Yipul ya in Kutang

Ov, chom ik tukutwisha kusal mulong wa kuyikwash akadivar ni anambaz ayedina mayej madiokila ku many ma kwipan ap malash [parfum]?

Muntu umena mar madiokila ku yom ya kwipan ukweting yikokujol yivud. Chakin, antu kijingap kwau mutapu wa kukangesh mayej madiokila ku many ma kwipan ni ku malash makatau antu akwau kusadil pichuku pichuku. Pakwez, antu amwing ita mulong wa kwijik anch akadivar ni anambaz akutwish kulik kusadil many ma kwipan ap malash chisu cha yikumangan ya win Kristu, yitentam ya munyingumuku ap ya rejon.

Chakin kamu, kwikil mwin Kristu ukutwisha kusot kusal yom yikutwisha kumumesh muntu mukwau udia mu chikumangan cha win Kristu mar. Muntu mwawonsu ukwet kuswir kwa ukwash udiokila ku yikumangan yetu. (Heb. 10:24, 25) Pakwez, muntu ayedina mayej madiokila ku kwipan many ni malash makata kumumesh mar mamukangeshina kwandam mu yikumangan ukutwish kwambambin pa mulong winou ni amakurump. Ap anch Bibil katekinap mbil piur pa mulong winou wa kwipan many ap malash chisu cha yikumangan, amukurump akutwish kujikish chikumangen mulong wa kuyikwash chakwel ijika piur pa mulong urishinau nich antu akwau. Kukwatijan nich mashakamin madiaku, amakurump akutwish kukwat mupak wa kuyijikish in kulejan mu maswir ma chikumangen mu chikunku cha chikumangan cha mudimu, ap akutond mutapu wa kwijikish nich manangu piur pa mulong winou.a Pakwez, amakurump kafanyidinap kudandamen kuchirikin ching pa mulong winou. Ku yikumangan yetu, kwezining yisu yawonsu antu asangaredina uyakin ni angendj akad kwijik mulong winou, ni tukatil anch antu awonsu ikala ni musangar padiau mu yikumangan. Tufanyidin kusal usu anch, antu kangal iyova nayimp mulong wa many ap malash twipanina mu mutapu wakad kuwanyin.

Anch mulong winou udiaku kulondwish mashakamin ma kwol kwen, chidi chiwamp anch chisak cha amakurump chitenchika ndond mu Chot cha Want yikutwishau kushakam antu akata kov nayimp mulong wa many ap malash makatau kwipan antu akwau. Chilakej, akutwish kuyitek mu kapalakany kakwau ka mu Chot mukutwishau kutesh yifundishinau mu yikumangan. Anch mulong winou katwishinap kuupwish nawamp ni anch adandamedin kuman mar, chikumangen chikutwish kukwat mupak chakwel antu inay alondula yikumangan ku telefon ap kuyikwatin ma band ap anch ashich ku yikumbu yau, mudi mutukata kusal mulong wa antu akangenying kwez ku yikumangan mulong wa mayej makash.

Piur pa mulong winou, mwi ndond yisadinau yitentam yijim ya rejon pakwez mukwetau kuswir kwa rinkind wa kupim nich, ayileja in kukumangan anch asadila ku yitentam yiney many ma kwipan ni malash mu chilik chiwanyidina. Kalimish ka pakampwil kitin anch tusadila chisu cha yitentam many ma kwipan ap malash mu chilik chiwanyidina. Pakwez, chinech chifanyidinap kwikal chijil chifanyidina kusadil mu yikumangan ya yikumangen yawonsu, ni chifanyidinap kulond mu mutapu uyimp piur pa mulong winou.

Pitushicha mu ditenchik dined dia yom, muntu ni muntu wa pakach petu ukat kuman mar mulong wa yibudikin yitwaswana ya kuburen kuwanyin. Musangar mud ik tukweta wa usu usadinau antu akwau mulong wa kutukwash etu amena mar! Chikutwish kuyit antu akwau kusal usu nakash mulong wa kulik kusadil many ma kwipan, malash ap parfum chakwel tuyikwasha akadivar ni anambaz kukumangan netu pamwing ku yikumangan ya win Kristu. Pakwez, rukat rawiy rikutwisha kutubachik kusal mwamu.