“Shakamany Nich Chisambu Nau Antu Awonsu”
1. Ov, chiyul ik cha Bibil tufanyidina kusadil chisu tutanijadininga ni in chikumbu ovilinga kuyimp?
1 Antu a Yehova akatining kwikal nich chisambu ni mudimu wetu wa kulejan wawiy mutapu umwing wa kumekesh chisambu. (Isay 52:7) Yisu yimwing, tutanijadining ni antu ovilinga kuyimp mulong twayendila ku yis yau. Ov, chom ik chikeza kutukwash chakwel tushakama nich chisambu mu mikadil ya mutapu winou?—Rom 12:18.
2. Ov, mulong wak chidia cha usey kudi etu kwijik yom kurutu kwa chisu?
2 Kwijik Yom Kurutu kwa Chisu: Ap anch antu amwing akwiling nich ujim mulong akisining uyakin, akwau akutwish kujiman pakad mayingish makin ku mudimu wetu wa kulejan. Pamwing ap twayendila pa chisu chiyimp. Mwin chikumbu ukutwish kwikal ni milong ya panrend yimwovishina ujim. Ap anch ridi rusangu ruwamp rawiy rimwovishina ujim, tufanyidin kuvurik anch kwakul kwend kudi mudi kwakin mulong udi mu mididim. (2 Kor. 4:4) Kwijik yom kurutu kwa chisu kukez kutukwash chakwel tushakam zoong ni kulik kushinshikin chakul chend.—Jinsw. 19:11.
3. Ov, mutapu ik tukutwisha kumekesh kalimish kudi mwin chikumbu?
3 Kumekesh Kalimish: Antu avud mu teritwar akwet yitiyij yikash. (2 Kor. 10:4) Akwet mbil ya kutond yom yikutwishau kutesh ap kulik. Tukutwishap dichuku ap dimwing kupipesh yitiyij ya mwin chikumbu ap kumekesh mwikadil wa kwitutul. Anch watulej anch tudiokala, tufanyidin kumujikitish nich kalimish.
4. Ov, chom ik chirumburikina kulond nich ranaken?
4 Kulond Nich Ranaken: Ap anch atulondin mazu mayimp, kwakul kwetu kufanyidin kwikal kwa manangu ni kwa ranaken. (Kol. 4:6; 1 Pita 2:23) Pa ndond pa kutadikijan, pakish kwovijan nend mu yitongijok. Pamwing ap ukutwish kwipul mu mutapu uwamp piur pa mayingish malangwishina chikangesh cha mwin chikumbu. Chakwel wipuka kumwovish kuyip, yisu yivud chiwapining kwimik mambamb.—Jinsw. 9:7; 17:14.
5. Ov, yiyukish ik yimwing yidiokilinga ku kwikal in chisambu mu mudimu wa kulejan?
5 Anch tudi in chisambu, mwin chikumbu ukutwish kuvurik nawamp kwakul kwetu ni chisu chikwau ukez kumutesh muntu kanang ukupakisha kumwinkish uman. (Rom 12:20, 21) Ap anch umekeshin anch udi mwin kukis nakash uyakin, dichuku dimwing ukez kwikal mukadivar netu. (Gal. 1:13, 14) Chikalap nchik musangar wend umekeshinay mu uyakin, tukez kumutumbish Yehova ni tukez kumekesh katumb ka malejan metu anch twilam ayinetu ni twamekesh chisambu.—2 Kor. 6:3.