Yikwashany in Kwilej Bibil Ikala in Kulejan Rusangu Ruwamp ra Want
1 Mudimu wapanay Yesu kudi in kwilej end mudi walejanau mu Mateu 28:19, 20 wading ujim nakash. In kwilej a Kristu ayifundisha kwikadish in kwilej avud akeza niyawiy kusal mudimu wa kwikadish in kwilej. Akez kutek mufulandal mulong wa kulejan kwa nsudiel mu mangand mawonsu rusangu ruwamp ra Want wa Nzamb pa chisu cha pakampwil cha nsudiel, mutudia etu katat.—Mat. 24:14.
2 In kwilej etu akutwish kwikal anetu ap antu akwau asotina kwilej netu Bibil. Tusotin chakin kamu kuyikwash antu inay chakwel itiya chisend chau cha kuyikwash akwau ikala in kwilej a Yesu Kristu.—Luka 6:40.
3 Yilejany Mutapu wa Kupan Uman: Yikasikesha antu wilejina nau chakwel ayileja akwau yikatau kwilej. Yileja yom yikasikeshina yashikena mu mudimu wa chingand. Yifumba aney kudiosh ku wanikanch chakwel ipana mu kulejan mu mutapu usongina mabuj kwambatan nich ukaliweny wau. (Kus. 148:12, 13) Mekesh kusutil ku yom ulondina ni yiusadila anch mudimu wa kulejan udi wa usey nakash mu mwom wey.—1 Tim. 1:12.
4 Yehova ukat kusadinang ching antu itiyijina ni aziyidila ku yijil yend yitentamina. Chakin kamu, in kulejan asu kakwetap ronganyin ripandikena mudi ra atushalapol a Want adia ayifuvu, ipana kal, ni kubabatishiu, pakwez antu asu afanyidin kwitiyij ni kutwish kurumburil malejan ma pa dishin ma Bibil. (Tal Atenchikinau, p. 79-82.) Mu kwiyauril ayinau kulemp nich “Babilon Mujim” ni milong yawonsu ya chipolitik, afanyidin kukumangan ku yikumangan ya chikumangen pakad kujing.—Kubur. 18:2, 4; Yoh. 17:16; Heb. 10:24, 25.
5 Piswimp ap anch waman anch muntu umwing pakach pa antu wilejina nau Bibil uwanyishin yitinau chakwel ikala mwin kulejan wakad kubabatishiu, chifanyidin kumwijikish kulam ntakel. Ndiy ukuyilej amakurump aad isamba ney ni muntu wilejina nend Bibil mulong wa kuman anch uwanyishin yitiyijinau chakwel ikala mwin kulejan wakad kubabatishiu wa rusangu ruwamp ra Want pamwing ni chikumangen. Chawiy lel, chikwikal chisend chey cha kutwal kurutu kufumb kwa muntu wilejina nend Bibil pakatay kukutwal mu mudimu wa chingand.