Tutakelany Malejan ma Bibil Mayila Kurutu Chikunku 12: Kuyikwash in Kwilej Kusambish ni Kutakel Malejan ma Bibil
1 Pasambishinau antu twilejina nau Bibil kusal mudimu wa chingand, akutwish kwov wom wa kusambish ni kutakel malejan mau ma Bibil. Mutapu ik tukutwisha kuyikwash kukudish mwikadil uwamp wa manangu pantaliken nich chikunku chinech cha usey cha mudimu wetu?—Mat. 24:14; 28:19, 20.
2 Anch kamu mwin kwilej Bibil wawanyish yitinau chakwel kwikal mwin kulejan wakad kubabatishiu, ndiy udi kamu tayad chakwel kusut ku Shikol ya Mudimu wa Uteokras. Diyiy ditambwilay mu kurijek ni kusal minsamb ya an a shikol yikumukwash kukudish ukaliweny wa kufundish uswiridinay “mwin mudimu [ . . . ], wakad mulong wa kwov usany, wend ulejan mazu ma uyakin mu kutentam.”—2 Tim. 2:15.
3 Fundishin ku Chilakej Chey: Yesu wayifundisha in kwilejend kusutil ku kuyinkish yany yovikena ni kupan chilakej chiwamp. Ndiy walonda anch: “Muntu wawonsu anch wawanyin kal ndiy ukwikal mudi mulej wend.” (Luka 6:40) Kumwimburij kwey Yesu kusutil ku kupan chilakej chifanyidina mu mudimu wey wa kulejan kudi kwa usey nakash. Muntu wilejina nend pamenay chilakej chiwamp mu mudimu, ndiy ukez kutesh kamu anch rutong ra kusal kuchirikinamu kusu ridi ra kusambish malejan ma Bibil.
4 Murumburila anch chisu tumwitina mwin chikumbu kwilej, chidiap chisu chawonsu cha usey kurumburil mutapu ukata kusadik dilejan ni mu tuyom tukemp-tukemp. Chisu chivud chiding kwau chiwamp nakash kulejan mutapu wa kutakel dilejan nich kusadil paragraf umwing ap maad mu mukand wa kwilej. Yiyul ya ukwash mulong wa kusal mwamu ukutwishany kuyitan pa paj wa 8 wa nimero winou wa Mudimu Wetu wa Want ni pa paj wa 6 wa Mudimu Wetu wa Want wa Chiwong 2002.
5 Pichifanyidina, mwita mwin kwilej kukubachikij ap kumubachikij mwin kulejan mukwau chifuvu ku malejan makwau ma Bibil. Ukutwish niyend kurumburil paragraf ap mufund usendina yitongijok yijim. Chad lel, kusutil ku kutal, mwin kwilej ukwilej yivud piur pa kutakel malejan ma Bibil mayila kurutu. (Jinsw. 27:17; 2 Tim. 2:2) Mujikitisha, ni kwisambin mutapu ukutwishay kuwapish kuya kurutu.
6 Kuyifundish in kulejan asu kwikal alej a Dizu dia Nzamb kukez kuyiwanyish mulong wa kusal “mudimu uwamp” wa kusambish ni kutakel malejan mau ayinau. (2 Tim. 3:17) Chidi chisangareshina mud ik kusadil nau pamwing mu kutanduril diladikij dined dia rukat: “Ni wawonsu usotila, mulikany atambul mem ma kupand makad usey!”—Kuj. 22:17.