Mwikadil Upandakena Usey wa Mulej Muwamp
1. Ov, mwikadil ik wa mulej muwamp upandakena usey?
1 Ov, chom ik chikutwisha kumukwash muntu kanang chakwel ikal mulej wa Bibil muwamp? Ov, malejan ma ku mujimbu? Uman wend ukwetay? Ukaliweny wend wa chivadik? Chakin kamu, chidi mwikadil umwing udia mu kuwanyish kwa Chijil, uyimekeshininga in kwilej a Yesu, uding mwikadil upandakena ni wamushena wa ngikadil jijim ja Yehova. (Yoh. 13:35; Gal. 5:14; 1 Yoh. 4:8) Mwikadil winou udi rukat. Chawiy, alej awamp amekeshining rukat.
2. Ov, mulong wak chidi cha usey kudi etu kwikal ni rukat piur pa antu?
2 Kuyikat Antu: Yesu, Mulej Mujim, wamekesha rukat kudi antu, ni chisal chinech chayibachika chakwel amutesha. (Luka 5:12, 13; Yoh. 13:1; 15:13) Anch twayibangin antu, chisu chin chawonsu tukez kwikal nich mutapu wa kuyilej uman. Yikangesh mudi kuzengol ni kulik kwitiyij kwa antu kukezap kutuziyish. Tukez kumekesh musangar wakin wa pakampwil kudi antu tulejena, ni kwambatish minsamb yetu nich milong yiyitadina. Tukez kusanger kwitekin chisu pakad ching pitudia ni mwin kwilej mwawonsu wa Bibil, pakwez kand chisu twirijekina kurutu kwa dilejan ni dilejan.
3. Ov, mutapu ik rukat ra uyakin wa mu Bibil rikeza kutukwash mu mudimu wa kulejan?
3 Kukat Uyakin wa mu Bibil: Yesu wakata kand uyakin wa mu Bibil ni waumana mudi chipau. (Mat. 13:52) Anch tukatin uyakin, tukez kulond nich chirungil, ni chikez kulangwish yovil ya in kutesh etu. Rukat mudi riner rikez kutukwash kwasin jinkeu pa rusangu ra usey tulejena pa ndond pa kwov wom mulong wa mipak ya panretu, ni tukutwishap kand kwakam mu mudimu wa kulejan.
4. Ov, mutapu ik tukutwisha kukudish rukat?
4 Kukudish Rukat: Ov, mutapu ik tukutwisha kukudish rukat mulong wa antu? Kusutil ku kumekesh rukat ramekeshau kudi Yehova ni Mwanend ni kusutil ku mashakamin ma muspiritu mameningau kudi antu a mu teritwar. (Mar. 6:34; 1 Yoh. 4:10, 11) Rukat retu piur pa uyakin wa mu Bibil rikez kukul kusutil ku kwilej kwa panretu kwa chisu chawonsu ni ku kutongijokin pa mifund. Rukat ridi chimwing cha ku yikunku ya dibuj dia muspiritu. (Gal. 5:22) Chawiy lel, tufanyidin kumwit Yehova spiritu utumbila ni kumwit chakwel atukwasha kukul mu rukat. (Luka 11:13; 1 Yoh. 5:14) Chikalap nchik malejan metu ma kumujimbu, uman wetu tukweta mu uyakin, ap ukaliweny wetu wa chivadik, tukutwish kwikal alej a Bibil ayifuvu kusutil ku kumekesh rukat.