Anvaj​—⁠Panany chilikej chiwamp kud aanen

¹ Dizu dia Nzamb ditulejin anch “Tatukwend [ni makwend] a mwin kutentam ukez kusangar nakash.” (Jnsw. 23:​24, 25) Chidi chiyukish mud ik kud anvaj apanina chilikej chiwamp kud aanau! Mukadivar umwing udia chidi cha Komite wa Mutiy (filiale) walonda ya anvajend anch: “Uyakin wading mwom wau, niyam nasota wikala mwom wam.” Ov yom ik yifanyidinau kuman aan kud anvajau?

² Yaku yiwamp ni kalimish kajim: Chidi chisend cha anvaj kuyifundish aanau yaku yiwamp. Aan kakwilejangap kusu mafundish ma ku kan, pakwez ilejining kand nich kutal ni chilikej. Chawiy lel, yaku ik umekeshina? Ov, aaney akuteshining ukakulond anch “Nlikishinap,” “mboku mwan,” ni “twajikitish”? Ov, mu dijuku umulimishining muntu ni muntu nich kalimish kajim? Ov, ukakutang matu chisu chilondinau antu akwau? Ov, ukakuyiteshang aaney chisu chisambinau ney? Ov, yaku yiwamp yiney uyimekeshining ku Chot cha Want ni ku chikumbu?

³ Mwom wa muspiritu ukash ni mudimu wa mushiku: Mukadivar umwing wasala kal mivu 50 ni kusut mu mudimu wa chisu chawonsu uvurikin anch: “Makwam ni tatukwam ading chilikej chimwing chiwamp nakash mu kusanger kwau yikumangan ni ading ni mushiku mu mudimu wa kulejan.” Ov, mutapu ik ukata kumekesh kud aaney anch utongidin nakash mwom wa muspiritu wa antu adia mu chikumbu chey? Ov, ukakushinshikinangany pamwing mufund wa dichuku? Ov, ukwetany dilejan dia dijuku diakad kujing? Ov, aaney akumening ukakutang Baibel ni mikand ya Sosait? Ov, yom ik yikatau kutesh pakuteshinau ukakulembil mulong wa dijuku? Ov, ukakwambambang ni aaney mambamb ma muspiritu matungina, ni kwisambin milong yiwamp piur pa uyakin ni chikumangen? Ov, usotining kukumangan ku yikumangan yawonsu ni kubudikin mu mudimu wa kulejan ni dijuku diey?

⁴ Anvaj, tonginany chilikej chiupaninany kud aanen. Chisalany chikala chilikej chimwing chipandakena kuwap ni akez kuchilam mu mwom wau wawonsu. Mukajend a kalam mwin kwendangan umwing, ukweta katat mivu 70, walonda anch: “Ni katat nichitambwil ukwash wa chilikej chiwamp cha anvajam akatish in Kristu. Nikat kulembil nich muchim umwing anch nimekesha kujikitish kwam kujim mulong wa uswan winou nich kuusadil mutapu uwamp mu mivu yawonsu ya kurutu.”