Panany Broshir Musu!

1. Ov, chom ik tukeza kupan pa Kalang, ni rutong ik rikweta broshir winou?

¹ Ku chitentam chetu cha distrikt cha mu muvu wa 2009 chadinga ni mutu wa mulong ulondila anch: “Chishany ku Mes!,” kwabudika broshir musu ukweta mutu wa mulong ulondila anch Bibil​—Uruu ik Udiamu?, mu français. Pa Kalang yikumangen ya mu mangand mawonsu yikez kumwangan broshir mwinou pa chisu cha kusambish. Ov, mutapu ik broshir winou ukwashinay antu mu teritwar wetu? Antu avud, pakampwil adia mu marelijon makad kwikal ma Ukristu, ij yom yikemp yitadila Bibil. Chawiy lel, broshir winou urumburil pa paj wa 3 “yom yidia mu Bibil” yikutwisha kutukwash.

2. Mutapu ik tukutwisha kupan broshir?

² Mutapu wa Kumupan: Tukutwish twalond anch: “Tusotin tuteshaku chitongijok chey pa yom yilondiningay Bibil. [Tang 2 Timote 3:16.] Antu avud alondining chakwel twitiyija mazu minam; pakwez akwau atongining anch Bibil kakwetap chom ap chimwing chipandakena buku muwamp. Ov, chom ik utongina piur pa Bibil? [Mulika akula.] Chikalap nchik yitiyij yetu ya relijon tudinga, kudi yiyingish yiwamp ya kurumburil Bibil mulong wetwetu ayinetu. [Tang paragraf wa kusambish kwiur kwa paj wa 3.] Anch utangin mau diswipish dia malejan madia mu broshir winou, ukez kuman chom kanang chisangareshina: Bibil ukwet mutu wa mulong umwing ni rusangu rumwing.”

3. Mutapu ik ukwau wa kupan broshir tukutwisha kusadil, pakampwil mu teritwar wa antu avud adia mu relijon wakad kwikal wa Ukristu?

³ Kudi kand mutapu ukwau, pakampwil pa chisu tulejena kwindond ja antu avud adia mu marelijon makad kwikal ma Ukristu: “Tusotil kuteshaku chitongijok chey pa yom yilondinau mu Mifund (ap mu buku winou utumbila). [Tang Kuseng 37:11.] Ov, ey utongin nchik pa mulong wa divu dikeza kwikalaku mudi pa chisu chikeza kuwanyin uprofet winou? [Mulika akula.] Chinech chidi chilakej chimwing cha mu Bibil chikweta ruchingej ni rongoj yikezau kutambul kudi antu a yaku yawonsu ni yitiyij yawonsu.” Tang paragraf udia kwiur kwa paj wa 3, ni pan broshir.

4. Ov, mutapu ik tukutwisha kusadil broshir winou chakwel tusambisha dilejan dia Bibil?

⁴ Sambishany Dilejan dia Bibil: Pitukuchirikanya, tukutwish twamuvurish mwin chikumbu mambamb metu ma kusambish ni kushinshikin paragraf umwing ap maad ma mutu wa mulong utwisambidina, kusadil yipul yifanyidina yidia kwinsudiel kwa chikunku. Ap anch tuswiridin kusambish buku Chifundishinay Bibil kapamp kamwing, tukutwish kutang nend pa chibur cha broshir, kumwinkish buku, kumwipul mutu wa mulong wa ku mitu ya milong ya shapitre usangaredinay, ni shinshikinany pamwing paragraf umwing ap maad madia mu shapitre. Pamwingap antu awonsu a mukach mwetu akwipan nakash chakwel apalengesh broshir winou pa Kalang!