Yaku Yiwamp​—Chijingidij cha Antu Ipanina Kud Nzamb

¹ Yaku yiwamp yimeken pakemp nakash nlel. Ov mulong wak? Mulong antu akat kusal yom mau mau mu chilik cha kuvuramen ap yaku ya dishin ya kalimish, mud kulond anch “Amboku,” “Twajikitish,” ap “Nlikishinanyaku.” Dizu dia Nzamb diasambela kulondin piur pa kusheshik kwa yaku ya muntu mu machuku ma kwisudiel, pidilondila anch antu akez kwikal ‘in kwikat ayinau, in kwibaz, in kwishimek, akad kujikitish, akad rukat ra chivadik, akad kwikand, in kukis yom yiwamp, akad kubangaku antu akwau.’ (2Tim. 3:​1-4) Yaku ya yijingidij mud yiney yawonsu yawiy yikasikeshina kuburen kalimish. Chidiau antu ipanina kud Nzamb, In Kristu afanyidin kubabal palemp eza alondula chilikej cha mangand cha kuburen kalimish.

² Ov Yaku Yiwamp Chom Ik? Yaku yiwamp tukutwish kuyirumburil mud kuta muchim ku yovil ya antu akwau, ukaliweny wa kushakam nau antu akwau mu chisambu. Yaku yiwamp yirumburikin kand kuyitongin antu akwau, kalimish, kwitudish, nkyeu ni kwitek pa ndond ya akwau. Yom yiney yiwamp yidiokil ku rukat mulong wa Nzamb ni mulong wa mukwetu muntu. (Luka 10:27) Yikasikenap kuyisadil, pakwez yikwet usey ukash mu kukasikesh urund wetu ni antu akwau.

³ Yesu Kristu washa chilikej chimwing chiwanyidina. Ndiy wasadila chisu chin chawonsu Chijil Chipandikena Usey: “Sal yom kudi antu akwau, mudi muukatila ing niyau akusadilang ey.” (Luk 6:31) Ov chidiap cha musangar kud etu pa kuman kuyitongin antu akwau ni rukat ramekeshay Yesu mu mutapu wend wa kushakam nau in kwilejend? (Mat. 11:​28-30) Yaku yend yiwamp yadingap ni kudiokal ku kulondul yijil kanang yifundinau mu mikand. Yadinga ni kudiokal ku muchim wa kashinsh ni udia tayad kupan. Tufanyidin kwikasikesh kulondul chilikej chend chiwamp.

⁴ Ov chisu ik chikwetau In Kristu kuswir kwa kumekesh yaku yiwamp? Ov ching kusu pa chisu cha pakampwil, chakwel ayibazang? Ap mulong wa kuyipwit antu akwau? Bwat kwau! Tufanyidin kumekesh yaku yiwamp chisu chin chawonsu. Ov mutapu ik tufanyidina kamu kuyisadil pitudia pamwing ni akadivar nau nambaz mu chikumangen?

⁵ Ku Chot cha Want: Chot cha Want yidi ndond yetu ya kwifukwil. Tukat kuyang ku diladikij dia Yehova Nzamb. Komb pa chinech, tudi angendj. (Kus. 15:⁠1) Ov tuding angendj a chilikej chiwamp chisu tukata kwezang ku Chot cha Want? Ov tukat kushinshikinang nakash kamu mutapu wetu wa kudjal ni kwileng kwetu? Chakin kamu tufanyindin kwipuk kwileng mutapu umwing wa kwimekesh ap kusutish chipim. Chisu Ikala ku yikunguril ap ku yikumangan ya chikumangen rubing ni rubing, antu a Yehova ijiken mulong wa mutapu wau wa kudjal ni kwileng ufanyidina antu akata kumwov Nzamb wom. (1Tim. 2:​9, 10) Chawiy lel tukat kumekesh kuyitongin akwau ni kalimish kud Mwin Kutwak wetu wa mwiur ni kud angendj akwau awonsu atazukinau.

⁶ Mutapu ukwau tukata kumekesh yaku yiwamp mu milong yitadila yikumangan kudi kushikang kurutu kwa chisu. Chakin kamu, chinech chidingap chiswapela chisu chin chawonsu. Amwing chitwishikin ashiching kulemp ap akwet an avud akurijek. Pakwez, chimeken anch mu yikumangen yimwing, in kulejan avud piswimp 25 pa chitot ezining chisu chin chawonsu kwinyim kwa dilembil ni muminy wa kusambish. Winou udi mulong umwing ujim. Chiwapidil kuvurik anch kwikal ni yaku yiwamp kudi kuta muchim ku yovil ya antu akwau. Yehova, Mwin Kutwak wetu wa musangar, warijekin misambu yiney ya muspiritu mulong wa ukwash wetu. Anch twashik kurutu kwa chisu, tukat kumekesh kujikitish kwetu ni kubangin kwetu yovil yend. Chikwau kand, kushik kwinyim kwa chisu ku yikumangan kukat kuletang kuzuwol ni kumekeshining kuburen kalimish pantaliken nau antu asambishang kal kukumangan.

⁷ Chisu tukumangena, ov tukat kushinshikin antu ezina ni kukumangan kapamp ka kusambish ku chikumangan? Kuyilangwish ni kwawiy kudi chimwing cha yaku yiwamp. (Mat. 5:47; Rom 15:⁠7) Moy wa musangar, kulangwishijan kwa musangar, nich masip​—⁠tudi kwau twawonsu tuyom tukemp tukemp, pakwez, yikat kuwejin ku yom yikata kutujingunish mud In Kristu akin. (Yohan 13:35) Kupwa kwa kwez kapamp ka kusambish ku Chot cha Want, ikundj umwing walonda anch: “Mu dichuku dimwing nasankanang antu avud nakash akad am kwijik akweta rukat rakin ni kand kal nimanap antu mud inay mu egliz napamina. Chinech changitiyisha chakin anch namana uyakin.” Kupwa ikundj winou wakarumuna mwom wend, ni kupwa kwa angond sambwad ndiy wipana ni kubatishiu. Mwawiy, yaku yiwamp yikutwish kwikal nich yibudikin yipandikena kuwap nakash!

⁸ Anch tukat kusadilang yaku yiwamp pantaliken ni angendj tukata kusankanijan nau, ov tufanyidinap kuyisadil chilik chimwing ‘nakash kamu kud anamakwetu in ritiy?’ (Gal. 6:10) Chijidik cha kusadil chawiy ech: “Mulimishany muntu ipal [ikundj ap mband].” (Levi. 19:32) Tufanyidinap ap pakemp kuyivuramen akadivar nau anambaz etu ananapil kal ku yikumangan yetu.

⁹ Tutany Kamu Nakash Matu: Chisu cha yikumangan ya chikumangen, atushalapol a Nzamb akat kulondang chakwel kupan chiyukish kanang cha kututung. (Rom 1:11) Chikwikal chakin kuburen kalimish ku mutambu wetu kuzel tul, kudia mabazoka, kulondol chisu ni chisu ni muntu ushicha piswimp netu, kuyawol chamwamu chisu ni chisu ku musalany, kutang yom yakad kwambatan nich mafundish, ap kuta matu ku yom yindjing chisu cha yikumangan. Amakurump afanyidin kwikal yilikej mu yom yiney. Yaku yiwamp ya Ukristu yikez kutubachik kumekesh kalimish kafanyidina kud mwin kulond ni ku uruu wa Baibel ulejenay ni kumulondul kamu palondilay.

¹⁰ Chikwau kand, chakwel kumekesh kalimish kud mwin kulond ni kud antu awonsu in kutesh, tufanyidin kufung matelefon metu ma ku makas chakwel kangal mez kuvundangesh chakad kufanyin yikumangan yetu.

¹¹ Yaku Yiwamp ni An: Anvaj afanyidin kamu kutal nawamp chisu chawonsu ngikadil ya anau. Anch mwan mukemp wasambish kudil ap anch wasambish razangan pa chisu cha chikumangan ni kulet kanvundangesh kud antu akwau, chikwikal cha manangu kumusend kubudik nend swa swa pol mud chitwishikina chakwel kumunenetish. Chinech chikutwish kwikal chikasikena chisu chimwing, pakwez tuvurikany anch kusal mwamu kudi kumekesh anch tuyitongidin antu akwau. Anvaj akweta an achidia anikanch akutwisha kulet razangan chisu chin chawonsu afanyidin kutond kushakamin kwinyim kwa in kukumangan chakwel kutwish kubudik pol pa chisu cha chikumangan. Chawiy lel, in kukumangan akwau akutwish kumekesh kalimish pantaliken ni majuku nich kuyishil milong ya nkwas ja kwinyim, anch achisotil.

¹² Anvaj afanyidin kand kuyital anau kurutu ni kupwa kwa yikumangan. An kafanyidinap kukadabijan mau mukach mwa Chot cha Want, mulong chinech chikutwish kulet chak. Chidi kand chiyimp kukadabijan mau pol pa Chot cha Want, nakash kamu urel, anch kwasambish kal kujal. Kulond kwa kutoy dizu pol kukutwish kuvundangesh amutej netu ni kulet yitongijok yiyimp piur pa difukwil dietu. Anvaj akata kusalang usu wa kashinsh chakwel kuyital anau chikala pol ap mukach mwa Chot cha Want adi chakin a kujikitish nakash mulong chinech chikat kuwejin ku kuwap kwa yikumangan yetu mu umwing.​—⁠Kus. 133:⁠1.

¹³ Ku Dilejan dia Buku: Tujikitishin muchim wa kwakan wa akadivar netu akata kupan yikumbu yau mulong wa yikumangan ya chikumangen. Chawiy lel chisu tukumangena, tufanyidin kumekesh kalimish ni kulimish yom yau. Kurutu kwa kwandam, tufanyidin kukusumun nawamp kamu yilat yetu chakwel kwipuk kuyipish pansh ap tapi. Anvaj afanyidin kuyital anau, kwijik anch ashich mu muzu mwa chikumbu chatondinau mulong wa dilejan dia Buku. Ap anch chirund chidi chikemp ni mwikadil umwing uwamp, tufanyidinap kwikal ni wan ipau mu chikumbu chayen. Nvaj ukweta mwan mukemp ufanyidin kumutwal chisu chikwetay kuswir kwa kuya ku musalany. Chikwau kand, mulong dilejan dia buku didi chikumangan cha chikumangen, tufanyidin kudjal mud kamu mutapu tukata kudjal chisu tukata kuyang ku Chot cha Want.

¹⁴ Yaku Yiwamp Yidi ya Usey: Kusadil yaku yiwamp kuletiningap ching kusu kwau yibudikin yiwamp pa mudimu wetu pakwez kand kukat kutwishish kwikal nich urund uwamp ni antu akwau. (2 Kor. 6:​3, 4, 6) Chitudia in kumwifukwil Nzamb wa musangar, tufanyidin kuchiman chiswapela kusip, kwikal mwin kusangaresh ni ap kand kusal tuyom tumekena mud tukemp, pakwez twa rukat ni tukata kuletanng musangar kud antu akwau. Yijingidij yiney ya yaku yiwamp yikez kuwapish mwom wetu mud antu a Nzamb.