“Chiyul Chikat Kwiyingish ku Yisalijok Yau”
1. Ov, mutapu ik umeningau mudimu wetu kudia antu amwing?
1 Pa yisu yimwing tukutwish kutan yakul yiyimp yidiokidila kudi in yikumbu akwetinga yitongijok yiyimp piur petu ap akweta jinsangu jiyimp piur pa Atuman a Yehova. Pamwingap akutwish kubachik mutapu wau umeningau yom kusutil ku ma rapor kushalijan. Mu jindond jikwau atumening mudi akamakasu “chisak chikweta ubaj.” Mutapu ik tukutwisha kusal pa chisu chiturishina nich rinyinyit mudi riner?
2. Ov, chom ik chikeza kutukwash chakwel twipuk kuziy pa chisu turishina nich rinyinyit?
2 Tulamany Mwikadil Uwamp: Mu chirung cha mivu chitot ya kusambish, Yesu ni atushalapol a Yehova akwau ayiteshanga nayimp nich kudimuk. (Mid. 28:22) Chawiy lel, awiy kalondulap rinyinyit chakwel ova usany wa kusal mudimu wau wa kulejan. Yesu walonda anch: “Chiyul chikat kwiyingish ku yisalijok yau” (Mat. 11:18, 19) Ndiy wadandamena kulondul rusot ra Tatukwend nich mushiku, nich ruchingej anch antu asotina kutan kamu uyakin afanyidin kuman usey wa rusangu ruwamp. Tufanyidin kwipuk kuziy kusutil ku kwijik anch Mwan kapokal wa Nzamb wamana ni yend mar mudi minam.
3. Ov, mulong wak marapor mayimp ni rupompat yikutwishap yatukashimwish?
3 Yesu walejana anch in mangand akez kuyikis in kumwitiyij end mudi mutapu wamukisau ndiy. (Yoh. 15:18-20) Chawiy, nlel unou marapor mayimp ni rupompat yifanyidinap kutukashimwish. Pakwez, tufanyidin kuchingel mutapu ukwikala yom mudi yiney ni milong yijim yitukweta mu machuku ma kwinsudiel pamwing ni ujim ukash wa Satan uyil ni kupandakan. (Kuj. 12:12) Tukutwish kwikal nich musangar mulong yom yiney yidi ya usey ni mulong kand mangand ma Satan akez kumashesh.
4. Anch twatanijan ni muntu ukutwakula mu mutapu uyimp piur pa rusangu ruwamp, ov, mutapu ik tufanyidina kwakul?
4 Twakulany Nich Kudimuk: Anch atwakul mu mutapu wakad kusangaresh, chisu chivud tufanyidin kwakul nich kudimuk ni manangu. (Jinsw. 15:1; Kol. 4:5, 6) Anch kwambatijan ni mwikadil chitwishikinap, tukutwish kumulej mwin chikumbu nich kalimish anch kudi jinsangu jivud piur pa atuman a Yehova ap kumwipula mulong wak wiyovil mutapu mwamu. Chakul chetu cha manangu chikutwish kusal chakwel ipula yom yiteshiningay piur pa Atuman a Yehova ni yikwezay kutesh chisu chikwau chikezau kumuchirikin kudi Atuman. Pakwez, anch mwin chikumbu ukwet ujim uvud, chikutwish kwikal chiwamp nakash kwit ayinetu dilikishin. Tukutwish kwikal nich kashinsh anch ap anch atumening mutapu ukwau, Yehova umening usey wa mudimu wetu wa kulejan tusadilinga.—Isay 52:7.