Sadilany Nawamp Chisu Chen mu Mudimu wa Kulejan
Atuman a Yehova asala asaa 1945487604 mu mudimu wa kulejan mu muvu wa mudimu wa 2014—chimeken patok anch tukwatin mupak wa kwikal akwatikena mu mudimu wa Yehova! (Kus. 110:3; 1 Kor. 15:58) Mulong “chisu chakep kal,” ov, chitwishikin tusadila chisu chetu chijim mu mudimu chakwel tuyileja antu avud?—1 Kor. 7:29.
Kusadil nawamp nakash chisu chetu mu mudimu wa kulejan kwitin kwikal uswapela kuswimp. Chilakej anch usutishin pakad kujing chisu chimwing ap yisu yivud mu mulad kanang wa mudimu wa kulejan pakad kwambamba ni muntu, ov, ukutwish kuswimp chakwel utana chisu ni kwambamb ni antu avud? Mikadil yishalijadining mwi ndond yimwing ni yikwau. Pakwez, yiyul yilondwilaku yikutwish kukukwash chakwel usadila nawamp chisu chey chakwel utwisha kulik “kubulap chamubudil.”—1 Kor. 9:26.
Kupan Uman wa ku Chikumbu ni Chikumbu: Mu makum ma mivu, in kulejan akweting chaku cha kusambish dichuku diau mu mudimu wa kulejan kusutil ku kulejan ku chikumbu ni chikumbu. Pakwez, mulong antu avud asadining mudimu muten, ov, mulong wak tukutwishap kupakish kulejan ku chikumbu ni chikumbu kupwa kwa midi ap urel nakash, chisu chidingau antu avud ku yikumbu ni akat kwiswedish? Pa chisu cha muten, kupan uman mu maveni ni ndond ya kwisakin kukutwish kwikal ni yibudikin yiwamp.
Kupan Uman wa Patok: Matebur ka chom ka kwendish kakweta ndond ya kutek mikand afanyidin kuyitek mwindond musutina antu avud mu teritwar wa chikumangen. (Tal Mudimu Wetu wa Want wa Kafunfut 2013, p. 5.) Anch ndond yatondinau mulong wa kupan uman, musutinap kand antu avud, Komite wa Mudimu wa Chikumangen ukukwat mupak wa kutond ndond yikwau yisutina antu avud chakwel kutekamu tebur ni tuyom twa kwendish tukweta ndond ya kutek mikand.
Kuchirikinamu Kusu ni Malejan ma Bibil: Ov, chitwishikin kutenchik chakwel kuchirikinamu kusu kwey ni malejan ma Bibil pa chisu chiyakad milad yikwau ya kulejan kwikal ni yibudikin yiwamp? Chilakej, anch mudimu wa kulejan wa ku chikumbu ni chikumbu ukwet yibudikin yiwamp Diampos pamanch, ov, ukutwish kutakel dilejan dia Bibil kupwa kwa midi ap urel? Pa chisu cha kuchirikinamu kusu, ov, in kulejan akutwish kuya swa mu tuyisak chakwel kuwanyish mudimu wa kulejan mu mutapu ujim?
Ap anch chidi chakin anch tukutwish kuchind chisu chetu pitusambishina mudimu wa kulejan, musangar wetu ukuvulijan anch twikal nich yibudikin yiwamp. Anch waman anch kusadil mulad kanang umwing wa mudimu wa kulejan kukwetap yibudikin yiwamp pa chisu kanang, pakish kusadil mulad ukwau. Mulembila Yehova, ‘Mwant wa kwangul,’ akutakela chakwel utwisha kusadil nawamp chisu chey mu mudimu wa kulejan!—Mat. 9:38.