Mutapu Ukutwisha Yidi ya Dijuku Kusadil Pamwing —Mu Dilejan dia Baibel
1 Uyakin ukat kupan dirumburik ni rutong ra kashinsh ku mwom wa dijuku, pakwez yibudikin yiwamp yikwiyezilangip bwat. Chitining chisu ni usu chakwel kutung chikumbu chikasikena muspiritu. Pa chinech, yidi ya dijuku yifanyidin kusadil pamwing nakash. Chikunku chinech chidi cha kusambish mu yikunku yisatu yikwisambina mutapu ukutwisha majuku kusadil pamwing mulong wa kukulish yaku yiwamp ya kwilej.
2 Mu Kutang Baibel Dichuku ni Dichuku: Jinswir 24:5 ulondil anch “muntu ukweta ronganyin ukat kwiwej usu.” Ronganyin ritambwidilau ku kutang pakad kujing Dizu dia Nzamb ripanining usu wa mukach uswiridikina chakwel kuchidij mwom wa muspiritu ku yoziu ya Satan. (Kus. 1:1, 2) Ov, tutangining Baibel pamwing dichuku ni dichuku mu dijuku? Program wa Shikol ya Mudimu ya Uteokras upanin “Program wa Kuwejin wa Kutang Baibel” rubing ni rubing ra muvu. Chakwel kulondul program winou chifanyidin kwitekiliku mu dijuku, aminit dikum ku dichuku. Tutondany chisu chifanyidina, mud pa chisu cha yisakol ya pamanch, kwinyim kwa yakudia ya urel, ap kurutu kwa kulal, mulong wa kutang Baibel ni kushinshikin mufund wa dichuku mu broshir Examinons les Écritures chaque jour. Tutekany mujikit winou mu program wa pichuku pichuku wa dijuku dietu.
3 Mu Kwilej Pamwing Rubing ni Rubing: Dilejan dia dijuku dia Baibel difanyidin kwikal chisu chimwing chijim. Muntu ni muntu mu dijuku ufanyidin kukwatikesh dilejan dined nich kujijaman. Mutu wa dijuku ukusot kushinshikin nswir ja dijuku pakutonday milong ya kwilej, dichuku, chisu ni kulep kwa dilejan. Tutekany dilejan dia dijuku pa ndond ya kusambish mu program wetu wa rubing ni rubing. Kangal twalik milong yakad usey yidirumbangesha.—Filp. 1:10, 11.
4 Tatuku umwing wa dijuku wadinga ni kutambul chisu chivud nshing ja milong ya kwisak kol kwend, wadiosha nshing ya telefon pa chisu cha dilejan dia dijuku. Anch in kuland ashik ku chikumbu, wadinga ni kuyit kwinungin ku dilejan ap kuchingel kushik ni pakupwishinau. Tatuku wading ujijamen anch chom ap chimwing pikil charumbangesh dilejan dia dijuku. Chinech chikala ni usu ujim padi aanend. Ni mijikit yend ya kwisak, yendanga nawamp.
5 Chisangarishin mud ik anch yidi ya dijuku yisadila pamwing mu mijikit ya muspiritu! Usu wetu ushishamena utusadila mulong wa kwinungin sens mu dilejan dia dijuku ukutuletin chiyukish cha Yehova.—Kus. 1:3.