“Ov, nikutwish nchik . . . anch kwikil muntu mwin kwinrumburil?”
1 Mwin kulejan Filip pamwipulay ntung wa ku Etiopi anch wadinga ni kwov kurumburik kwa yom yadingay ni kutang mu Dizu dia Nzamb, ikundj winou wamwakula anch: “Ov, nikutwish nchik kwov anch kwikil muntu mwin kwinrumburil?” Nich musangar Filip wamukwasha kwov rusangu ruwamp ra Yesu, ni chinech chamushikija ikundj winou ku dibatish. (Midimu 8:26-38) Filip wadinga ni kuziyil kwi mbil ya Kristu ya ‘kuyikarumun antu a michid yawonsu kwikal in kwilej, kuyibatish ni kuyifundish.’—Mat. 28:19, 20.
2 Tufanyidin kuziyil kwi mbil ya kuyikarumun antu kwikal in kwilej, mud kamu mutapu wasalay Filip. Pakwez, mutapu wa kuya kurutu mau mau wasalay ntung wa ku Etiopi ukatap kumekan chisu chivud pakach pa antu tukata kwilej nau Baibel. Ikundj winou, mwin kwilej wa difukwil dia Ayuda wading wij nawamp Mifund, wadinga ni muchim wa kutesh ni wadinga ukwet kuswir kusu kwa kwitiy anch Yesu wadinga Mesia wakanau. Chikasiken anch antu twilejina nau Baibel kijap kwau Baibel, ashadika kal nich mafundish ma makasu ma chirelijon, ap anch akwet milong yivud yivud yiyilimidina. Ov chom ik chikutukwasha kwikal ni mabuj mu kuyitakel antu twilejina nau Baibel kushik ku kwipan ni dibatish?
3 Tujinguninany nswir ja muspiritu ja muntu twilejina nend Baibel: Wenjil wa Mudimu Wetu wa Want wa Mwinses 1998 wisambina kulep kwa chisu tufanyidina kwilej nau antu, nich kusadil broshir Nzamb Witin ni buku Connaissance. Wapana chiyul chilondwila ech anch: “Chitufanyidin kujingunin mulad wa dilejan kulondulijan ni mwikadil ni manangu ma muntu twilejina nend. . . . Tusotinap kusheshil ntenshil muwamp wa mwin kwilej netu ku kuya mau mau mu dilejan. Muntu wilejina uswiridin kutungin ritiy rend risu mu Dizu dia Nzamb pa dishin dikash.” Chawiy lel, chidi cha manangu kwipuk kuya mau mau mu malejan madia mu buku Connaissance nich chitongijok cha kupakish kupwish buku mu angond musamban. Chikutwish kwit angond avud kusut angond musamban chakwel kuyikwash antu amwing kuya kurutu mulong wa kushiken ku dibatish. Piutakedila dilejan rubing ni rubing, sutish chisu chifanyidina chakwel kumukwash muntu wilejinany nend Baibel kwov ni kwitiy yilejinay mu Dizu dia Nzamb. Yisu yimwing, chitwishikin ambing aad ap asatu chakwel kupwish shapitre umwing wa buku Connaissance. Chinech chikusha chisu cha kutang ni kutokish yitongijok ya maverse mavud mapaninau.—Rom 12:2.
4 Ing anch wapwishany buku Connaissance, pakwez waman anch kutesh kwa uyakin kwa muntu wilejinany nend kufanyidin kand kuwejinaku ap anch kand kal ikala kamu tayad kwimanyin pa uyakin ni kupan mwom wend kud Nzamb? (1 Kor. 14:20) Ov chom ik ukutwisha kusal chakwel kumukwash mwi njil yitwadila ku mwom?—Mat. 7:14.
5 Tuwanyishany nswir ja muspiritu ja muntu twilejina nend Baibel: Anch chimeken kamu patok anch muntu ukat kuya kurutu, ap anch uchisadil pakemp pakemp, ni ukat kukulish kusanger kwa yom yilejinay, chawiy lel dandamenany kwilej Baibel mu buku wa kaad kupwa kwa broshir Nzamb Witin ni buku Connaissance. Chinech chikutwishap kwikal mwamu ni awonsu, pakwez pichiswiridikina, dandamenany kwilej buku Paix véritable, buku Unis dans le culte, ap buku Parole de Dieu. In kulejan avud akwet mikand yiney ya kusadil anch chikumangen chiyikwetap. Buku Parole de Dieu ndiy kusu buku umwing ukutwishau kwit. Pakwez, mu yisu yawonsu, chifanyidin bil kwilej broshir Nzamb Witin ni buku Connaissance. Chifanyidin kufund rapor wa dilejan dia Baibel, kuchirikinamu kusu, ni chisu chikusalau chakwel kudandamen nich dilejan ap anch muntu wilejinany nend watambwil kal dibatish kurutu kwa kupwish buku wa kaad.
6 Ov chinech chirumburikin anch antu abatishinau katat pakwez ilejina kusu buku umwing afanyidin katat kutambul ukwash chakwel kwilej buku wa kaad? Chidap mwamu bwat. Pakwez, chitwishikin ikadil kal in kulejan akad kutulang rapor ap chitwishikin kayilap kurutu mu uyakin, ni akutwish kutong anch aswiridin ukwash wa kusadil mu mutapu ujim uyakin mu mwom wau. Chifanyidin kwambamb nend kalam’a mudimu kurutu kwa kusambish kand kwilej ni mwin kulejan wabatishau kal. Pakwez, anch wij muntu kanang wileja buku Connaissance pasak pakwez kakuyangap kurutu kushiken ku kwipan ni dibatish, ukutwish kukwat chiyul cha kutal anch ukusot kuchirikin dilejan diau dia Baibel.
7 Kumuta muntu mwawonsu twilejina nend Baibel muchim, chidi chimekesh cha rukat ra Ukristu. Rutong retu ridi ra kumukwash muntu twilejina nend Baibel kwikal ni jingunin mujim wa uyakin wa Dizu dia Nzamb. Chad lel ukutwish kwimanyin mu uyakin mu mutapu umwing wa kashinsh, ufanyidina ni kupan mwom wend kud Yehova, ni kumekesh kwipan kwinoku kusutil dibatish dia mu mem.—Kus. 40:8; Ef. 3:17-19.
8 Ov uvurikin yashikena kupwa kwa kumubatish ntung wa ku Etiopi? “Wadandamena mu weny wend nich musangar nakash” mud mwin kwilej musu wa Yesu Kristu. (Midimu 8:39, 40) Likany etu ni antu tutakedila mwi njil ya uyakin tumana musangar ujim mu kumusadil Yehova Nzamb—katat ni chikupu!