Program wa Dijuku—Mudimu wa Chingand mu Dijuku
1 Yehova ukat kusangar pa kuman an akemp akat kushiman dijin diend. (Kus. 148:12, 13) Ap mu machuku ma Yesu ‘an akemp ni achidia kwamu amushimana’ Nzamb. (Mat. 21:15, 16) Chawiy chimwing chisadikina kand nlel. Anvaj, mutapu ik ukutwishanya kuyikwash anen kukul kwikal in kumushiman Yehova akweta mushiku mu mudimu wa Ukristu? Chikwau kand, mud mwakasikeshinangau pa yikumangan ya chikumangen mu mutu wa mulong udia kwiur oku, chom cha usey chidi chilikej chen. Tatuku umwing walonda mulong wa anvaj avud anch: “An kakusalap kwau mud muulondilany; akusal mud muusadilanya!”
2 Nambaz umwing walilau kud anvaj amwovila Nzamb wom wavurika anch: “Kand kal tulankangap Diampos pamanch ni kwiyipul anch tukuya mu mudimu. Twading twij anch tukuya.” Chawiy chimwing, ukutwishany kukun mu an en usey wa mudimu wa kulejan kusutil ku kutek rubing ni rubing chaku cha kwipan pakad kujing mu mudimu wa chingand mu dijuku. Chinech chikuyikwashap kusu kwau an en kwilejin kud en pakwez kand kukez kukutwishishany kutal mwikadil wau, yaku yau, ni kukul kwa ukaliweny.
3 Kuyiy Kuyila Kurutu: Pakwel anch an asanger mudimu, aswiridin kwikal arijekinau chakwel kwipan muchifanyidina. Nambaz wajimbulangau kwiur oku walonda kand anch: “Kitwadingap ap pakemp ni kusanger kusu kuyitwalaku anvajetu mu mudimu wau. Twading twij anch tukwet ya kusal, ap anch chadinga kusu kwau kukokal ku chis ni kupan trakt. Kusutil ku kwirijek nawamp kurutu kwa mijikit ya nsudiel ya rubing ni rubing, twijika yom tukutwisha kulond.” Ukutwishany kuyiy an en kusutil kutek aminit akemp rubing ni rubing chakwel kuyirijek mulong wa mudimu, chikalap nchik chisu cha dilejan dia dijuku ap chisu chikwau.
4 Kulejan pamwing mu dijuku kukwinkishinany en mutapu ukwau wa kukun uyakin mu an en. Tatuku umwing mwin Kristu wasotang kumusend mwan end mband chisu chendangay akilometre dikum njil ni njil mulong wa kupan matrakt kud antu ashicha mu makunku mwi nkurubuk. Ndiy wavurika anch, “chisu cha kwend kwinoku,” “chawiy chakunay tatukwam uyakin mu muchim wam.” (Kuv. 6:7) El wikalany niyen ayukishinau mulong wa kusal mudimu wa chingand kwikal chikunku cha program wa dijuku dien wa rubing ni rubing.