Kangal ‘twaya kulemp!’
1 Ov chakushikenap kal anch muntu wisambina nend akukaturija mu misamb yiwarijekina nawamp nakash nich mazu ma kwel anch: “Yom ik usotina? Kangal waya kulemp!” Ov chom ik tukutwisha kwilej ku mutapu wa kwakul winou?
2 Antu avud nlel kakwetap kashimpish. Asotining kwijik tudi anany ni mulong wak twezina ni kuyital. Anch aman anch twezin mulong wa kwambamb nau piur pa Baibel, akutwish kulik kututesh. Kutang Baibel ni misamb ya muspiritu yidap yom ya usey mu mwom wa antu avud. Ov mutapu ik tukutwisha lel kwovijan ni antu mud inay chakwel itekinaku aminit kanang mulong wa kwisambin netu mutu wa mulong kampand wa Baibel?
3 Chikata kukwash kupandikan: Chakwel kutwish chifanyidin kumulej mwin kwisamb netu anch Baibel upanin yiyul ya kashinsh mulong wa kupwish matat mamutadina ndiy, ni tuchisala nich mazu miswimp mafanyidina mud chitwishikina. Mitapu ya kupan uman yikweta mabuj nakash yiding milad yikata kuvuvurish chipul chifanyidina kumutongish mwin kwisamb netu, ni kuchakwil nich verse wa Baibel. Tukutwish kupakish yiyul yimwing pakach pa yilondwila. Ayiletin mulong wa kutukwash kwipuk ‘kuya kulemp’ kapamp kamwing pituvuvurishina kusanger kwa mwin kwisamb netu.
4 Mu teritwar mudia antu akata kulond chisu chivud anch yiyisangarishinap, tuvuvurishany chipul chiyitadina kamu ayinau:
◼ “Chitwashikena kal piswimp ni mivu kanan yikweza, ov utongin kuyichingejin bil anch bwat? [Tuchingela chakul.] Baibel wabwaka yinship yakamishina yitumena nlel nich yibudikin yau.” Tang 2 Timote 3:1, 2, 5 ni Jinswir 2:21, 22.
◼ “Mwi ngand yetu twinanin nakash piur pa milong ya kwiyokish (ukash wa mujimbu). Ov wij anch Nzamb ukanin anch ukupwish chikupu milong yawonsu ya mayej?” Tang Kujingunik 21:3, 4.
◼ “Utongin nchik, ov karche wetu welang kwikal nawamp anch muntu ni muntu ushichamu wading ni kulondul yijidik ya Baibel?” Tang Mateu 22:37-39.
5 Mulong mudimu wetu udi wa kulejan rusangu ruwamp ra Want, chisu chawonsu pichitwishikina tufanyidin kulejan yikusala Want winou. Tukutwish kulond anch:
◼ “Ov wij anch buku mukur nakash wa mangand, Baibel, watakela kulond anch kukez kwikal winyikel umwing kusu ukuyikela mangand mawonsu?” Tang Daniel 2:44.
◼ “Ov mikadil yelang kwikal nchik anch Yesu Kristu wayikela pa divu?” Tang Kuseng 72:7, 8.
6 Mu teritwar mudia antu ipanina nakash mu milong ya Nzamb, tukutwish kupakish mazu ma kusambish malondwila:
◼ “Antu avud amen mar ma tusolikany mulong wa mwikadil wau (ikundj ap mband), relijon wau, ap ulomb wau wa chikit. Ov utongin anch Nzamb witiyidin milong ya mutapu winou?” Tang Midimu 10:34, 35.
◼ “Twij anch Yesu Kristu wasala yishimokish yivud pa chirung chend. Anch wading wa kumwit kusal chishimokish, welang kumwit kusal chishimokish ik?” Tang Kuseng 72:12-14, 16.
7 Anch mwin chikumbu uchikakin kufungul chis, tukutwish kusambish misamb nich kulond anch:
◼ “Antu avud nlel aziyin kuteshol milong. Asotining kutesh mitapu ya kupwish milong. Chitwishikin anch mwamu chidia ku mutambu wey. Pakwez kwisu tukutwisha kuman mitapu ya kashinsh ya kupwish milong tukweta?” Tuchingela chakul. Tang 2 Timote 3:16, 17.
8 Ov ukutwishap kuyipakish? Chisu chivud chipul kusu chiswapela ni chifanyidina chawiy kamu tuswiridina mulong wa kuvuvurish kusanger kwa mwin kwisamb netu. Mband umwing wadinga ni kulik kwisamb nend pa kusambish wayita anambaz aad kwandam kol kwend kwinyim kwa kumwipul chipul cha kwel anch: “Ov ukutwish kwijik Want ukata kulembilang mu dilembil dia Tatukwetu?” Chipul chinech chamusangarisha nakash, ni witiya dilejan dia Baibel. Katat udi kashalapol mwin kwipan wa Yehova!
9 Pitwisambina ni muntu, twikalany ni kashinsh ka yitulondina. Twisambany yidiokila mu muchim wetu. Antu akwitiy swa anch aman anch tuyitongidin chakin.—Midimu 2:46, 47.
10 Mudimu wa kulejan rusangu ruwamp udi mudimu umwing witina kwikasikesh nlel. Antu amwing atongidining nayimp angendj. Akwau akweting midimu nakash ni kakwetap chisu chivud. Pakwez, twijikany chakin anch kuchidi antu a kashinsh atufanyidina kusankan. (Mat. 10:11) Usu utusadila mulong wa kuyikimb ukusong mabuj anch twadandamen kupan uman mu mutapu wiswimp ni ‘kulik kuya kulemp!’