Kangal Wov Wom—wa Kwikal Nich Program Ukwatikena
1. Ov, mulong wak antu amwing idjidjekining kutakel dilejan dia Bibil?
1 Antu amwing idjidjekining kutakel dilejan dia Bibil mulong akwet program ukwatikena. Kumutakel mwin kwilej Bibil kwitining chisu. Chisu chiswiridin mulong wa kurijek dilejan ap kuditakel ni kumukwash mwin kwilej chakwel apandakana yikokujol yend. Kambuy Paul walonda anch ndiy washesha mupim wend mulong wa kuyikwash in Tesalonik chakwel ashikena ku kumwijik Yehova. (1 Tes. 2:7, 8) Ov, mutapu ik tukutwish kutakel dilejan dia Bibil ap anch tukwet program ukwatikena nakash?
2. Ov, mutapu ik kumukat Yehova kukweting chibachik pa mutapu tusadidininga chisu chetu?
2 Kumwifukwil Yehova Kwitining Chisu: Uyakin umekeshining patok anch difukwil ditining chisu. Chilakej, twitekidining chisu pakad kujing cha ku kumangan ku yikumangan, cha kwipan mu mudimu wa kulejan, cha kutang Bibil ni cha kulembil. Muntu watena kal ukwatikena nakash ukutwish kwikal nich musangar wa kusutish chisu pamwing ni mbay nend wa uruw. Tufanyidin kwikal nich musangar uvud mud ik wa ‘kusutish chisu’ mu kumwifukwil Yehova mulong tumukatining. (Efes 5:15-17; 1 Yoh. 5:3) Kwambatan nich mazu ma Yesu, chikunku cha usey cha difukwil dietu chidi chikunku cha mudimu wa kwikadish in kwilej. (Mat. 28:19, 20) Kutongin pa mudimu winou kukez kutukwash tulika kwov wom wa kwitiy chisend cha kutakel dilejan dia Bibil.
3. Ov, mutapu ik tukutwisha kutakel dilejan dia Bibil ap anch mikadil yikangeshin program wetu wa kusal mudimu wa kulejan?
3 Ov, chom ik tukutwisha kusal anch tukwatiken ni mudimu, milong ya ukash wa ku mujimbu ap yisend ya uteokras? In kulejan amwing akutwish yisu yimwing kutakel dilejan dia Bibil kusutil ku telefon ap ku ordinater. Antu akweta program ukwatikena nakash nich milong ya ukash wa ku mujimbu irijekining chakwel in kwilej eza ku yikumbu yau mulong wa dilejan. Amwing atenchika chakwel mwin kulejan ukweta chisu ayikwasha ni atakela malejan mau anch kakwetap chisu.
4. Ov, yiyukish ik yidiokilinga mu kwipan mudimu wa kutakel dilejan dia Bibil?
4 Paul watana musangar uvud mu kupan chisu chend ni usu wend mulong wa kuyikwash antu akwau kwilej uyakin. (Mid. 20:35) Chisu chashinshikidinay pa mabuj mend ma mudimu wasalay mu Tesalonik, ndiy washikena ku kumujikitish Yehova. (1 Tes. 1:2) Musangar wetu ni mazang yikutwish kukul anch twovilap wom wa kwikal akwatikena nich program wa kwipan mu mudimu wa kutakel dilejan dia Bibil.