Mulad Umwing Usangareshina Nakash
1. Ov, mudimu ik wa muspiritu usangareshina mu machuku metu minam?
1 Mu mivu chitot ya kusambish, antu avud izula too ni musangar mu michim pa kuman mutapu wayerikau ku mujimbu. (Luka 5:24-26) Mu machuku metu manam, tukat kusangar mu mudimu wa kwokan kwa muspiritu. (Kuj. 22:1, 2, 17) Ov, mutapu ik chitubachikininga kutang uman udinga mu Dizu dia Yehova ni mutapu uswimpininga spiritu utumbila mashakamin ma antu mu mwom! Pakwez, chakwel anch mudimu winou wikal wa usey ujim, chifanyidin kwiyandjikamu kusutil ku kutakel malejan ma Bibil mayila kurutu.
2. Ov, musangar ik tukutwisha kutan anch twilejin uyakin ni muntu kanang?
2 Ov, Dijin dia Nzamb chom ik? Ov, mulong wak ndiy witiyija kuman mar? Ov, chom ik chikeza Want wa Nzamb kusadil antu? Kitukatap kusanger kusu mutapu wa kwakul ku yipul mudi yiney pakwez kand tukat kuman musangar ubudikina mu muchim wa mwin kwilej Bibil pa chisu chilejenay uyakin. (Jinsw. 15:23; Luka 24:32) Anch mwin kwilej Bibil uyil kurutu, ukutwish kusambish kusadil dijin dia Yehova, ukusal usu wa kuswimp mutapu wend wa kudjal ni kwileng, ukulik yisal yiyimp, ni ukusambish kulejan uman kudi antu akwau. Anch ndiy uyil kurutu chakwel ipana ni amubabatisha, ukez kwikal mukadivar netu ni mbay netu wa mudimu. Chom ni chom cha ku jinzau jiwamp ej chidi diyingishil kutudia etu dia kusanger.—1 Tes. 2:19, 20.
3. Ov, jisu jinzau ja usey tukutwisha kusadil chakwel tusambisha malejan ma Bibil?
3 Ov, Ukutwish Wipanany? Anch usotin kwiyandjik mu mudimu winou upandakena kujimb, muleja Yehova piur pa chisend cha kutakel malejan ma Bibil, ni kupwa, sal mudimu kukwatijan nich malembil mey. (1 Yoh. 5:14) Lejan kwindond ni pa chisu ukutwisha kutan antu. Salany malejan ma Bibil pa chisu chin chawonsu chiwanyidina. (Mul. 11:6) Anch watan antu asangaredina, kun mbut ja uyakin, ni chirik ujichila mem.—1 Kor. 3:6-9.
4. Mulong wak tufanyidina kwikal nich malejan ma Bibil swa?
4 Uvud wa antu akad kuchind udi wa antu adia ni nzal, ni impu ya kutentam. Ov, nnany ukutwisha kuyikwash chakwel apwisha maswir mau ma kumwijik Yehova kusutil ku kutakel malejan ma Bibil? (Mat. 5:3, 6) El tupanany ayinetu nich musangar ukwash uwanyidina wa kulejan ni kusal mudimu wa kwikadish in kwilej kurutu kwa kwangul kushik kwinsudiel.—Isay 6:8.