Mukwasha Mwin Chikumbu Kutongijok
1. Ov, mulad ik udinga uwamp nakash mu mudimu wa kulejan?
1 Ov, mulad ik wa kulejan udinga nich chibudikin chiwamp—udi mulad wa kushindil muntu bil anch udi mulad wa kumukwash mwin chikumbu chakwel aman mutapu wa kutongijok ni kushik ku kupwish mambamb nawamp? Kambuy Paul wading utongijokin padingay ni kwisamb ni in Yuda a mu Tesalonik, ni “antu amwing a pakach pau itiya.” (Mid. 17:2-4) Ov, chom ik chitina kutongijok pamwing ni antu akwau?
2. Ov, mutapu ik tukutwisha kwimburij chilakej cha Paul chisu chalejanay rusangu ruwamp?
2 Shinshikin Yovil ni Mikadil: Chakwel uyikwasha antu adia mu teritwar wey mutapu wa kutongijok, ufanyidin kushinshikin pa yovil yau. Paul wasambisha diskur diend kudi in Grek akad kwitiyij adinga ku Aeropaj kusutil ku kujimbul yom yadingau ij ni yitiyijangau. (Mid. 17:22-31) Chawiy, chisu urijekina mazu mey ma kusambish nich minsamb, shinshikin pa yitiyij yawonsu ni yaku yikisinau ya antu a mu teritwar wey. (1 Kor. 9:19-22) Anch mwin chikumbu walangwish chikangesh, kimb mutapu wa kwovijan nend, ni kasikesh mambamb mey pa mulong winou.
3. Ov, mutapu ik kusadil yipul nich ukaliweny kukutwisha kutukwash kutongijok ni antu akwau?
3 Sadil Yipul Nich Ukaliweny: Tukutwishap kumulej mwin kuya mu weny jinjil chakwel tumukwasha kushik kwi ndond kuyilay anch twijap ndond yend ya katat. Chilik chimwing kand, tukutwishap kumukwash mwin chikumbu chakwel ashikena kwi mpwishil yiwamp anch twijap yitongijok yend ya katat. Kurutu kwa kutongijok pamwing ni mwin kutesh, yisu yivud Yesu wipulanga yipul chakwel ajingunin chitongijok cha muntu. Chilakej, pamwipulau Yesu kudi muntu kanang anch: “Ov, chifanyidin am nisala nchik chakwel nikala nich mwom wa chikupu?,” Yesu wasota kujingunin chitongijok cha muntu kurutu kwa kumwakul (Luka 10:25-28) Chisu chikwau, papanay Pita chakul chiyimp, Yesu wasadila yipul nich ukaliweny chakwel atenchika chitongijok chend. (Mat. 17:24-26) Chawiy lel, anch mwin chikumbu wipul chipul ap wamekesh chitongijok chiyimp, tukutwish kusadil yipul chakwel tumukwasha mutapu wa kutongijokin pa milong yiney.
4. Ov, mulong wak tufanyidin kwiyijidish chakwel tumukwasha mwin chikumbu kuman mutapu wa kutongijok?
4 Chisu tumukwashina mwin chikumbu kutongijok, tukat kumwimburij Mulej Mujim, Yesu, pamwing ni in kulejan akwau atakamena a mu mivu chitot ya kusambish. Tufanyidin kumulimish mwin chikumbu. (1 Pita 3:15) Mudi chibudikin, ndiy ukutwish kumekesh maswir majim ma kumuchirikin.