Yom Yikutwisha Kukukwash Kwilej Pakad Kujing

OV, CHIKUKASIKEDINING kwilej Bibil rubing rawonsu? Ov, yisu yimwing kwilej Bibil kukat kukuletin chisungidik? Yisu yimwing yom yiney yikat kutushiken etu awonsu. Pakwez tongijokin piur pa yom yimwing tukata kusal rubing rawonsu, mud kwowal mem. Kwowal mem kukat kusend chisu ni usu, pakwez kupwa kwa kwowal tukat kwov kamu pee! Anch twilej Bibil tukutwish kand kwiyov mwamu. (Efes 5:26) Shinshikinaku yom yimwing yikutwisha kukukwash:

• Itekina program. Kwilej Bibil kud pakach pa ‘yom yida ya usey nakash’ yifanyidinay Mwin Kristu kulik kudiburil. (Fil. 1:10) Mulong wa kulimish program wey, fund dichuku ni saa pa dipaper kupwa yiteka patok. Ap ukutwish kutek alarm pa telefon wey mulong wa kukuvurish chisu chikemp kurutu kwa kusambish kwilej.

• Tond chisu ni mutapu wa kwilej uda uwamp kud ey. Ov, chikukasikedining kushinshikin nawamp pa yom utangina mu chisu chilemp ap tupamp tuvud? Amwiney wij nawamp mashakamin mey. Komb ileja kukwatijan ni mashakamin mey. Anch wovilap ja kwilej pa chisu chiwatenchikang, ukutwish kwilej ap mu aminit dikum kwau. Kusutin kwilej ap mu chisu chikemp mwamu, ukutwish kwilej yom yivud nakash. Ni pamwing ap kupwa kwa aminit dikum inay witekinang, ukutwish kwikal ni impu ya kwilej yom yivud nakash mu chisu chilemp.​—Fil. 2:13.

• Tond kurutu kwa chisu yom ukwileja. Anch washakam ni kusambish chad kutongijokin yom ukwileja, ukutwishap kamu ‘kusadin nawamp chisu chey’ (Efes 5:16) Umen nchik anch wapakish kufund list wa mitu ya milong ukatina kwilej? Chilakej, anch kud chom wakad kutesh nawamp, chiweja pa list. Ni kwinsuden kwa dilejan dawonsu, ukutwish kuwej yitongijok piur pa yom yikwau ukatina kwilej ku list wey.

• Swimp anch chitin kusal mwamu. Yida ya usey nakash, yid kwilej rubing rawonsu. Chawiy anch chitin kusal mwamu, swimp dichuku, chisu cha kwilej, uvud wa aminit usutishina mu kwilej, ni yom ya kwilej.

Anch twikal ni chaku cha kwilej rubing rawonsu, tukutwish kutaninamu nakash. Tukukasikesh urund wetu ni Yehova, tukwikal ni manang ni tukwiyov kamu pee!​—Jos. 1:8.