Sutish Chisu Chey Chivud mu Kulejan

¹ Kudi chakin kamu yom yivud ya kusal mu mudimu wetu, ni chisu chashalaku kal chidi chiswimp. (Yoh. 4:35; 1 Kor. 7:29) Nich kwirijek kuwamp ni kutenchik yom kurutu kwa chisu, tukutwish kusutish chisu chivud twatenchika mu mudimu wa kulejan.

² Ikal Wirijekina: Kurutu kwa kuya ku chikumangen cha mudimu wa chingand, ikal nich kashinsh anch ukwet mikand ukwikala nich kuswir ni urijekin nawamp yiukeza kwisambidin. Kupwa kwa kupwish chikumangan nich malembil yang kapamp kamwing mu chingand. Chinech chikukukwash ey ni antu asadila pamwing ney mudimu ukash anch chitwishikin mu chisu chimekena mu mudimu wa chingand.

³ Anch akutond chakwel utakela chikumangan cha mudimu wa chingand, sambish kurutu kwa saa. Sal chikumangen mu wiswimp—kangal wasutish aminit 10 ap 15. Kurutu kwa kuyipalangesh antu, ikal nich kashinsh anch muntu ni muntu wij anch ukubudik ni kanang ni kwisu kuyilau kulejan.

⁴ Piukata Kulejan: Anch chikumangan cha mudimu chapwa, kangal walab chamwamu, pakwez sambish kuya mu teritwar. Anch uchingejin kubudik mu teritwar kurutu, ukutwish pamwing ap kutenchik mutapu wey wa kuya chakwel antu akwau a mu chisak kangal abudik kurutu. Piusadila nich chisak, yitongijokina akwen akutwisha ku kuchingel chakwel upwisha mambamb. Chinech chikutwish kwit kusadil manangu chakwel kumusha muntu usotina kutadikijan ap kwirijek chakwel uchirikina antu asangaredina.—Mat. 10:11.

⁵ Piukata kuyichirikin antu, ukutwish kwipuk kumwendil muntu chamwamu kurutu kwa kuya kudi mukwau. Chitwishikin kuyitazuk ku telefon antu amwing chakwel wikala nich kashinsh anch akwikal ku chikumbu. (Jinsw. 21:5) Anch uchingejin kulab mu kuchirikinamu, ukutwish kutenchik yom chakwel antu adia mu chisak chey alejana piswimp ap ayichirikinamu kand antu akwau.

⁶ Tushich pa chisu cha kwangul kujim kwa muspiritu. (Mat. 9:37, 38) Piswimp ap mudimu ukupwa. Chawiy lel, rusot retu rifanyidin kwikal ra kusadil nawamp chisu chetu pitudia mu mudimu wa kulejan.