Yakul Ku Yipul Yen

◼ Ov chifanyidin kupan rapor wa dilejan dia dijuku ku chikumangen?

Anch nvaj Mukristu utakedil dilejan dia Baibel dia dijuku ni mudi an akad kubatishiu, nvaj ufanyidin kupan uvud wa saa umwing pa rubing, kuchirikinamu kusu kumwing pa rubing, ni dilejan dia Baibel dimwing pa ngond. Wawiy mutapu chidia ap anch dilejan disadil asaa avud, ap akat kuditakel tupamp tuvud pa rubing, ap anch ukat kwilej ni mwan ni mwan panrend.​—⁠Tal buku Notre ministère, p. 105.

Pakwez anch in chikumbu awonsu adi Atuman’a Yehova abatishau kal, pa chinech chikalap nchik chisu ap dilejan adinad yikupanau mud rapor wa mudimu wa chingand (ching anch mudi mwan wilejina buku wa kaad kupwa kwa kutambul dibatish). Chidi mulong rapor wa mudimu wa chingand wa chikumangen ulejen chakusambish yisadikina mu kulejan rusangu ruwamp ni mu kulejan uyakin wa Baibel kud antu akad atushalapol a Yehova ilambwila kal ni kubatishiu. (Mat. 24:14; 28:​19, 20) Pakwez, winou udiap mutapu wa kukepish usey wa kutakel dilejan mud dined dia dijuku pakad kujing.

Chidi chisend cha anvaj Akristu kwilej ni anau. Anvaj aswiridina ukwash mu kutenchik ap kurijek dilejan dia dijuku diau akutwish kuyipul amakurump mulong wa kutambul ukwash. Anch chidi cha manangu anch mwin kulejan windjing atakela dilejan dia Baibel ni mwan ikundj ap mband wakad kubatishiu udia mu dijuku dia Akristu dinungina ni chikumangen, ukutwishany kwisamb ap ni kalam ntakel ap ni kalam’a mudimu. Anch dilejan dined ditiyik, uditakedila ukutwish kupan rapor mud kamu mutapu usadikininga dilejan diawonsu dia Baibel.

Kuyilidin an mu jinjil ja Yehova kwitining chisu chivud nakash ni usu kupandikanamu yikata kumekan pa rapor wa mudimu wa chingand. (Kuv. 6:​6-9; Jinsw. 22:⁠6) Chifanyidin kuyijikitish anvaj Akristu mulong wa kusend chisend chau chilimina cha kuyilil an “mu kuyikand ni malejan ma [Yehova, NW].”​—⁠Ef. 6:⁠4.