In Kulejan a Rusangu Ruwamp

YEHOVA watwinka chilakej chiwanyidina tufanyidina kulondul—Mwanend Yesu Kristu. (1 Pita 2:21) Anch muntu wikal mwin kwilej wa Yesu, muntu winou ufanyidin kulejan rusangu ruwamp mudi kashalapol wa Nzamb. Mulong wa kumekesh anch mudimu winou ukat kukasikeshan mu spiritu, Yesu walonda anch: ‘Ezany kudi am, en awonsu uziyinanya mulong wa yisend yikasikena, chad am nikez kukwambulany. Itwikany mpand yam ni ikalany in kwilejam, chad mwamu mipim yen yikwiswedish, mulong am nishimpishin muchim ni kwitudish.’ (Mat. 11:28, 29) Kushilamu kwend kudi kwakin kudi muntu mwawonsu witiyina kutazuk kwinoku!

² Mulong udi Ntakel wa Atushalapol a Nzamb, Yesu wayitazuka antu amwing kwikal in kwilejend. (Mat. 9:9; Yoh. 1:43) Wayifumba mu mudimu wa kulejan ni wayituma kusal mudimu wasalay ndiy. (Mat. 10:1–11:1; 20:28; Luka 4:43) Kupwa, wayituma antu akwau 70 mulong wa kulejan rusangu ruwamp piur pa Want wa Nzamb. (Luka 10:1, 8-11) Yesu payitumay in kwilejend, wayileja anch: “Muntu mwawonsu ukukuteshanya en, wantesh kal am. Muntu mwawonsu ukukulikanya en, wanlik kal am. Muntu mwawonsu ukwinlika am, wamulik kal kand wantuma am.” (Luka 10:16) Kusutin mazu minam, Yesu wamekesha anch in kulejan akwet chisend chijim nakash. Afanyina kwikal aruu a Yesu ni a Nzamb wa Piur Nakash! Chidi kand mwamu nlel unou kudi muntu mwawonsu witiyina kutazuk kwa Yesu: ‘Ez wikal mwin kwilej wam.’ (Luka 18:22; 2 Kor. 2:17) Antu awonsu itiyina kutazuk kwinoku akwet chisend chidiokila kudi Nzamb cha kulejan rusangu ruwamp piur pa Want ni kwikadish in kwilej.—Mat. 24:14; 28:19, 20.

³ Mulong twitiya kutazuk kwa Yesu mulong wa kumulondul, twatambula chiyukish cha ‘kushiken kumwijik’ Yehova Nzamb ni Yesu Kristu. (Yoh. 17:3) Twileja yijil ya Yehova. Ku ukwash wend, twatwisha kukarumun manangu metu, kudjal wuntu usu ni kuswimp mwikadil wetu chakwel ukwatijana ni yijil yitentamina ya Yehova. (Rom 12:1, 2; Efes 4:22-24; Kol. 3:9, 10) Muchim wetu wa kujikitish watubachika kwipan kudi Yehova ni kumekesh kwipan kwinoku kusutil ku kutambul dibatish. Anch twatambul dibatish, tukat kwikal chad in kulejan a Want.

⁴ Tufanyidin chisu chawonsu kuvurik anch mudimu wa Nzamb chifanyidin kuusal ni makas matok ni muchim wa zwang. (Kus. 24:3, 4; Isay 52:11; 2 Kor. 6:14–7:1) Kusutin ritiy mudiay Yesu, twikala ni kom kadia zwang. (Heb. 10:19-23, 35, 36; Kuj. 7:9, 10, 14) Kambuy Paul wayiyula in Kristu kusal yom yawonsu mulong wa uyaj wa Nzamb chakwel kangal ayipwakesh antu akwau. Kambuy Pita wamekesha usey wa kwikal ni yaku yiwamp mulong wa kuyipwit antu akad kwitiyij ku uyakin. (1 Kor. 10:31, 33; 1 Pita 3:1) Mutapu ik ukutwisha kumukwash muntu chakwel awanyisha yom yitinau mulong niyend ikal mwin kulejan wa rusangu ruwamp?

IN KULEJAN ASU

⁵ Kudiosh chisu ukusambisha kutakel dilejan dia Bibil ni muntu usangaredina, mukasikesha chakwel ayileja antu akwau piur pa yom yilejinay. Ukutwish kuyilej anamakwend, arund nend, antu asadinay nend mudimu, ni antu akwau asankenay mwi njil. Kusal mwamu kudi kwa usey mulong wa kuyifundish antu asu chakwel ikala in kwilej a Yesu Kristu mudi in kulejan a rusangu ruwamp. (Mat. 9:9; Luka 6:40) Pakudilay muntu musu mu spiritu ni kwijidin kupan uman wa kukashimwish, kakwidjidjekap kumekesh maswir mend ma kusal mudimu wa kulejan.

KUWANYISH YOM YITINAU

⁶ Kurutu kwa kumwitiy muntu chakwel asambisha kulejan ku chis ni chis kapamp ka kusambish, ufanyidin kwikal ni kashinsh anch uwanyishin yom yimwing yitinau. Muntu ututwadina mu mudimu wa kulejan, wimekeshin amwinend patok mudi Kaman wa Yehova. Kusal mwamu kumekeshin anch muntu winou ushich kukwatijan ni yijil yitentamina ya Yehova ni ukutwish kwikal mwin kulejan wakad kal kutambul dibatish.

⁷ Piwilejina ni muntu ni kushinshikin mbil ja Bibil, ukushiken kwijik nawamp mashakamin mend. Ukutwish kuman anch ushich kukwatijan ni yom yilejinay. Pakwez kudi yom yimwing yitadina mashakamin ma mwin kwilej yikutwishau amakurump kwambamb ni ndiy pamwing niyeyey.

⁸ Ntakel wa chisak cha amakurump ukutond amakurump aad (umwing ufanyidin kwikal wa mu komite wa mudimu) mulong wa kwambamb yom yiney pamwing niyey ni mwin kwilej wa Bibil. Mu yikumangen mudia amakurump akemp, mukurump umwing ni nkwash wa mudimu uwanyidina akutwish kusal yom yiney. Akadivar atondangau afanyidin kwambamb nau pakad kulab. Pakwez, anch atambul uruu kurutu yikumangan ya chikumangen yisambisha, anch mwin kwilej ukimbin kwikal mwin kulejan, ukutwish pamwing ap kwambambany ni ndiy pamwing ni mulej wend kupwa kwa yikumangan. Mambamb mafanyidin kwikal masangareshina. Kurutu amwitiya muntu kwikal mwin kulejan wakad kal kutambul dibatish, chifanyidin kushinshikin yom ey:

• Witiyijin anch Bibil didi Dizu dipepidilau kudi Nzamb.—2 Tim. 3:16.

• Wij ni witiyijin mafundish ma pa dishin ma Bibil, anch amwipul yipul ukwakul kukwatijan ni Bibil kulik kukwatijan ni mafundish ma marelijon ma makasu ap kukwatijan ni yitongijok yend.—Mat. 7:21-23; 2 Tim. 2:15.

• Uziyidin kwi mbil ja kwimbomb pamwing nau antu a Yehova ku yikumangan ya win Kristu anch ukutwish kusal mwamu.—Kus. 122:1; Heb. 10:24, 25.

• Wij yom yifundishinay Bibil piur pa yom ya masandj, kuwejinaku ni makaj, rupad, utun, ni ushich kukwatijan ni mafundish minam. Anch mwin kwilej ushich ni muntu wa mujimbu ukwau wakad kwikal mwanamakwend, antu inay aad afanyidin kwikal atijadina.—Mat. 19:9; 1 Kor. 6:9, 10; 1 Tim. 3:2, 12; Heb. 13:4.

• Uziyidin kwi mbil ya Bibil yilikishina kuleu ni kulik kusadin mwon ap yom yikwau yikata kulewishan. —2 Kor. 7:1; Efes 5:18; 1 Pita 4:3, 4.

• Wij usey wa kwipuk arund ayimp.—1 Kor. 15:33.

• Walikin kal rawonsu kubombakan ni yitenchik ya marelijon ma makasu. Walikin kal kukumangan nau pamwing ap kuyikwash mu midimu yau. —2 Kor. 6:14-18; Kuj. 18:4.

• Walikin kal kwiyandjik mu milong ya politik wa mangand minam.—Yoh. 6:15; 15:19; Jak. 1:27.

• Witiyijin ni ushich kukwatijan ni yilondinay Isay 2:4 piur pa milong ya michid.

• Ukatin chakin kamu kwikal Kaman wa Yehova. —Kus. 110:3.

⁹ Anch amakurump kakwetap kashinsh piur pa mutapu utonginay mwin kwilej pa yipul yiney, afanyidin kumwipul pamwing ap mu kusadin maverse majimbwilau mulong wa kwambamb nend. Chidi cha usey mwin kwilej ijika nawamp anch antu alejena pamwing nau Atuman a Yehova afanyidin kwikal ni mashakamin makwatijadina ni yom yitinau mu Bibil. Kwakul kwend kukuyikwash amakurump ijika anch mwin kwilej wij yom yimwitinau kusal ni anch uwanyishin yom yitinau mu chilik kanang mulong wa kusambish kulejan.

¹⁰ Amakurump afanyidin kumulej mwin kwilej pakad kulab anch uwanyishin yom yitinau. Yisu yivud, chiwapin kumulej mwin kwilej kupwa kwa mambamb. Anch uwanyishin yom yitinau, amakurump afanyidin kumwak ni musangar mudi mwin kulejan musu. (Rom 15:7) Afanyidin kumulej anch ufanyidin kusambish kusal mudimu wa kulejan pakad kulab ni ukupan rapor wa mudimu kwinsudien kwa ngond. Amakurump afanyidin kumurumburil mwin kwilej wa Bibil uwanyishina yom yitinau padiay mwin kulejan wakad kutambul dibatish anch ang wapan rapor wend wa kusambish, akumusadin Fish wa Mwin Kulejan wa Chikumangen mu dijin diend ni akumutek mu madosiye ma chikumangen. Afanyidin kumulej anch amakurump akusanger rapor wa mudimu wa kulejan ukuletay ngond ni ngond.

¹¹ Kwijikijan nawamp ni mwin kulejan musu ni kusanger yom yisadinay kukumukwash kuya kurutu. Kukumukwash kand kupan rapor wend ngond ni ngond ni kusal usu nakash mulong wa kumusadin Yehova.—Fil. 2:4; Heb. 13:2.

¹² Anch amakurump aman anch mwin kwilej wa Bibil uwanyishin yom yitinau mulong wa kulejan, afanyidin kumwinkish buku Arijekinau Mulong wa Kusal Rusot ra Yehova. Kupwa kwa kupan rapor wend wa kusambish, akwijikish ku chikumangen anch muntu kanang udi kakat mwin kulejan wakad kutambul dibatish.

MUTAPU WA KUYIKWASH ANSAND

¹³ An akemp akutwish niyawiy kwikal in kulejan a rusangu ruwamp. Yesu wayakanga an akemp ni wayiyukisha. (Mat. 19:13-15; 21:15, 16) Ap anch anvaj awiy akweta chisend cha kuyikwash anau, antu akwau mu chikumangen akutwish kuyikwash an inay akatina kwipan mu mudimu wa kulejan Want. Anch udi nvaj, chilakej chey chiwamp mu mudimu wa kulejan chikuyikasikesh aney nakash chakwel ikala ni mushiku mu mudimu wa Nzamb. Anch mwan ukwet mwikadil uwamp ni ukatin amwinend kulejan yitiyij yend kudi antu akwau, mutapu ik chifanyidina kumukwash mwan winou?

¹⁴ Chiwapin nvaj ambamba ni umwing wa amukurump a mu Komite wa Mudimu wa Chikumangen chakwel isamba nend mulong wa kwijik anch mwan uwanyishin yom yitinau chakwel ikala mwin kulejan. Ntakel wa chisak cha amakurump ukutond amakurump aad (umwing pakach pa amakurump inay ufanyidin kwikal mu komite wa mudimu) chakwel ambamba ni mwan ni anvajend ap muntu ushichay nend adia mu uyakin. Anch mwan ukwet ronganyin ra pa dishin piur pa uyakin wa Bibil ni anch umekeshin patok anch ukatin kwipan mu mudimu wa kulejan, chinech chimekeshin anch ukuya kurutu nawamp. Kupwa kwa kushinshikin yom yiney ni yikwau yitadina antu apamina kal, amakurump aad akutwish kwijik anch mwan uwanyidin kwikal mwin kulejan wakad kutambul dibatish. (Luka 6:45; Rom 10:10) Pambambinau amakurump ni mwan, chidiap cha usey kwambamb ni mwan yom yitadina antu apamina kal.

¹⁵ Pambambinau amakurump ni mwan winou afanyidin kumujikitish mulong uyil kurutu ni kumukasikesh chakwel itekina mupak wa kutambul dibatish. Mulong anvaj asadin usu nakash mulong wa kumufundish mwan uyakin, chifanyidin niyau kuyijikitish. Mulong wa kuyikwash anvaj chakwel ayikwasha anau, amakurump afanyidin kuyilej anvaj kushinshikin mutu wa mulong ulondina anch “Uruu Kudi Anvaj in Kristu,” udia pa paj wa 165-166.

KWIPAN NI DIBATISH

¹⁶ Mulong washikedin kumwijik ni kumukat Yehova pa kuwanyish yom yitinau ni kwipan mu mudimu wa kulejan, ufanyidin kukudish urund ni ndiy. Mutapu ik ukutwisha kusal mwamu? Kusutin kupan mwom wey kudi ndiy ni kutambul dibatish mu mem.—Mat. 28:19, 20.

¹⁷ Kwipan kurumburikin anch akutond kal mulong wa mudimu utumbila. Kwipan kudi Nzamb kurumburikin kumulej mu malembil ni kumukan patok anch tukusadin mwom wetu mu mudimu wend ni tukuziyin mbil jend. Chirumburikin kwipan rawonsu kudi ndiy. (Kuv. 5:9) Winou udi mulong wa muntu panrend. Kwikil muntu ukutwisha kwipan pa ndond yey.

¹⁸ Pakwez, ufanyidin kusal yom yivud kusutamu kumulej Yehova ku ujindj anch ukatin kwikal kashalapol wend. Ufanyidin kumekesh kudi antu akwau anch wipanin kal kudi Nzamb. Ukumekesh mwamu kusutin kutambul dibatish mu mem, mudi mwasalay Yesu. (1 Pita 2:21; 3:21) Anch wakwatin kal mupak wa kumusadin Yehova ni anch ukatin kutambul dibatish, yom ik ufanyidina kusal? Ufanyidin kumulej ntakel wa chisak cha amakurump. Ntakel wa chisak cha amakurump ukutond amakurump kushalijan chakwel isamba ney mulong wa kwijik anch uwanyishin yom yitinau mulong wa kutambul dibatish. Mulong wa kwijik nsangu jivud, tal mutu wa mulong ulondina anch “Uruu Kudi Mwin Kulejan Wakad Kutambul Dibatish,” udia pa paj wa 167-169 wa buku winou ni, “Yipul ya Kuyipul Antu Akatina Kutambul Dibatish,” udia pa paj wa 170-208.

RAPOR ULEJENA KUYA KURUTU KWA MUDIMU WA KULEJAN

¹⁹ Mu kusut kwa mivu, rapor wa pa mangand mawonsu ulejena kuya kurutu kwa difukwil diakin ukat kuyisangaresh antu a Yehova. Kudiosh kwayilejinay Yesu Kristu in kwilejend anch rusangu ruwamp akurilejan pa mangand mawonsu, in Kristu akin akat kushinshikin mutapu ukusadika mudimu winou.—Mat. 28:19, 20; Mar. 13:10; Mid. 1:8.

²⁰ In kwilej a kusambish a Yesu asangara pateshau rusangu piur pa kuya kurutu kwa mudimu wa kulejan. (Mar. 6:30) Mukand wa Midimu utulejin piur pa chisu chatambulau in kwilej piswimp 120 spiritu utumbila pa Pentekot wa muvu wa 33 C.C. Pakad kulab uvud wa in kwilej washika 3 000 ni kupwa washika 5000. Rapor ulejen anch ‘Yehova wadandamena kuyiwejinaku dichuku ni dichuku antu afanyina kupand’ ni anch “in kupesh avud ading ni kuziyil ku ritiy.” (Mid. 1:15; 2:5-11, 41, 47; 4:4; 6:7) Kukasikesh mud ik pateshau in kwilej nsangu jinej! Marapor minan mayikasikesha kudandamen ni mudimu wayinkau kudi Nzamb, chikalap nchik rupompat rikash ra antakel a relijon a in Yuda!

²¹ Piswimp ni muvu wa 60 ni wa 61 C.C., Paul walejana mu mukand wend kudi in Kolosay anch rusangu ruwamp ‘rikat kusong mabuj ni kupalangan mu mangand mawonsu’ ni anch ‘arilejana mu yitang yawonsu yidia mwinshin mwa diur.’ (Kol. 1:5, 6, 23) Mulong in Kristu a kusambish aziyina ku Dizu, spiritu utumbila wayikwasha kusal mudimu ujim wa kulejan kurutu disudiel diyishikena in Yuda mu muvu wa 70 C.C. Kukasikesh mud ik pateshau in Kristu inay ashinshamena rapor wa yom yasadika!

²² Chilik chimwing ni nlel, dirijek dia Yehova disadin usu wa kulam rapor wa mudimu usadikina ni uwanyishina uprofet wa Mateu 24:14, ulondina anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.” Mulong tudi atushalapol ipanina kal a Nzamb, tukwet mudimu tufanyidina kusal swa swa. Tufanyidin muntu ni muntu kusal usu wa kwipan nakash mu mudimu wa kulejan kurutu disudiel dieza. Yehova ukushinshikin anch mudimu winou usadika, ni anch twipanamu tukutambul yiyukish ya Yehova.—Ezek. 3:18-21.

RAPOR WEY WA MUDIMU WA KULEJAN

²³ Yom ik tukata kufund mu rapor? Dipaper dia Rapor wa Mudimu wa Kulejan disadinau kudi dirijek dilejen yom tufanyidina kufund. Pakwez, yom yilondwilaku ey yikutwish kwikal ya usey.

²⁴ Mu mulong wa “Mikand (Twashila ni Twatumina ku telefon),” tukat kufundamu uvud wa mikand twashila ap twatumina ku telefon kudi antu akad kwikal Atuman. Mu mulong wa “Mavideo Twatadishina” tukat kufundamu uvud wa mavideo twayilejina antu.

²⁵ Mu mulong wa “Tupamp Wayichirikidina Antu,” tukat kufund uvud wa tupamp twachirikina mulong wa kuyital antu asangaredina uyakin akad kwikal Atuman. Mulong wa kuchind anch wamuchirikinang muntu, ufanyidin kwikal muntu wasangaredina uyakin wambambina nend. Nvaj ukutwish kuchind kumuchirikin kapamp kamwing pa rubing anch watakel Difukwil dia mu Dijuku mudia mwan wakad kal kutambul dibatish. Ukutwish kand kuchind kumuchirikin anch waya kumutal ku chikumbu chend, anch wamufundin mukand, anch wamutazuk ku telefon, anch wamufundin mesaj ku telefon ap wamushil mikand kwol kwend, mudi nimero musu wa gazet. Chisu chawonsu anch watakel dilejan dia Bibil, ukutwish kuchind kumuchirikin.

²⁶ Ap anch dilejan dia Bibil dikat kusadikang rubing ni rubing, ukuchind dilejan dimwing kwinsudiel kwa ngond. In kulejan afanyidin kufund uvud wa malejan ma Bibil kushalijan matakedilau mwi ngond wa kabuj. Ukutwish kand kuchind dilejan dia Bibil anch ukat kwilej ni muntu wakad kal kwikal Kaman. Ukutwish kuchind dilejan dia Bibil anch wilejin ni mukadivar ap nambaz walikina kal kusal mudimu wa kulejan anch akulej kusal mwamu kudi mukurump umwing wa mu komite wa mudimu, ap ni muntu musu watambula kal dibatish chad kand kal apwish kwilej buku Chifundishinay Bibil ap “Rukat ra Nzamb.”

²⁷ Chidi cha usey kupan uvud wa “Asaa” akin a mudimu wa kulejan wasadina. Asaa inay chidi chisu wasadina mu mudimu wa kulejan ku chikumbu ni chikumbu, kuyichirikin antu, kutakel malejan ma Bibil, ap kupan uman wa kukashimwish ap wa patok kudi antu akad kwikal Atuman. Anch in kulejan aad alejen pamwing, awonsu akuchind chisu, pakwez umwing ndiy ukuchinda kumuchirikin ap dilejan dia Bibil. Anvaj aad ipanina mulong wa kufundish anau chisu cha Difukwil dia mu Dijuku akutwish kuchind saa umwing pa rubing. Mukadivar ukutwish kuchind chisu chisutishinay pasadinay diskur dia antu awonsu. Mwin kukarumun diskur dia antu awonsu ukutwish niyend kuchind chisu. Kudi midimu ya usey yakad kwit kuchind chisu, mudi kwirijek mulong wa mudimu wa kulejan, kukumangan ku chikumangan cha mudimu wa kulejan ap chisu cha kupimaku mulong wa kudia pitudia mu kulejan.

²⁸ Mwin kulejan mwawonsu ufanyidin kulondul kom kend kafumbinau kudi Bibil mulong wa kwijik nawamp chisu chasutishangay mu mudimu wa kulejan. In kulejan amwing akat kulejan mwi ndond mudia antu avud, pakwez akwau akat kulejan mwi ndond mudia antu akemp mwitina kwend nakash mulong wa kutan antu. Materitwar mashalijangen, ni in kulejan akwet yitongijok kushalijan piur pa mudimu wa kulejan. Chisak Chitakedila chikatap kushindil chikumangen cha pa mangand mawonsu piur pa mutapu wa kuchind chisu tusadina mu mudimu wa kulejan, ni kwikil muntu watondau mulong wa kurumburishan pa mulong winou.—Mat. 6:1; 7:1; 1 Tim. 1:5.

²⁹ Chifanyidin kupan rapor wa asaa akabuj wasadina mu mudimu wa kulejan. Pakwez chikutwishap kwikal mwamu kudi mwin kulejan wananapina kal nakash, wakad kutwish kubudik pol ap udia mu chikumbu cha kulamin amapal, ap ukweta yikangesh yikwau yikash. Mwin kulejan mudi winou ukutwish kupan ap aminit 15. Ap anch wapan uman wa aminit 15 mwi ngond wakabuj, ufanyidin kupan rapor winou. Akumuchind mudi mwin kulejan wa Want ukata kusal mudimu wa kulejan ngond ni ngond. Mupak winou uyitadin kand in kulejan akweta yikangesh yikash mu chisu kanang, pamwing ap katwishinap kubudik pol mwi ngond wakabuj ap ni kusut mulong wa mayej makash ap chom chikwau cha ubaj. Mupak winou uyitadin ching antu akweta yikangesh yikash ya ku mujimbu. Komite wa mudimu ndiy ufanyidina kushinshikin mulong wa kwijik nany uwanyidina kukwatin mupak winou.

FISH WA MWIN KULEJAN WA CHIKUMANGEN

³⁰ Rapor wey wa mudimu wa kulejan wa ngond ni ngond akat kumufundang mu Fich wa Mwin Kulejan wa Chikumangen. Mafish minam madiap ma in kulejan. Anch ukimbin kushemunik mu chikumangen chikwau, sal usu wa kuyilej amakurump a chikumangen. Kalam wa ujindj wa chikumangen chey chisu ukwit chakwel atuma Fish wa Mwin Kulejan wa Chikumangen. Anch kalam wa ujindj wa chikumangen chiwadia wij dijin dia chikumangen chiudia katat, ukusal usu wa kutum fish wey pamwing ni mukand wa kukwijikish nich. Mwamu, amakurump a chikumangen chey chisu akutwish kukwaak nawamp ni kuman mutapu wa kukwinkish ukwash wa mu spiritu uswirikedina. Anch umen anch ukusutishap angond asatu pakad kwikal mu chikumangen chey, dandamen amboku kutum rapor wey wa mudimu wa kulejan mu chikumangen chiwadia.

MULONG WAK TUKAT KUPAN RAPOR WA MUDIMU WA KULEJAN

³¹ Ov, ukat kuvuramenang yisu yimwing kupan rapor wey wa mudimu wa kulejan? Chakin kamu etu awonsu tukweting kuswir kwa kutuvurish. Pakwez anch tukwet chitongijok chiwamp piur pa kupan rapor ni twij mulong wak chidi cha usey kusal mwamu, chikutuswapel kuvurik kupan rapor wetu wa mudimu wa kulejan.

³² Antu amwing akat kwiyipul anch: “Mulong Yehova wij yom nisadina mu mudimu wend, mulong wak chidi cha usey anch nipana kand rapor wam ku chikumangen?” Chakin kamu, Yehova wij yom tusadina, ni wij anch tumusadidin nich muchim wetu wawonsu ni ap anch tusadin kwetu yom tutwishina kusal kukwatijan ni usu wetu. Pakwez vurik anch, Yehova wachinda uvud wa machuku masalay Nowa mulong wa kusong waat ni uvud wa mivu yasalau in Isarel mwi mpay. Nzamb walejana kufund uvud wa antu ading ashinshamena ni antu abwambwila. Wafundisha kand mutapu wakwatau pakemp-pakemp ngand ya Kanan ni yom yasalau ankalansambu a in Isarel ashinshamena. Inge, wafundisha tuyom tukemp tukemp tuvud piur pa midimu ya atushalapol end. Wasadila spiritu wend utumbila mulong wa kufund yom yiney, mulong wa kutulej anch chidi cha usey kufund rapor wakin.

³³ Jinsangu jidia mu Bibil jimekeshin anch rapor ni yom yasadika yafundau kudi antu a Yehova yidi yakin. Pakach pa jinsangu jivud jidia mu Bibil, chading chitin kufund uvud wakin mulong twijika nawamp jinsangu jinej. Shinshikin yilakej yilondwilaku ey yidia mu Disambishil 46:27; Kubudik 12:37; Ankalansambu 7:7; 2 Ant 19:35; 2 Jinsangu 14:9-13; Yohan 6:10; 21:11; Midimu 2:41; 19:19.

³⁴ Ap anch rapor wetu kakwetap yom yawonsu tukata kusal mu difukwil dia Yehova, rapor winou udi wa usey mulong wa dirijek dia Yehova. Mu mivu chitot ya kusambish, chisu chadiokalau in kwilej mu mudimu wa kulejan, amuleja Yesu “yom yawonsu yasalau ni yalejanau.” (Mar. 6:30) Yisu yimwing, rapor ukutwish kulejan yom yimwing tufanyidina kushinshikin nakash. Uvud ukutwish kumekesh anch twayil kurutu mu mudimu kanang, ap yisu yimwing anch tuyilap kurutu mu uvud wa in kulejan. Pamwing ap chifanyidin kuyikasikesh in kulejan ap mulong kudi milong yifanyidina kupwish ap kurijek. Atulam atadina mulong winou afanyidin kusal usu wa kushinshikin nawamp marapor ni kukimb mutapu wa kutenchik yom yikutwisha kukangesh kuya kurutu kwa mwin kulejan mwawonsu ap kwa chikumangen chakabuj.

³⁵ Rapor udi kand wa usey mu dirijek mulong wa kwijik kwisu kudia maswir nakash mu mudimu wa kulejan. Kwisu kuyila mudimu wa kulejan kurutu? Kwisu kwakad kuya mudimu wa kulejan kurutu? Mikand ik yidia ya usey mulong wa kuyikwash antu kwilej uyakin? Rapor ukat kukwash dirijek kuman mikand ik yifanyidina kubudish mulong wa mudimu wa kulejan mu jindond kushalijan pa mangand mawonsu ni kuman mutapu wa kuwanyish maswir minam.

³⁶ Antu avud pakach petu rapor ukat kutukasikesh nakash. Ov, tukatap kusangar anch twatesh rapor piur pa mudimu usadinau akadivar pa mangand mawonsu mulong wa mudimu wa kulejan? Rapor piur pa kuya kurutu ukat kutukwash kuman mutapu uyila dirijek dia Yehova. Yom yisadikina yikat kutusangaresh ni kutwinkish mushiku, yikat kutubachik kwipan nakash mu mudimu wa kulejan. (Mid. 15:3) Kusal mu kwovijan mulong wa kupan rapor wa mudimu wa kulejan kudi kwa usey ni kukat kumekesh anch tuyibangidin akadivar netu a pa mangand mawonsu. Mu mutapu winou, tumekeshin anch tuziyidin ku mipak yikwatinau kudi dirijek dia Yehova.—Luka 16:10; Heb. 13:17.

ITEKINA YOM UFANYIDINA KUSAL

³⁷ Tufanyidinap kwisikej mudimu wetu wa kulejan ni wa muntu mukwau. (Gal. 5:26; 6:4) Mashakamin ma muntu ni muntu mashalijangen. Pakwez, chikutwish kwikal cha usey kwitekin yom ufanyidina kusal ukutwisha kuwanyish mulong wa kuman mutapu tuyila kurutu mu mudimu wa kulejan. Kuwanyish yom yiney kukutusangaresh nakash.

³⁸ Chidi chakin anch Yehova udandamedin kukumangej antu mulong wa kuyichidij pa chisu cha “mar makash.” Tudi pa chirungu chiwanyidina uprofet wa Isay ulondina anch: ‘Mukemp ukez kwikal kanan, ni upandakena kukep muchid umwing wa dikand. Am Yehova, nikez kuyiswakej pa chisu chau.’ (Kuj. 7:9, 14; Isay 60:22) Chidi chisend chijim nakash kudi etu kulejan rusangu ruwamp machuku minam ma nsudiel!—Mat. 24:14.