Tutaninanyamu Sens ku Yikumangan ya Mudimu wa Chingand
1. Mutapu ik yikumangan ya mudimu wa chingand yikutwisha kutukwash?
1 Yikumangan yifanyidina ya mudimu wa chingand yikasikeshening chakin ni yiletining yiyul yifanyidina kurutu kwetwetu kuya mu kulejan. Yitukwashining kulejan mu chirund chakwel tutwisha kusal pamwing ni antu akwau mulong wa kukwashijan ni kufundishijan. (Jinsw. 27:17; Mul. 4:9, 10) Yom ik tukutwisha kusal chakwel kutaninamu sens ku yikumangan yiney?
2. Yom ik yimwing yikutwishay kushinshikin mwin kutakel?
2 Mwin Kutakel: Yikumangan yiney yikwetingap yiyul yikatau kusambel kulejan piur pa mutapu kanang wa kuyisal. Chawiy lel, chiwapidil kwirijek nawamp anch yey ukutakela chikumangan chinech. Kangal wikal nich chaku cha kushinshikinang mufund wa dichuku ku chikumangan chinech, ukutwish watondamu malejan ma kuwejin ku minsamb anch mufund wa dichuku wisambidin kamu mudimu wa kulejan. Tongin yikutwisha kuyikwash kamu nawamp anambaz nau akadivar mu kupan uman pa dichuku dinidia. Chilakej, ukutwish kwisambin minsamb kanang ap kusal chakumenaku. Ukutwish watond kuchirikin malejan mamwing madia mu buku Comment raisonner, École du ministère, ap chikunku cha katat cha Chikumangan cha Mudimu. Pa yisu yikwau, ukutwish kushinshikin mutapu wa kusal piur pa mitu ya milong yimwing yikata kulet milong mu teritwar wen, ap kand ukutwish kwisambin mutapu wa kukudish kusanger ni kusambish malejan ma Bibil, nakash kamu anch in kulejan avud akusal kuchirikinamu kusu. Rikalap nchik rusangu ushinshikidinanya, ikal nich musangar ni mwin kukasikesh.
3. Chikumangan cha mudimu wa chingand chifanyidin kulab asaa inch, ni yom ik yifanyidina kusal pa chisu chinicha?
3 Sambish chikumangan pa chisu, ap anch antu akwau akulab pa kushik. Sadil njingunin yiwamp mu mutapu wa kurijek yirund, ni mu kuyangen antu akweta kuswir kwa teritwar mwa kuya ni kulejen. Chikumangan chinech chifanyidin kulab minit 10 kushik ku minit 15 ni chifanyidin kwikal chiswimp nakash anch chisadikin kupwa kwa yikumangan ya chikumangen. Kurutu kwa kupwish chikumangan, antu awonsu afanyidin kwijik muntu ukulejanau nend ni kwisu kukuyau. Chikumangan chifanyidin kupwa nich malembil.
4. Yom ik yikeza kuyikwash antu awonsu kutaninamu sens ku yikumangan ya mudimu wa chingand?
4 Ukutwishany Kukwash: Mud kamu mutapu tusadining yikumangan yikwau ya chikumangen, tukat kumekesh anch tumulimishin Yehova ni kuyibangin antu akwau anch twashik kurutu kwa chisu. Inungina ku minsamb. Ukutwish wamulik mwin kutakel chakwel akutondina muntu ukusalanya nend pamwing, ap ukutwish witondinap muntu kurutu kwa chisu, ap ukutwish kwovijan ni muntu wa kuya nend kurutu kwa chikumangan. Anch usotin kwovijan amwiney ni muntu wa kuya nend, sal usu wa ‘kwazuril muchim nakash’ chakwel kusal pamwing nau atutwambil kushalijan, pa ndond pa kuyang ching ni arund ney a piswimp chisu ni chisu. (2 Kor. 6:11-13) Anch kamu chikumangan chapwa, ipuk kuswimpol yatenchikangau kal, yang swa mu teritwar.
5. Yikumangan ya mudimu wa chingand yikwet rutong ik?
5 Yikumangan ya mudimu wa chingand yikwet rutong ra chilik chimwing ni ra yikumangan yikwau ya chikumangen. Ayirijekining mulong wetwetu “tutongijokany kulangwish muntu ni muntu ku rukat ni midimu yiwamp.” (Heb. 10:24, 25) Anch twasal usu wa kutaninamu ku yikumangan yiney, yikez kutukwash kusal mudimu wetu wa kulejan—‘mudimu uwamp’ chakin!