“Am Nidi Pinap Mulong . . .”

Chisu chazurilau in chikumbu chis chau ni pitumanau twiminy pinap, akutwish kwipul anch en udiany anany ni mulong wak udiany pinap. Ov, yom ik tukutwisha kulond mu mazu metu ma nsambishil chakwel tuyovisha nawamp mu manangu mau? Kupwa kwa kuyilangwish mudi mukatau kulangwishan kwol kwen, in kulejan amwing asadidining dizu “mulong” chakwel arumburila. Chilakej, akutwish kulond anch: “Tukwendidilany mulong amutej netu avud akat kubangin piur pa milong ya chisum. Ov, en utonginany anch . . .” ap “Am nidi pinap mulong wa kupan malejan ma Bibil pakad kufutish.” Anch kwinsambishil kwin kamu mwin chikumbu wakulej anch mulong wak udia pinap, ndiy ukutwish kwikal nich impu yijim ya kutesh yom ukulond.