Tutakelany Malejan ma Bibil ma ku Chis ni ma ku Telefon Mayila Kurutu
1. Rutong ik tukweta mu kutakel kwa malejan ma Bibil?
1 Uding musangar ujim mud ik pa kusambish dilejan dia Bibil! Pakwez, kuman muntu usangeridina kwilej Bibil didi kwau disambishil. Rutong ra dilejan ridi ra kumukwash muntu ikala mwin kwilej wakin wa Kristu. (Mat. 28:19, 20) Yom ik yikutukwasha kuwanyish rutong riner?
2. Malejan ma Bibil ma ku chis ni ma ku telefon chom ik, ni mulong wak madi ma ukwash?
2 Antu Akwatikena: Nlel unou antu akwatiken chipandikena. Mu jindond jimwing, antu akemp kusu awiy akutwisha cha kusambish kutek saa umwing mulong wa kwilej Bibil. Chakwel kuyikwash antu inay, atukasikeshin kusambish ni kutakel malejan ma Bibil ma ku chis ap ma ku telefon. Cha kamu, malejan makutwish kwikal miswimp ni kwambambin kwau maverse makemp ma Bibil ni kusadil paragraf umwing ap maad mu buku, Chifundishinay Bibil. Chidi chiwamp nakash mulong in kulejan avud katat atakedil malejan ma Bibil ma ku chis ni ma ku telefon!
3. Mulong wak tufanyidina kwikasikesh kuwejinaku chisu ku dilejan dia ku chis?
3 Pakwez, ov, tufanyidin kusangar tudandamena chikupu ni chikupu kutakel dilejan dia Bibil dia ku chis ni dia ku telefon? Bwat. Ap anch tubabel chakwel kulik kulond chisu chilemp ku chis pitusambishina dilejan, Mudimu Wetu wa Want wa Ndol-Mem 1990, paj wa 8 (Français), warumburila anch: “Anch dilejan diasambish ni mwin chikumbu wasangar kamu nakash, dilejan dikutwish kulab chisu chilemp.” Chidi cha usey. Twilakejany: Mwan wovila nzal ukutwish cha kusambish kudia yakudia yivud kushik ni pa yikumudjikamina, pakwez tukutwishap kuchingej anch ukuchirish usu wend ni kupam nawamp anch wadia yakudia yiney yikunku yikemp pa chirung kanang. Chawiy chimwing, mwin kwilej Bibil ukwet kuswir kwa kwilej nakash pakad kujing chakwel akula ni kwikal kashalapol wa Nzamb.—Heb. 5:13, 14.
4. Kutakel dilejan dia Bibil mu chikumbu ap mwi ndond yikwau yifanyidina kukwet kutaninamu ik?
4 Kwilejin Bibil mu Chikumbu: Chiwapin kwilejin kwi mpeng—mu chikumbu ap mwi ndond yikwau kanang yifanyidina. Chinech chikusal kwilej kwikal kuswapela ni kumukwash mwin kwilej kwov kurumburik kwa Dizu dia Nzamb. (Mat. 13:23) Chikez kamukwash kand mulej kutalikesh yom yidia mu dilejan ku maswir ma mwin kwilej. Chikwau kand, kwilej chisu chilemp kukutwishish nawamp nakash, kukasikesh ritiy ra kushinshikin Dizu dia Nzamb.—Rom 10:17.
5. Mutapu ik tukutwisha kushemunin dilejan dia Bibil dia ku chis kuditwal mu chikumbu ap mwi ndond yikwau kanang yifanyidina?
5 Mutapu ik ukutwisha kushemunin dilejan dia Bibil dia ku chis kuditwal mu chikumbu ap mwi ndond yikwau yifanyidina? Kupwa kwa kwilej malejan mavud miswimp, ukutwish kusu kumwit muntu kwilej mu chirung kanang. Ap ukutwish kapamp kamwing kumwipul muntu anch: “Nlel ukwet chisu cha kushakam ni kwisambin pamwing mutu wa mulong ou?” ap “Usotil nlel tusala masaa minch mulong wa kwisambin rusangu riner?” Anch utwishinap kusal mwamu, kusutil ku mitapu yawonsu dandamen kutakel malejan ma ku chis mu wiswimp. Pa chisu chifanyidina, pakish kand kushemunin dilejan kuditwal mu chikumbu ap mwi ndond yikwau kanang yifanyidina.
6. Mudimu wetu tufanyidin kuuwanyish nich rutong ik, ni yiyul yidia mu mutu wa mulong winou yikutwish kutukwash mutapu ik kuwanyish rutong riner?
6 Chitudandamedina kukimb antu afanyidina, kangal tuvuramenany amboku rutong retu ra kusambish ni kutakel malejan ma Bibil. Diloz dietu didi dia kuyikwash antu a michim yitok chakwel ikala atushalapol a Yehova ipanina ni abatishau kal. Yehova ayukish amboku usu wetu pitudandamedina kuwanyish mudimu wetu nich rutong riner.—2 Tim. 4:5.