Tutakelany Malejan ma Bibil Mayila Kurutu Chikunku 1: Dilejan dia Bibil Chom Ik?
1 Pa mangand pawonsu, antu a Nzamb atakedin ngond ni ngond piswimp malejan ma Bibil tutikit musamban. Nich kusadil milad yiwamp ya kufundish, tukutwish kuyikwash in kwilej Bibil inay kuya kurutu kushiken ku kwipan ni ku dibatish ni kwikal “akutwisha kuyilej akwau kand.” (2 Tim. 2:2) Ov usotil kumukwash muntu wilejina nend Bibil aya kurutu mutapu winou? Kusambish kamu nich nimero winou, Mudimu Wetu wa Want ukez kwisambin mitu ya milong yikurumburila milad ya pa dishin chakwel kutakel malejan ma Bibil mayila kurutu.
2 Chisu Ufanyidina Kufund Rapor wa Dilejan dia Bibil: Anch ukat kwisamb chisu chawonsu mutapu ufanyidina piur pa Bibil, yikalap nchik yiswimp, nich kusadil Bibil pamwing ni umwing wa mikand yitinau kusadil, ukat kutakel dilejan dia Bibil. Didi kand dilejan anch disadikidin ku chikumbu cha muntu ap ku telefon. Ukutwish kufund rapor wa dilejan anch waditakedin tupamp twaad kupwa kwa kumekesh mutapu wa kwilej ni anch kudi diyingishil dimekeshina anch dilejan dikudandamen.
3 Broshir Nzamb Witin ni buku Ronganyin yidi mikand yikatau kusadil mulong wa kutakel nich malejan mavud ma Bibil. Kupwa kwa kwilej mikand yiney, anch chamekan kamu patok anch muntu uyil kurutu, ap pakemp-pakemp, ni anch ukat kukudish kusanger mu yom yilejinay, chad lel dilejan dikutwish kudandamen mu buku Mwifukwila Nzamb. Akutwish kusadil broshir Ukutwish Kwikal Murund Nend Nzamb! mulong wa kwilej nau antu akad kwilej nakash ap akad kwijik kutang nawamp.
4 Mudimu wa dilejan dia Bibil ukweting mabuj nakash mu kukwash tutikit twa antu kwikal in kwilej akin a Yesu Kristu. (Mat. 28:19, 20) Nich kusadil yiyul yikupanau mu mitu ya milong yikulondula, ukutwish kutakel dilejan dia Bibil diyila kurutu.