Yikumangan ya Mudimu wa Kulejan

1. Mutapu ik tukwatikeninga nakash pa kuya mu mudimu wa kulejan mu mutapu utenchikinau nawamp?

¹ Yesu washa chilakej cha mutapu wa kusal mudimu wa kulejan Want mu mutapu umwing utenchikinau nawamp ni uwamp nakash. Chawiy chimwing kand nlel, akweta chisend cha kampany wa kulejan Want usadikina mu mangand mawonsu azangurokin nakash pamenau anch mudimu winou usadikin mu mutapu wawiy umwing. Kukwatijan nich kusal mwamu, mu mangand mawonsu yikumangen yikat kusadil yikumangan ya mudimu mudi njil ya kutenchikin yirund ya in kulejan a Want mulong wa mudimu wa kulejan.​—⁠Mat. 24:​45-47; 25:21; Luka 10:​1-7.

2. Chom ik chichingejidinau anch chisadika ku yikumangan ya mudimu wa kulejan?

² Kutenchik Kuwamp: Yikumangan ya mudimu ayitenchikining mulong wa kutukasikesh, kutwinkish yiyul yiwamp ni umutakel ku mutapu wa antu asotila kuya mu mudimu wa kulejan. Chitwishikin kwisambish mufund wa dichuku anch wisambidin kamu mudimu wa kulejan. Pa yisu yimwing, atuvurishining yom yidia mu Mudimu Wetu wa Want, mu buku Comment raisonner ap pamwingap mu buku École du ministère mulong wa kurijek yikunku yawonsu ya mudimu pa dichuku dined. Chitwishikin kusal chakumenaku chiswimp chilejena mutapu wa kupan mukand wa kupan pa ngond winou. Kurutu kwa kupwish ni malembil, muntu ni muntu ufanyidin kwijik ukuyay nend mu mudimu wa kulejan ni kwisu kudia teritwar mukuyau ni kulejan. Kupwa kamu kwa chikumangen chinech cha minit 15, awonsu afanyidin kwikal mwinjil ayil mu teritwar.

3. Anany akweta chisend cha kutenchik yikumangan ya mudimu wa kulejan?

³ Mutapu ik Witenchikiningau? Kalam wa mudimu ndiy udia kurutu, ukwet chisend cha kutenchik yikumangan ya mudimu wa kulejan. Atulam a yirund ap ankwash au, awiy akweta chisend cha kuya pamwing ni yirund yau mu mudimu wa kulejan pa Diampos ni Diarubing. Atulam amwing ap ankwash a mudimu akutwish aya pamwing ni yirund mu machuku ma mukach mwa rubing. Atulam a yirund akusal pamwing ni kalam wa mudimu chakwel ikala nich teritwar ufanyidina mulog wa yirund yau yisala mudimu wa kulejan ku chikumbu ni chikumbu pa Diampos ni Diarubing. Pa rubing, kalam wa mudimu ukwimanyin yitenchik yisadilau in akutakela yirund mu mudimu wa kulejan.

4-6. (a) Yikumangan ya mudimu wa kulejan yikwet rutong ik piur pa teritwar wa chikumangen? (b) Yom ik yifanyidina kushinshikin mulong wa kwijik maswir ma kusal yikumangan ya mudimu wa kulejan?

⁴ Kwisu ni Chisu ik Chifanyidinau Kusal Yikumangan Yiney? Pa ndond pa kwikal ni chikumangen chawonsu pa ndond yimwing, chiding chiwamp nakash kutenchik yikumangan yiney chakwel yisadikina mu jindond jiwamp, chisu chivud mu yikumbu ya antu, mu teritwar mwawonsu nich chitong cha kulejan mu teritwar mwawonsu wa chikumangen. Chitwishikin kand kusadil Yot ya Want mulong wa rutong riner. Yikumangen yivud yikat kusadil Yot ya Want mulong wa kusal yikumangan ya mudimu kupwa kamu kwa diskur dia antu awonsu ni Dilejan dia Chinong cha Kalam pa Diarubing. Chifanyidin kusal usu anch kangal kwikal weny ulemp wa kuya djat mu teritwar. Chawiy lel, ufanyidinany chisu ni chisu kutenchikiril yom chakwel ushinshikinany anch ndond jikatau kusadil jidi kamu jifanyidina mulong wa kusal nawamp mu teritwar mwawonsu ni kumuwanyish.

⁵ Chisu chiwamp cha kusal yikumangan yiney ni tupamp twinch chifanyidina kuyisal pa rubing chengamidin pa mutapu udinga teritwar wen. Yipul yilondwilaku ey yikutwish yakukwashany chakwel utenchikany ndond ni chisu chifanyidina kusadik yikumangan yiney ya mudimu wa kulejan mu mutapu uwamp.

⁶ Pa teritwar ik ufanyidina kuta muchim nakash? Chisu ik chiwamp chifanyidina kulejan ku chikumbu ni chikumbu? Ov, kudi chisu cha urel chifanyidina kutenchik mudimu wa kulejan ku chikumbu ni chikumbu ap cha kuchirikinamu? Yitenchik yawonsu ya mudimu wa kulejan chifanyidin kuyitek pa tablo wa yijikish wa chikumangen. In kulejan awonsu aswiridin anch alejana mu teritwar wau mwawonsu mu chilik chakwel anch niyetu tulonda mudi mwalonday kambuy Paul anch: “Kinikwetap kand ndond ya kusal mudimu wam mwi ngand yiney.”​—⁠Rome 15:​23, MM.

7. Chisend ik chikwetay muntu utondinau kutakel chirund chikuya mu mudimu wa kulejan?

⁷ Kutakel Yikumangan ya Mudimu wa Kulejan: Muntu utondinau mulong wa kutakel chikumangan chinech ukumekesh kalimish kakurikina mulong wa ditenchik dined dia uteokras kusutil ku kwirijek nawamp. Yikumangan yiney yifanyidin kusambish pa chisu ni yifanyidin kwikal nich malejan ni yiswimp, pakach pa minit 10 ap 15. Ntakel ufanyidin kusambel kwijik teritwar kukuyau ni kulejan kurutu kwa kusal chikumangan. Ap anch chidiap cha usey kuyichingej ni kucheleu eza bil anch chikumangan cha mudimu wa kulejan chapwa kal, chikutwish chikal cha usey kusha dizu mulong wa kuyijikish kwisu kuuyilany ni kulejan. Awonsu afanyidin kwikal mwinjil ya kuya ku teritwar utondinau kupwa kamu kwa chikumangan chinech. Chikumangan chirijekinau nawamp ni chikweta malejan mulong wa mudimu wa kulejan chikez chakin kamu kwikal cha ukwash mulong wa antu awonsu akwikalaku chakwel asala nawamp mudimu wau wa kulejan pa dichuku dined.​—⁠Jinsw. 11:⁠14.

8. Mu jinjil ik yikutwishau antu akata kwez ku yikumangan ya mudimu wa kulejan kusadil mu kwovujan pamwing ni antu atakedila?

⁸ Kukumangan ku Yikumangan ya Mudimu wa Kulejan: Chidi cha usey kusal mu kwovujan. (Heb. 13:17) Pichitwishikina, muntu utakedila chirund ukez kusal pamwing ni muntu win mwawonsu uburedina wa kusal nend. Chidi chiwamp anch in kulejan akweta ronganyin rijim ikalaku chakwel akwasha mutapu wa kusal pamwing ni antu asu ni pamwing ni in kulejan akad ronganyin rijim. Asotila kusal pamwing ni muntu windjing, pa yisu yimwing, niyau akutwish aya pamwing ni antu akwau. (Jinsw. 27:17; Rome 15:​1, 2) Awonsu afanyidin kusal usu nakash wa kwikalaku kurutu kwa chisu. Kulimish kwetu ditenchik dined dia uteokras ni kuyilimish akwetu tusadila nau mudimu kukutwish kwatubachik tusala yitenchik ya usey pa mulong winou.​—⁠2 Kor. 6:​3, 4; Filip. 2:⁠4.

9. Mu jinjil ik ja usey mukutwishau ayibol kukwash ditenchik dined?

⁹ Ukwash wa Chibol: Ukwash wa chibol ku yikumangan ya mudimu wa kulejan uding wa usey nakash ni uyikasikeshining antu awonsu. Chovuken komb, ayibol akwet yisend yivud. Kuwejin pa kutakel malejan ma Bibil ni kuchirikinamu, mu program wa pichuku pichuku mukutwish mwikal kuwanyish yisend ya dijuku ni kusal mudimu wa ku mujimbu. Chawiy, ayibol kafanyidinap kwiyov anch chiyifanyidin kwikalaku ku yikumangan yawonsu ya mudimu wa kulejan yitenchikinau mu chikumangen, pakampwil anch yikumangan yiney yisadikin pichuku pichuku. Pakwez, chikutwish chikal kand chitwishikina kudi ayibol kwikalaku ku yikumangan yimwing ya mudimu wa kulejan pa rubing ni rubing. Mu chilik kanang, yikumangan ya mudimu wa kulejan yidi yisu ya kwifumb, kukul muspiritu ni rongany ra ayibol yikutwish yikal ya ukwash nakash kudi antu akwau. Kuyang kwau chisu ni chisu mu kulejan kwayitwishishin kal ikala nich ronganyin rijim mu mudimu wa kulejan. Chitwishikin kwambulijan ronganyin riner. Kusal kwau mudimu wa kulejan ni mushiku ni kwikalaku kwau ku yikumangan ya mudimu wa kulejan kwayikadishin kal yilakej ya kwimburij. Ni kwikalaku kwau ku yikumangan yiney ya mudimu akat kukusanger nakash.

10. Mulong wak chidi chifanyidina anch in kulejan a Want akwasha ni michim yau yawonsu ditenchik dined?

¹⁰ Mudi muchadinga ku mutambu wa Yesu ni in kwilejend, chikunku chijim cha mudimu wetu wa kulejan Want ukat kusadik kusutil ku kulejan ku chikumbu ni chikumbu. Yikumangan ya mudimu wa kulejan yikwet rutong ra kukasikeshijan mulong wa kusal nakash mu mudimu winou. In kulejan awonsu a rusangu ruwamp afanyidin kwikal in kukasikeshin yitenchik yiney ya uteokras mudi muchitwishikina. (Mid. 5:42; 20:20) Etwawonsu tusalany usu wa kwipan ni muchim wawonsu mu mudimu winou. Anch twasal mwamu, tukutwish twikal nich kashinsh ka kutambul yiyukish ya Yehova ni tukutwish twausangeresh muchim wa Ntakel wetu, Yesu Kristu, mudi mutulejena rusangu ruwamp ra Want wa Nzamb.​—⁠Mat. 25:​34-40; 28:​19, 20.