Ov yom ik ukulonda ni mwin Buddha?
1 Mwi ngand jimwing, chikunku chimwing ni kusut cha antu akata kubabatishiu adiokiling mu win Buddha. Ov, chom ik chikata kuyipwitin antu inay ku uyakin? Ov, mutapu ik tukutwisha kulejan rusangu ruwamp kud mwin Buddha?
2 Mekesh kutongin kwa kashinsh: Antu adinga in Buddha pasak alonda anch yidap yitongijok yijim yayipwitina ku uyakin. Pakwez, ashimoka nakash pa kuman mutapu wadingau ni kuyitongin mutapu wa kashinsh. Mband umwing mwin Aziy ushicha mu États-Unis washimoka nakash urund wa nambaz weza ni kumutal kwol kwend ni kwitiy witiya dilejan. Kadingap ni kulond Inglish nawamp, pakwez nambaz wading mwin kushimpish muchim. Mband winou padingay uziyina ap wakad kutwish kwilej, nambaz wading ni kwez kusu ni kumwendil mud murund ni kurijek mulong wa kwilej dichadia. Kupwa, mband winou, anend amakundj aad, ni ipal a makwend ababatishiwa. Wachirikina mwi ngand yend ya chivadik ni wayikwasha antu avud kwilej uyakin. Umwing wa aanend amakundj ukat kusadil katat ku biro wa mutiy. Yiney yidi yiyukish yidiokila ku kumekesh ‘kuwap ni rukat mulong wa antu’ yikatay kumekesh Yehova.—Titus 3:4.
3 Chitongijok cha in Buddha: In Buddha itiyidining yitongijok yikwau yishalijadina nich yikwetau, pakwez kameningap anch chidi cha usey kulondul mafundish kanang ma pakampwil. Chawiy lel, muntu ni muntu ukwet yitiyij kushalijan. Mutu wa mulong umwing wijikena mu chirund kanang cha win Buddha udi anch mwom wizwil too nich mar, pakwez kusutin chimunyik, akutwish kwimik milad ya kuvadiokin mu mwom wakad musangar. Kulondulijan ni antu in kukasikeshin mutu wa mulong winou, muntu mwawonsu usotina kukolik ku kuvadiok kwinoku ufanyidin kushiken ku Nirvana, ngikadil yakad kutwish kurumburil, mulong yidap ndond ap chinship bwat, pakwez, yidi ndond ya lakilak yakad kusansan ni yakad uyimp. (Tal broshir Yik Yikata Kutushiken Pitukufanga?, paj 9-10.) Ov chinech chitufundishin ik? Chidap cha ukwash kusambish kwisambin nakash filozofi wa in Buddha. Pakwez, twisambina milong yijikena yitadila muntu mwawonsu.
4 Tumekeshany anch tutongidin yom ya chilik chimwing: Mulong chisu chivud in Buddha akat kwisikejang mwom pa divu nich mar, chitongijok cha mwom wa chikupu pa divu chikutwish kwikal chakad kwovikan kud awiy. Pakwez, etu awonsu tukweting rusot ra kwikal ni mwom wa dijuku wa musangar, kuman kupwa kwa mar, ni kwijik dirumburik dia mwom. Tutalany mutapu tukutwisha kwisambin milong mud yiney yitukweta etu awonsu.
5 Tukutwish kupakish mazu ma kufungwil malondwila am:
◼ “Nlel tushich mu mangand mamwing mudia antu amena mar pakad mulong. Ov, chom ik chikutwisha kukwash kupwish mar ni uzwazu winou wa antu awonsu? [Chingel chakul.] Kudi kushilamu kumwing kwa pasak kwinkasikeshina nakash. [Tang Kujingunik 21:4.] Mwaning, chirung chinech kand kal chishika, pakwez anch chashik, ov, tusotinap kuchiman?” Chad lel tupan mukand urumburila mutapu ukupwishau mar.
6 Kuday muntu ukweta mivu kanang, tukutwish kulond anch:
◼ “Chitwishikin anch niyey utongidining mud am yitongijok yiyimp yivulijadina ni usu uyikweta padi aanetu. Ov, mulong wak kwiwejidina masandj pakach pa ansand? [Chingel chakul.] Ov, wij anch yom yiney ayilejana kurutu mu buku umwing wasambishau kufund kurutu asambisha yifukwil ya Uislam, ya Ukristu ni ya Uhindu? [Tang 2 Timote 3:1-3.] Tal anch mikadil yiney yidi kwaku kwikalap nchik antu ilejina nakash. [Tang verse wa 7.] Mukand winou wankwashin kutesh uyakin uburedinau kwijik antu avud. Ov, usotin kuwutang?” Tupana buku ap broshir ufanyidina.
7 In Buddha chisu chivud, alimishining Baibel mud mifund yitumbila. Chawiy lel tangany kamu Baibel kapamp kamwing. (Heb. 4:12) Anch muntu utongin anch buku winou udi buku wikadila mwishin mwa usu wa yaku ya Kwingangel, tumuleja anch in kufund a Baibel awonsu ading in Aziy.
8 Mikand ik yifanyidina kamu nakash? Mikand yipalangeshinau kusu mulong wa in Buddha, trakt Ov Mar Makez Kupwa? (Inglish) uchapinau mu Chishinwa, Chijapone, Sinhale ni mu Tayilande. Chikwau kand, antwarubil avud amen mabuj mawamp mu kusadil mikand yilondwila: Abuku Le secret du bonheur familial, L’humanité à la recherche de Dieu ni Les jeunes s’interrogent — Réponses pratiques; mabroshir “Voici, je fais toutes choses nouvelles,” ni Quel est le but de la vie? Comment le découvrir?; anch machidi kwaku, Rusangu ra Want No. 35, Ov Antu Awonsu Akez Kukatijan Dichuku Dimwing? In Buddha avud ilejina katat uyakin ilejin broshir Nzamb Witin ni kupwa buku Connaissance.
9 Ap anch, chimeken mud amishoner in Buddha ashika mu Aten piswimp mu mivu 400 kurutu Paul alejanamu rusangu ruwamp, kichijikenap anch Paul wasankanamu muntu wadinga ni yitongijok ya win Buddha. Pakwez, twij mutapu wadingay ni kutong Paul piur pa kupan uman kud antu a milad yawonsu. “Wiyikadisha muswik wa antu awonsu” chakwel ‘ayipandishap amwing.’ (1 Kor. 9:19-23) Tukutwish kumwilikej nich kumekesh kuyitongin antu ni kukasikeshin ruchingej ritukweta etu awonsu pitupanina uman kudi muntu mwawonsu tusankena.