Kuchirikinamu Kusu Kukat Kushikij ku Malejan ma Baibel
1. Ov mulong wak kuchirikinamu kusu kudi kwa usey nakash?
Yesu wayinkisha in kumulondul end mbil kangal kusu ya kulejan pakwez kand ya kwikadish ‘in kwilej . . . , ni kuyilej.’ (Mat. 28:19, 20) Mwin kulejan ukat kulejanang, pakwez mulej ndiy usadilinga yivud nakash. Ukat kulejanang, kurumburil, ni kupan uman. Mutapu umwing tukata kuyilej antu akwau udi kusutil kusal kuchirikinamu kusu kud antu amekeshina kusanger mulong wa kusambish nau malejan ma Baibel.
2. Ov nany tufanyidina kuchirikin?
2 Ov kud nany ufanyidina kusal kuchirikinamu kusu? Shinshikin kuya ni kumutal muntu mwin mwawonsu witiyina mukand ap umekeshina kusanger kukemp mulong wa rusangu ruwamp. Anch watan muntu usangaredina chisu ulejena ndond ya antu avud, kimb mutapu wa kumwit adres wend ap nimero wend wa telefon chakwel utwisha kukudish kusanger. Ikal ni mutapu wa kuman uwamp piur pa kusambish malejan ma Baibel. Dandamen kukimb antu akeza kwitiyin kwilej Baibel, ni chakin kamu ukez kuyitan.—Mat. 10:11.
3, 4. Yom ik yiswirikedina chakwel kusal kuchirikinamu kusu kusongina mabuj?
3 Mekesh Kusanger Kwey: Kwirijek mulong wa kuchirikinamu kusu kusongina mabuj kusambishining kamu pa mambamb ma kapamp ka kusambish. In kulejan akata kutwish nakash akat kufundang yom yimusangareshina mwin chikumbu, ni kuyisadil yom yiney mud mufulandal mulong wa minsamb yikulondulap. Amwing achimening kwikal cha ukwash nakash kulangwish chipul kwisudiel kwa mambamb chakwel kulangwish kand kusanger kwa mwin chikumbu mulong wa kwez kand kapamp kakwau. Kuyisanger kwetu antu kwa kashinsh kukat kutubachik kudandamen kuyitongin ap anch twadiokal kal ku yikumbu yau, ni kukat kutubachik kuchirik swa wakad kulabijok. Ang chitwishikin, pakish kuchirik swa pikuchidia kusanger kand kal kukepa—pamwing ap kupwa kwa dichuku dimwing ap maad.
4 Chisu cha kuchirikinamu kusu, kimb mutapu wa kutungin pa minsamb yey yasutina. Itekina rutong ra kwisambin ap dinans dimwing dia Mufund utungina chisu ni chisu, ni ikal tayad kutesh. Sal usu wa kumwonganyin mwin chikumbu nawamp. Kupwa pa kuchirikinamu kukulondula, isambina uyakin udia mu Dizu dia Nzamb wasidina kamu pa yimutadila ndiy.
5. Ov mulad ik umwing uswapela tukutwisha kusadil chakwel kusambish malejan ma Baibel?
5 Dimukin Yisu Yimekena Chakwel Kusambish Dilejan dia Baibel: Sal kuchirikinamu kusu nich rutong ra kusambish dilejan dia Baibel. Ov mutapu ik ukutwisha kuchisal? Lejan anch usotin kwisamb nend piur pa chitongijok chimwing cha usey, buril pa paragraf umwing mu buku Ronganyin ap mu broshir Nzamb Witin utongina anch ukumusangaresh. Tang paragraf, shinshikin chipul, ni isambina mufund umwing ap yaad yijimbwilau mu paragraf. Chinech chikutwish kusadik kamu kapamp kamwing ku chis mu aminit atan ap dikum. Pwish nich kulangwish chipul chilondwilaku ni tenchik chakwel kudandamen minsamb pa chisu chikwau.
6. Ov mutapu ik tukutwisha kumekesh anch tumen usey wa kusal kuchirikinamu kusu?
6 Kukudish kusanger kwin kwawonsu tukata kutan chidi chikunku chimwing cha usey nakash cha mudimu wetu wa kulejan. Chawiy lel, itekinaku chisu mu program wey wa rubing ni rubing chakwel kusal kuchirikinamu kusu. Kusal mwamu kukutwish kuwejiku ku kuwap kwa mudimu wey ni kulet musangar wa kashinsh.
[Caption on page 1]
[Study Questions]