Program wa Dijuku—Dilejan dia Dijuku
1 Chipan chijim nakash ukutwishanya kupan en anvaj in Kristu kud anen ridi rukat ren mulong wa Yehova. Ndond ya usey yikutwisha kusadikin chinech yidi “piukushakamanya mu yikumbu yen” mulong wa kwilej Bibil mu dijuku rubing ni rubing. (Kuv. 6:5-7) Ap anch ukwet mbay mwin kwitiy, ushich mu dijuku diaurikina mu ritiy, ap udi nvaj mujich, ukutwish kuyikwash anend kusej kud ey ni kud Yehova kusutil ku kwikal nich dilejan dia dijuku chisu chawonsu.
2 Kusambish Dilejan dia Dijuku: Ruzau ra kusambish kudi kwikal nich chaku cha kwilej mu dijuku. Anch wijap nawamp chisu cha kusambish dilejan, ov ukutwishap kwambambin mulong winou mu dijuku? (Jinsw. 15:22) Anch ukwetany an akemp, ukutwishany kutond kwilej yikunku yiswimp yivud mu rubing. Ijikany program ufanyidina mulong wa dijuku dien. Tekany pa program wa dijuku dien chisu chiwanyidina mulong wa dilejan, ni kwatany mupak wa kumulamat.
3 Yom ik ukutwishanya kwilej? Amwing arijekining dilejan dia kurutu dikezau kushinshikin ku Dilejan dia Buku dia Chikumangen ap Dilejan dia La Tour de Garde. Akwau akat kushinshikin malejan marijekinau kamu mulong wa an akemp. Tatuku ukweta mwan ikundj ni changadim walonda anch: “Chom chikata kusal dilejan dietu kwikal chisu chiwamp nakash cha rubing mulong wa an chidi mulong tukat kusengan masengan madiokila mu Recueil d’histoires bibliques. Makat kuyishik nakash ni kuyikwash kwov kurumburik mu chilik cha kwel anch uvud wa maparagraf twisambidina ukwetap usey ujim.”
4 Kwilej Rubing ni Rubing: Dilejan dia dijuku difanyidin kusadik pakad kujing ni disangeridinau kurutu kud yid yawonsu ya dijuku. Kuswapal kampand mud piur pa dichiku ni chisu kukutwish kwitiyik mulong wa mikadil yakad kuchingejin yikushikena. Kukutwish kand kwikal yisu ya maswir ma kuswimp mutu wa mulong ujim. Pakwez kuswimp kwin kwawonsu kuswiridikina kufanyidinap kulet kanrumbangesh ku program wa dilejan dia dijuku watekau kal. Mu dijuku dimwing, changadim ulondil anch: “Ang muten wa dilejan dietu ukimbin kuswimp, chisu ni chisu Tatuku ukat kufund muten wa program wa katat ni kumutek pa ndond tukutwisha kuman etu awonsu mu dijuku, mulong wa kwijik nawamp chisu dikusambisha.” Usu winou aushimen mud ik wa kulam dilejan dia dijuku diakad kujing! Piudandamedinany kulidil anen ‘mwi nkand ni kubabesh kwa Yehova,’ umekeshinany rukat ren mulong wa awiy ni mulong wa Tatukwetu wa mwiur.—Ef. 6:4.