Buku Chifundishinay Bibil​—⁠Ukwash Wetu wa Kusambish wa Dilejan dia Bibil

¹ Chading cha musangar mud ik patwatambwila buku Chom ik Chakin Kamu Chifundishinay Bibil? ku Chitentam cha Distrik “Kumuziyil Nzamb”! In kukumangan asangara muntu ni muntu kutambul kopi wend kupwa kwa program wa Diampos. Mutapu ik ukusadilau ukwash wa kufundish winou usu? Amutondil kwikal ukwash wetu wa kusambish wa dilejan dia Bibil. Ap anch buku musu akumusadil cha kusambish mud mukand wa kupan pa Rish, in kulejan ayikasikeshin kumusadil pakad kulab mulong wa kusambish ni kutakel malejan ma Bibil.

² Malejan ma Bibil ma Katat: In kulejan atakedila malejan mu buku Ronganyin ap mu broshir Nzamb Witin afanyidin kujingunin nawamp mu kukwat mupak piur pa mutapu ni chisu cha kusambish kusadil mukand usu pa dilejan. Anch dilejan diasambishin katat, ukutwish kwey kusambish ku disambishil dia buku musu. Anch wayil kal kulemp mu buku Ronganyin, ukutwish kudandamen dilejan mu mwimbu wilikena nich wa buku Chifundishinay Bibil. Anch udi kwinsudiel kwa buku Ronganyin, ukutwish kukwat mupak wa kupwish buku winou.

³ Pakad kwidjidjek etu awonsu twij antu avud asotila kutaninamu ku kwilej buku Chifundishinay Bibil. Yom ik ukulikina kupan dilejan dia Bibil kud muntu ni muntu mu ukwash winou wa dilejan diyila kurutu? Mud chilakej, antu ilejina broshir Nzamb Witin ap buku Ronganyin pakwez akad kuya kurutu ku kwipan ni ubatish akutwish kwiswipish dilejan diau mu kusadil buku musu. Anvaj akutwish kukwat mupak wa kusadil mukand chisu chilejenau ronganyin rakin ra rusot ra Nzamb kud anau.​—⁠Kol. 1:​9, 10.

⁴ Kwilej Buku wa Kaad: Ov kudi ditenchik mulong wa mwin kwilej Bibil ileja buku wa kaad kwinyim kwa kupwish Chom ik Chakin Kamu Chifundishinay Bibil? Mwaning. Anch chimeken anch mwin kwilej uyil kurutu, ap pakemp-pakemp, ni umekeshin kujikitish mulong wa yom yilejinay, dilejan dia Bibil dikutwish kudandamen mu kusadil buku Mwifukwila Nzamb Umwing Kusu Wakin. Tuchingejin anch buku Chifundishinay Bibil ukwikal chamu cha usu tukusadila pituwanyishina mudimu wetu wa kwikadish in kwilej.​—⁠Mat. 28:​19, 20.