Yileja Aney Kumushiman Yehova
1. Ov, anikanch akutwish kumushiman Yehova?
1 Kuseng 148:12, 13 uyikasikeshin ansangarum ni ayangadim “ashimana dijin dia Yehova.” Mu Bibil mudi yilakej yivud ya ansand ashimana dijin dia Yehova. Chilakej, “Samwel wadinga ni kusal mudimu kurutu kwa Yehova, padingay uchidi nsangarum.” (1 Sam. 2:18, Les Saintes Écritures — Traduction du monde nouveau) Wadinga “changadim” wamuleja mukajend a Naman anch profet wa Yehova udia mu Isarel ukutwish kwok Naman musong wend wa mak. (2 Ant 5:1-3, NW) Pandamay Yesu mu tempel ni kusal yilay, “ansangarum” abaroka ni kulond anch: “Hosana kudi Mwan a David!” (Mat. 21:15) Mutapu ik ukutwishau anvaj kuyilej anau kumushiman Yehova?
2. Mulong wak chidi cha usey kudi anvaj kuyishil anau chilakej chiwamp?
2 Ikalany Yilakej: Mu Isarel adinga bil ni kuyilej atatuku kumukat Yehova ni kulam yijil Yend mu michim yau, kurutu kwa kwandjik uyakin mu michim ya anau. (Kuv. 6:5-9) Anch walond kwa kukasikeshin piur pa mudimu wa kulejan ni kuusal wikala mujikit wey mu program wey wa rubing, aney akuuman kwikal wa usey ujim ni usangarishina.
3. Mutapu ik wisakinay nambaz umwing kusutil ku chilakej cha anvaj end?
3 Nambaz umwing uvurikin nich musangar anch: “Pinading ni chipamin, dijuku dietu diading nich chaku cha kusal mudimu wa chingand kwinsudiel kwa rubing ni rubing. Namana anch anvaj am akata chakin kamu kulejan. Twapama nich chitongijok cha kuman mudimu wa kulejan kwikal usangareshina.” Nambaz winou wikala mwin kulejan wakad kubatishiu pikalay ni mivu sambwad ni wasadil kal mivu 32 ni kusut mu mudimu wa chisu chawonsu.
4. Ov, chirumburikin ik kuyijidish an pakemp pakemp?
4 Kuyijidish Pakemp Pakemp: Yangany pamwing ni anen mu mudimu wa kulejan. Pamwing ap akutwish kukokal ku chis, kumwinkish mwin chikumbu trakt, ap kutang verse. Chinech chikez kuyiwejin musangar wau ni kuyikwash achingejina ukaliweny wau wa kupan uruu wa Want. Chisu chipaminau, afanyidin kwipan nakash mu mujikit. Chawiy lel, yikwashany aya kurutu ni kutongin pa ntong ja mu spiritu.
5. Chom ik chifanyidina chakwel mwan awanyisha yitinau mulong wa kwikal mwin kulejan wakad kubatishiu?
5 Yilejany amakurump piumenanya anch anen awanyishin yitinau chakwel ikala in kulejan akad kubatishiu ni pakatau kumekesh rusot rau ra kwikal in kulejan. Kwikal mwin kulejan kukez kuyibachik chakwel awanyisha chisend chau ayinau cha kumushiman Yehova. Ijik anch mwan kafanyidinap kwijik yom yivud mudi muntu mukurump wabatishau kal kurutu kwa kuwanyish yitinau. Ov, mwaney wij kurumburik kwa malejan ma pa dishin ma Bibil? Ov, ukat kusadil yany ya Bibil? Ov, usotil kwipan mu mudimu wa kulejan ni amwijika mudi umwing wa Atuman a Yehova? Anch chidi mwamu, amakurump akutwish kushinshikin anch uwanyishin yitinau chakwel ikala mwin kulejan wakad kubatishiu.—Tal buku Atenchikinau Chakwel Kusal Rusot ra Yehova, paj wa 79-82.
6. Mulong wak chidi cha usey kudi anvaj kuyijidish anau?
6 Chitin kusal usu chakwel kuyilej an amushimana Yehova mu michim yau. Pakwez, tuyom tukemp twawiy tukata kuyisangaresh nakash anvaj kupandakanamu kuyiman anau akat kukul mu spiritu. Chijim, Yehova ukat kusangar pakatau an kulejan midimu yend yishimokishina.