Yakul Ku Yipul Yen

◼ Ov mutapu ik ufanyidinau kutakel yikumangan ya mudimu wa chingand?

Rutong ra chikumangan cha mudimu wa chingand ridi ra kutukwash kukungin yitongijok yetu pa mujikit udia kurutu​—⁠mudimu wa kulejan. Chawiy lel, ntakel ufanyidin kwirijek nawamp kamu ni kwikal tayad chakwel kupan chom kanang chikutwisha kukasikesh, chovikena, ni chikutwishau kusadil. Anch mufund wa dichuku wambaten nawamp kamu nich mujikit wa kulejan, akutwish kuutang ni kuwisambin mu wiswimp. Pakwez, chikumangan chifanyidin kwimen nakash pa mudimu wa kulejan wa dichuku dinidia, ni kuyikwash antu awonsu a kuya mu mudimu wa kupan uman kwikal irijekina nawamp kamu.​—⁠2 Tim. 4:⁠5.

Akutwish kwisambin manans kanang mafanyidina kusadil madia mu Mudimu Wetu wa Want chakwel kuyijikish awonsu mikand ya kupan mwi ngond winiwa ni mutapu wa kuyipan. Pa dichuku dia kupan magazet, akutwish kusal chakumenaku nich kusadil mulong “Yitukutwisha Kulond Piur pa Magazet.” Pa chisu cha ma kampany ma mijikit ya pakampwil, akutwish kukasikeshin mutu wa mulong umwing ap yaad yidia mu buku Comment Raisonner yifanyidina nich teritwar wen. Chitwishikin kand kwisambin mulad umwing wa mudimu, mud mutapu wa kusadil Baibel ku chis ni chis, mutapu wa kupandakan chikangesh misamb chikutwisha kulank, mutapu wa kusambish dilejan dia Baibel, ap mutapu wa kulondul swa kusanger kwa antu.

Yikumangan ya mudimu wa kulejan, kuwejinaku kwirijek kwa yirund, kupan kwa materitwar, ni dilembil yifanyidinap kusut pa aminit 10 kushik ku 15. Kupwa kwa chikumangan, muntu ni muntu ufanyidin kwijik kwisu kukuyau ni kusadil mudimu ni nany ukuyay nend pamwing, ni kuya swa mu teritwar. Pa kuman kwiswimp kwa chikumangan chinech, chidi cha usey anch antu awonsu eza pa chisu chifanyidina. Chikumangan cha mudimu chifanyidin kwikal chiswimp nakash anch chisadikin kupwa kwa chikumangan cha chikumangen, mud dilejan dia Tour de Garde. Chidiap kwau cha usey kwisambin piur pa mufund wa dichuku, mulong atambulang kal ukwash wa misamb yiwamp piur pa Mufund wa Baibel.

Chisu chawonsu, afanyidin kumwijikish mukadivar umwing uwanyishina yitinau chakwel atakela chikumangan cha mudimu wa kulejan. Anch kwikil mukadivar ap umwing ufanyidina kutakel mu dichuku kampand, amakurump afanyidin kutond anambaz in kubatishiu akutwisha kusal mwamu chisu kudia kuswir. Nambaz ukwikal ushicha, ukutwish kutakel chirund nich misamb ya mufund wa dichuku ap manans makwau mambatena nich mudimu wa chingand, ni kupan yiyul yend yiswimp. Ufanyidin kudjal chitambal ku mutu.

Yikumangan ya mudimu wa chingand yidi yisu yimwing yiwamp kud etu mulong wa kwikal akasikeshinau ni awanyishinau chakwel kusal mudimu. Anch mwin kutakel wirijek nawamp, etu awonsu tukutambwilaku ukwash.