Yakul Ku Yipul Yen

◼ Ov, nambaz mwin kulejan ufanyidin kudjal chitambal ku mutu anch udia pamwing ni mwin kulejan ikundj chisu cha dilejan dia Bibil ku chis?

Chisu chitakedilay nambaz mwin kulejan dilejan dia Bibil diakad kujing, anch mwin kulejan wa Want ikundj udi pinap, nambaz winou ufanyidin kudjal chitambal ku mutu. (1 Kor. 11:3-10) Nimero wa Chinong cha Kalam, cha pa Kafunfut 15, 2002 pa paj wa 27 mu Français urumburila anch: “Winou udi program wa malejan marijekau ulejen anch muntu ukata kutakel dilejan ndiy wikal kal chakin kamu ntakel. Mu mikadil mudi yiney, dilejan dined dikal kal mudi kujimb kwa chikumangen. Anch nambaz wababatishau kal mudi Kaman utakedil dilejan pamwing ni ikundj wababatishau kal mudi Kaman, ndiy ufanyidin kudjal chitambal ku mutu.” Chinech chidi chakin ap anch atakedin dilejan ku chikumbu, ku chis ap mwi ndond yikwau.

Ku mutambu ukwau, anch kand kal atenchika dilejan dia Bibil dia ku chis, nambaz kakutwishap kuswir kudjal chitambal ku mutu chisu chidiay pamwing ni mwin kulejan wa Want ikundj, ap anch rutong ra kumuchirikin muntu ridi ra kumulej mutapu usadikininga dilejan dia Bibil ap kushinshikin yom yidia mu umwing wa mikand yijimbwilau. Mulong yisu yivud malejan ma ku chis amatenchikining pakemp-pakemp, kusutil ku kuyichirikin antu tupamp tuvud, in kulejan akuswir kushinshikin mikadil ni kwikal isikena mu kukwat mupak wa kudjal chitambal ku mutu pa mulong winou.