Yifumbany Anen Ikal Atushalapol
1. Ov, Kuseng 148:12, 13 uyitin anvaj in Kristu kusal chom ik?
1 Yehova uyitazukin an ansand chakwel amushiman. (Kus. 148:12, 13) Chawiy, anvaj in Kristu asadiling usu nakash wa kufumb anau mu uyakin wa mu Bibil ni yijil ya mashakamin mawamp ma Nzamb. Ayifumbining kand kwikal atushalapol a rusangu ruwamp. Ov, mutapu ik ukutwisha mulad winou kuya kurutu chisu chawonsu?
2. Ov, mutapu ik chilakej chiwamp cha anvaj chikuyibachika anau?
2 Chilakej Chiwamp: Nkalansambu Gidion wayileja antu end 300 anch: “Talany kudi am ni kwingilakej.” (Ank. 7:17) An ni yawiy akata kwilikej ni akat kwimburij anvaj au. Tatuku umwing usadininga mudimu uchuku, pakwez pa ndond ya kuya kulal pa chisu cheziningay ku chikumbu Diampos pamanch, ndiy uyiling ni anend mu mudimu wa kulejan ap anch uziyil nakash. Pakad kulond dizu, ndiy uyifundishining anch mudimu wa kulejan ufanyidin kwikal pa ndond ya kusambish. (Mat. 6:33) Ov, aney amening musangar utambwilinga mu mitapu kushalijan ya difukwil, mudi kulembil, kutang Bibil, kurumburil yakul, ni kulejan? Chawiy, ukezap kwikal chilakej chiwanyidina. Pakwez, aney akez kwikal tayaad nakash ku kwakul ku mausu mey ma kuyifundish difukwil dia Yehova ap anch amen mushiku wey wa kumusadil.—Kuv. 6:6, 7; Rom 2:21, 22.
3. Ov, jisu jintong ja muspiritu jiyila kurutu jifanyidina anvaj kukwash nich anau chakwel ikal nich ni ajikimba?
3 Jintong Jiyila Kurutu: Chikalap nchik kuziy, en anvaj yifumbany anen ijik mutapu wa kwend, wa kulond, wa kudjal ayinau, ni kusal yom yikwau yikwau. An akukimb ni yawiy yinship ya usey chisu chipaminau, ni kutek jintong jisu kurutu kwau. Anch anvaj adi in Kristu, akuyikwash kand anau kutek ni kukimb jintong ja muspiritu kukwatijan nich mivu yau ya chivadik pamwing nich ukaliweny wau. (1 Kor. 9:26) Ov, uyifumbining aney chakwel ijika mutapu wa kurumburil yom mu mazu mau ayinau ni kurijek ayinau madiskur ma ku Shikol ya Mudimu wa Uteokras? (Kus. 35:18) Ov, uyifumbing chakwel iyandjika mu mitapu kushalijan mu mudimu wa kulejan? Ov, utekining kurutu kwau rutong ra kubabatishiu ni ra kusal mudimu wa chisu chawonsu? Ov, uyikwashining kwinung nich musangar, kudiau in kulejan a mushiku akutwisha kuyikasikesh?—Jinsw. 13:20.
4. Ov, mutapu ik usangarediningau an kufumb kuyifumbiningau kudi anvaj au mu mudimu wa kulejan kudiosh ku wanikanch?
4 Nfund a kuseng walonda anch: “A Nzamb, ey wanleja kudiokal ku usand wam djat ni ilel unou, chawiy nikat kulejanang midimu yey yikwamushena.” (Kus. 71:17) Sambish kuyifumb anen kurutu chisu chichidiau anikanch chakwel ikal atushalapol mu mudimu wa kulejan. Mufulandal wa muspiritu ukutwisha kuyikwash udi kwikal nich kashinsh ka kutaninamu mudiau chisu chikezau kwikal ni mivu ya amakurump!—Jinsw. 22:6.