Ov tukakulejanang nich rutong?
1 Yehova udi Nzamb wa rutong. (Isa. 55:10, 11, NW) Atukasikeshin kumwilikej ndiy. (Efe. 5:1) Chinech chifanyidin chakin kuchimekesh nich mutapu tusadila mudimu wetu. Chawiy lel chipul chinech chiwapidil: “Ov tukakulejanang nich rutong?”
2 Mudimu wetu wa kulejan wa ku chis ni chis, uman wa kukashimun, ni kwangan mikand yidi yawonsu chikunku cha mudimu umwing ukweta rutong. Pakwez tuvurikany anch mudimu wetu udap kusu wa kulejan pakwez udi kand wa kwikalish in kwilej. (Mat. 28:19, 20) Kwinyim kwa kukus mbut ja uyakin wa Want, tufanyidin kuchirik ni kujisangin mem ni kujilam nawamp pituchingedila Yehova ajikulisha. (1 Kor. 3:6) Tufanyidin kuta muchim ku kusal kuchirikinamu kusu ni kusambish malejan ma Baibel.
3 Tutandurilany mudimu wetu: Tukweting musangar anch twatal kwinyim ni kuvurik yitwasala mu mudimu ni kulond ayinetu anch: “Nasalang yinafanyidinang kusal.” Mud muchifundinau mu 2 Timote 4:5, Paul wakasikesha anch: “Wanyish mudimu [wey, NW] wa ukashalapol.” Chinech chirumburikin kusal usu wetu mulong wa kuya ni kuyital awonsu amekeshina kusanger. Mu program wey wa mudimu urijekina rubing ni rubing, itekinap chisu chifanyidina kusal kuchirikinamu kusu. Sal mudimu nich rutong ra kupakish kusambish malejan ma Baibel nau antu itiyidina. Riner rawiy rifanyidina kwikal rutong retu pitubudikidina mu mudimu wa kulejan.
4 Yipula antwarubil mutapu wiyovau pamanau antu adingau ni kwilej nau Baibel atambul dibabatish ku chikunguril. Asangara nakash, chitwishikin anch asangara kamu mud antu atambula dibabatish. Ashikena rutong rimwing riwamp! Nambaz umwing wikalisha in kwilej wachimekesha mwi njil yiney anch: “Anch twikalish in kwilej avud, Yehova akumushiman nakash. Kud antu itiyina uyakin, chinech chirumburikin mwom. Nikatining kuyifundish akwau uyakin—kupandaken kuwap! . . . Avud pakach pa antu ashikedina ku kumukat Yehova ikadil arund nam nakash.”
5 Tonginap bil, kumukwash muntu kwikal kashalapol wipanina wa Yehova! Udi musangar mud ik! Mabuj mud minam madiokiling ku kusal mudimu nich rutong mu chingand.—Kol. 4:17.