Anvaj —Yifumbany Anen Kudiosh Kamu ku Wanikanch
1 “Mufumbila mwan mwi njil yiwapidilay kuya, mulong pakukulay kakez kayilikip kand.” (Jinsw. 22:6) Anvaj, anch usotilanyap anch anen ‘alika’ njil ya uyakin, ov chisu ik chifanyidina kusambish kufumb kwinoku? Kusambish kamu ku wanikanch!
2 Palonday Paul anch mafundish ma muspiritu ma Timote mading kamu “kudiokal ku wanikanch,” chakin kamu wadinga ni kulond anch kudiosh pa mivu ya wanikanch nakash. (2Tim. 3:14, 15) Mud chibudikin, Timote wakula mud ikundj umwing muwamp muspiritu. (Flp. 2:19-22) Anvaj, ufanyidinany niyen kand kusambish “kudiokal ku wanikanch” kuyifumb anen kufumb kukwetau nich kuswir chakwel ‘kukul piswimp nend Yehova.’—1Sam. 2:21, NW.
3 Yinkishany Mem Makwetau Nich Kuswir Chakwel Kukul: Mud kamu tumitond tuchisapukina, chitukwetinga kuswir kwa mem chisu chin chawonsu chakwel kwikal mitond yijim, an a yimbu yawonsu aswiridin kuyizwish nich mem ma uyakin wa Baibel chakwel apama djat ni mu chilik cha kwikal atushalapol a Nzamb akudila. Njil ya kusambish ya kuyifundishin an uyakin ni kuyikwash kwikal nich urund nend Yehova yidi kusutin ku dilejan dia Baibel dia mu dijuku, diakad kujing. Pakwez anvaj, afanyidin kand kushinshikin ukaliweny wa mwan ni mwan. Mulong wa an achidia anikanch, pamwing ap mafundish makad kujing ni mapaninau mu chisu chikemp makwikal ma ukwash nakash kupandakanamu kwilej kwa chisu chimwing chilemp.—Kuv. 11:18, 19.
4 Kangal wadiburilany ukaliweny wa kwilej wa anen. Yilejany jinsangu piur pa antu a pa chirung cha Baibel. Yilejany mutapu wa kufwatul yipich ya jinsangu ja Baibel ap kusadil mu masengan yinship yidia mu Baibel. Sadilany nawamp maband video ni maband kaset, pamwing ni maband ma madram ma Baibel. Ambatanishany dilejan dia dijuku nich yimbu ya mivu ni ukaliweny wa kwilej wa anen. Mafundish ma kusambish makwikal maswapela, mu yisu yiswimp; pakwez anch mwan wakul, kufumb kwend kufanyidin kwiwejinaku ni kwikal kuyila kamu kurutu. Salany yany ya Baibel yikala yisangareshina ni yishalijadina. Anch usotinany anen ‘ikala nich impu’ ya Dizu, chawiy lel salany dilejan dikala kand diletina impu.—1Pita 2:2.
5 Yikwashany Kwiyandjik mu Chikumangen: Yitekinany anen jintong ja kulondul pakemp pakemp chakwel ikal ipanina nakash mu chikumangen. Ov chom ik chifanyidina kwikal rutong rau ra kusambish? Anvaj akweta an aad alonda anch: “Awonsu aad twasambishin kal kuyifundish kushakam zoong mu Chot cha Want.” Kupwa, ayikwasha an kwakul ku yikumangan mu mazu mau ayinau ni kwitekin rutong ra kufundish majin mau ku Shikol ya Mudimu ya Uteokras. Mu mudimu wa chingand, rutong ruwamp ra kushiken rikutwish kwikal ra kupan trakt umwing ku chis, kutang mufund, kupan gazet, ni kumwandjik mwin kwisamb netu mu misamb ya usey.
6 Panany Chilikej cha Mushiku: Ov aney akat kukuteshang dichuku ni dichuku ukat kwisambin piur pa Yehova ni kulembil kud ndiy? Ov akat kukuman ukat kwilej Dizu diend, kukumangan ku yikumangan, kuya mu mudimu wa chingand, ni kusanger kusal rusot ra Nzamb? (Kus. 40:8) Chidi cha usey nakash anch en awonsu usalany yom yiney pamwing. Changadim umwing wakudila kal wamuleja makwend, maku walila an musamban kwikal Atuman ashinshamena anch: “Chom chatukwasha nakash, chading chilikej cha Maku; chilikej chend chadinga ni kulond kusut mazu.” Nvaj umwing wa an anying walonda anch: “ ‘Chakusambish bil Yehova’ kwadingap kusu kulond kwamwamu pakwez wading mutapu wa mashakamin ma mwom wetu win.”
7 Anvaj, sambishany kamu kuyifumb anen pa wanikanch, kuyifundish uyakin wa Dizu dia Nzamb, kwitekin jintong ja kulondul pakemp pakemp , ni kwikal chilikej chiwamp kamu mud chitwishikina. Ukez kwikalany nich musangar anch wasalany yom yiney!