kukasikesh ukaliweny wa kulejan nich—ukez kutaninamu musangar mu mwom wey.

5. Ov, mutapu ik anvaj ni chikumangen ukutwishau kukasikesh mudimu wa uchibol?

⁵ En anvaj, ov, usadilany chikunku chen cha mudimu wa kuyikwash an en chakwel ikal piswimp ni kusal mudimu wa chisu chawonsu? Mazu men ni chilakej chen chiwamp yikutwish kuyikwash nakash chakwel ateka yisakin ya Want pa ndond ya kusambish. (Mat. 6:33) Ray, wasambisha mudimu wa uchibol chisu chapwishay shikol ya piur ulondil anch: “Chisu chawonsu, makwam wiyovanga anch kusal mudimu wa uchibol yidi njil ya musangar uvud mu mwom.” Antu awonsu mu chikumangen akutwish kukasikesh mudimu wa uchibol kusutil ku mazu mau ni ku ukwash wau. Jose ushicha mwingand ya Espagne ulondil anch: “ Chikumangen cham chashinshikina mudimu wa uchibol mudi mudimu upandakena kuwap kudi ansand amwing. Mazu mau ni musangar wau pamwing ni ukwash wau wa usey piur pa mudimu wa uchibol yisadil chakwel nilika kuziy kusambish mudimu wa uchibol.”

6. Chom ik tukutwisha kusal anch tukwetap katat rusot ra kusal mudimu wa uchibol?

⁶ Mutapu wa Kupwish Yikokujol: Anch ulondil anch: ‘Nikwetap kuswir kwa kusal uchibol.’ Anch wawiy mutapu wiyovilinga, chakusambish mulembila Yehova piur pa mutapu winou ni muleja anch ‘nijap anch mudimu wa uchibol udiaku mulong wamam, pakwez niswiridin kusal chom chikutwisha kukusangaresh.’ (Kus. 62:8; Jinsw. 23:26) Kupwa, kimb umutakel wend kusutil ku dizu diend ni dirijek diend. Pakusambish, ayibol a rawonsu avud “apakisha” bil kusal mudi ayibol ankwash, ni musangar watanau wayibachika chakwel ipana mu mudimu wa chisu chawonsu.—Kus. 34:8.

7. Ov, mutapu ik tukutwisha kupwish yikokujol yitukutwisha kutan chakwel tuwanyisha rutong ra masaa 70 pa ngond ni ngond?

⁷ Chom ik ukutwisha kusal anch umen anch ukutwishinap kuwanyish pa ngond ni ngond masaa 70? Mulong wak ukutwishap kuyilej ayibol adinga mu mashakamin mamwing niyey? (Jinsw. 15:22) Kupwa fund maprogram mavud maswapela. Ukutwish watan anch kulam chisu mulong wa mudimu wa kulejan kudi kutek mudimu pa ndond ya kusambish ni kudiosh mijikit yakad usey mu mashakamin men.—Ef. 5:15, 16.

8. Ov, mulong wak tufanyidin kushinshikin mashakamin metu pa chisu ni chisu?

⁸ Shinshikin Mashakamin Mey: Yisu yivud mashakamin ma muntu ni muntu makarumukining. Chawiy, chidi chiwamp kushinshikin mashakamin men ku chisu ni chisu. Chilakej, udi piswimp ni kuya mu pansio wa mudimu? Randy, muntu waya mu pansio ulondil anch: “Mupak winou wawiy wankwasha chakwel nisambish mudimu wa uchibol wa rawonsu pamwing ni mukajam, ni watubachika ku kwikal ni chisu cha kuya kusadil mudimu kwindond kudia maswir majim. Natana yiyukish yivud yakad kuchind kusutil ku mupak wam, pakwez chiyukish chipandakena ku yawonsu chidi kom kawamp.”

9. Chom ik chifanyidina angatan kushinshikin?

⁹ Angatan amwing ajingunina kupwa kwa kushinshikin kwau nawamp anch akutwishap kusal mudimu wa chisu chawonsu. Chakin, chom chinech chikutwish kuyit in dijuku akepisha mutapu wau wa mashakamin mu mwom, pakwez chidi kwipan kwa usey. John ukweta mukajend wasalanga mudimu chisu chawoansu walika kuusal nich rutong ra kutanduril mudimu wend wa kulejan ulondil anch: “Chidi chiwamp kwiyov anch mukajam washika ku kwijik anch mwom ukwatiken ni mudimu wa Yehova mu chisu cha muten.”

10. Chom ik chibachikina in Kristu chakwel ashinshikin mudimu wa uchibol?

¹⁰ Kumekesh Kwa Rukat ni Ritiy: Yehova wasala mudimu wa kulejan wikala mudimu wa usey nakash ukutwishay kusal muntu mwin mwawonsu pakach petu. Ditenchik dined dikur dikez kusheshik, ni ching antu atazukininga pa dijin dia Yehova awiy akeza kupand. (Rom 10:13) Muchim wizwila ni rukat piur petu ni musangar piur pa yom yikatay kutwinkish yikez kutubachik chakwel tuziyil mudimu watwinkishau kudiay Mwanend wa kulejan ni mushiku. (Mat. 28:19, 20; 1 Yoh. 5:3) Chikwau, kukwikal nich ritiy mudi riner anch tudi mu machuku ma nsudiel kukez kutubachik tusal yom yawonsu yitukutwisha kusal mu mudimu wa kulejan pa chisu chifanyidina, pakwez chifanyidinap kusadil nakash mangand.—1 Kor. 7:29-31.

11. Ov, mutapu ik tufanyidina kuman anch muntu kanang watulej anch tufanyidin kusal mudimu uwamp wa uchibol?

¹¹ Mudimu wa uchibol wa rawonsu ukwet usey upandakena chakul ku yitenchik ya dirijek; udi mutapu wa kwipan kwetu kudi Nzamb. Chawiy lel, anch muntu kanang wakulej anch ukutwish wasal mudimu uwamp wa uchibol chikwikal mudi dikasikesh diwamp. Ni kushinshikin kumwit mu malembil pamwing ni kuyitin antu iyandjikina kal mu mudimu winou wa musangar.

[Dizu Dirumburila chipich chidia pa paj wa 4]

En anvaj, ov, usadilany chikunku chen cha mudimu wa kuyikwash an en chakwel ikal piswimp ni kusal mudimu wa chisu chawonsu?

[Dizu Dirumburila chipich chidia pa paj wa 5]

Yehova wasala mudimu wa kulejan wikala mudimu wa usey nakash ukutwishay kusal muntu mwin mwawonsu pakach petu.